MAHKHAPRÜ 11
11
1Kheakü Gileadrü Jephtha ju athrungrü thirithsürü lakheah, tüshe api ju müzammüramrü tsührü lakheah; tüsho Gilead kheaknü Jephtha trükkhit. 2Gilead niubenü tsührü athrürübo zübe; tüsho küyimki anihbe tsührübo zode akamkhea, arünü Jephtha yankhit tüsho api ki tha, “Isa jipürü yamkhün ching nü yamrüplurüp müla, tümüde nü a püpürü liberü tsührü ah.” 3Judüki Jephthanü api keoniorübo kheaknü tso tüsho Tob lomi ching la; tüsho mudukmüke mihtsürübonü api yande tsah.
4Kim anükhüh dunglim Amon mihtsürübonü Israel bede thirithsü, 5jumonü Gilead limberübo Tob lomi chingnü Jephtha bea lupü yü. 6Arünü tha, “ Arang tüsho isa limbeang, junangde isanü Amon mihtsürü bede keochihbah.” 7Jumonü Jephthanü Gilead limberübo ki tha, “Nüsanü I thraneande I buh yamkhün chingnü yanabahkhi yung de? Tümüde nüsa küpkhuk ching lachoki lang I kilim arücho?” 8Tüsho Gilead limberübonü Jephtha ki tha, “ Jumonü kheakü isa nü kilim alode arükheah, junangde nü isa lung yübah Amon mihtsürü bede keochihbah, tüsho Gilead ching larü isa alala kurungkheak aku thsang.” 9Jumonü Jephthanü Gilead limberübo ki tha, “Nüsanü I Amon mihtsürü bede keochihpü thüyam lim belode yübah, Atungpuhnü arübo I kilim jihsho, I nüsa aku thsüba shi?” 10Tüsho Gilead limberübonü Jephtha ki tha, “Isanü nü yubo yande mürhimosho, isa dükeak Atungpuh thiyumütsan labah.” 11Judüki Jephthanü Gilead limberübo lung yü, tüsho mihtsürübonü api arü kurungkheak aku tüsho limthorü thsüshih; tüsho Jephthanü api yu alala Mizpa ching Atungpuh miki asuk.
12Kheakü Jephthanü yunithsürübo Amon kiulongthsüpuh kilim thiyia yüshih, “Nünü tümü I azhihkhi, I bede keochihpü I lo ching arükhea?” 13Tüsho Amon kiulongthsüpuhnü Jephtha yunithsürübo ki alo, “ Tümütüsho Israelnü arü Ijip chingnü akhiukchoki, Arnon chingnü Jabbok tüsho Jordan khiungde I lomi lude tsodo. Jumonü kheakü, mungtsü chingnü alobo ju jihloang.” 14Jumonü Jephthanü kheaküshe Amon kiulongthsüpuh kilim yunithsürübo yüshih, 15tüsho api ki tha, “ Jephthanü ha thachoh: Israelnü Moab lomi yungsho Amon mihtsürü lomi lude mutso; 16küyimki Israel Ijip chingnü atukheanü, arübo sunglo tsahhode Amürüm Keto khiung tüsho Kadesh lim arü. 17Judüki Israelnü Edom kiulongthsüpuh kilim yunithsürü yüshih, ‘ Muzhobah I nü lo hode yüanü.’ Tüshe Edom kiulongthsüpuhnü mani. Junangde arünü Moab kiulongthsüpuh kilim yüshih, tüshe apinü mümülü. Jumonü Israel ju Kadesh ching lalo. 18Arünü sunglo hode yübah Edom tüsho Moab lomi mükamde ho tüsho Moab lomi aniakhiuklim arübah Arnon thripkhüh binkheam. Tüshe arünü Moab aredungyean ching müyüzah, tümüde Arnon ju Moab aredungyean lakheah. 19Judüki Israelnü yunithsürübo Heshbon ching yakzan shuhde alabuh, Amor kiulongthsüpuh Sihon kilim yüshih, ‘ Muzhobah nü lomi hode isa lapung ching yüshang.’ 20Tüshe Sihonnü Israel api lomi hode ayüpü mükin. Jumonü Sihonnü api mihtsürü alala Jahaz ching trüngmukhung tüsho Israel bede keochih. 21Tüsho Atungpuh Israel Thrünpuhnü Sihon tüsho api mihtsürü alala Israel khah ching jih, tüsho arünü kuk. Junangde Israelnü arü lakhi lomi Amorrü lo alala lukheah. 22Arünü Amorrü lo, Arnon chingnü Jabbok tüsho sunglo chingnü Jordan khiungde lu. 23Jumonü kheakü Atungpuh Israel Thrünpuhnü api mihtsürü Israel müngühnü Amorrü yankhitabah; dale nünü ju luba shi? 24Nü thrünpuh Kemoshnü nü müküh-a lupü jihkhi nünü muluba de? Jumonü Atungpuh isa Thrünpuhnü tümüpürü isa müngüh müküh-a luchonü isanü alubah. 25Kheakü nü ju Zippor tsührü, Moab kiulongthsüpuh Balak kheaknü atsübea de? Apinü Israel müneahakheahdü de yungsho keochihdü de? 26Israel kam chi mahsam Heshbon tüsho ju kiulongbo, Aroer tüsho ju kiulongbo, tüsho Arnon yean kiutobo alala ching lachoki nünü tümü thsükhi jurü mululokhea? 27Jumonü inü nü azhihde neak müyihbeak, tüshe I bede keochihkhinü nünü I amülim kamshih. Atungpuh , mahkhapbuhnü Israelrü tüsho Amon mihtsürü dükeak khihni mahkhapshang.” 28Jude thsüthsü she, Amon kiulongthsüpuhnü Jephthanü ayüshihkhi yubo mani.
29Judüki Atungpuh me Jephtha kheak arü, tüsho apinü Gilead tüsho Manase tsahho, tüsho Gilead ching Mizpa tsahho; tüsho Gilead ching Mizpa chingnü Amon mihtsürübo kilim yü. 30Jephthanü Atungpuh ki thiyuchihchim thsü tüsho tha, “Nünü Amon mihtsürü I khah ching jihsho, 31Amon mihtsürü kilimnü I mungtsü chingnü ayülobah, I yam ripit chingnü tümü I shorupü akhiukbanü, tsükjide Atungpuh yo thsübah, tüsho inü ju taka kingaün jihbah.” 32Jumonü Jephthanü Amon mihtsürü kilim arü bede keochihpü yü, tüsho Atungpuhnü arübo api khah ching jih. 33Tüsho apinü arübo Aroer chingnü Minnith tüsho Abel Keramin khiungde kiuto muku thsümünimde ahihdo laksahde kuk. Hanangde Amon mihtsürü ju Israelrünü kukabah.
Jephtha Tsührübe
34Küyimki Jephtha Mizpa ching anihbuh yam lim alungkhea, atsührübe ju züpzüppü shuhbah tsünde api shorupü akhiuk; tüsho api tsührü alibe ju lang alakheah. Alibe kheak kihode tsührü athrürü yungsho aliberü mülakheah. 35Küyimki apinü alibe ngükhea, apinü akhim thorüp tüsho zhi, “O! I tsah-a! Nünü I mulong rozhakde thsünüshihdo, tümütüsho inü Atungpuh kilim müthsümünimpü thsüde thiyuchihchim khülang thsüdo.” 36Jumonü alibenü api ki tha, “ Abuh, nünü Atungpuh kilim nü yubo jihdüsho, nü mün chingnü akhiukkhi yande I kheak rhimoang, tümütüsho Atungpuhnü nü riri Amon mihtsürü kheak royimdo.” 37Alibenü abuh ki tha, “ Ha I thsungkheaknü rhimoang: I langzü khinu mahne zojang, junangde inü yübah awungbo kheak rümde atsahbah tüsho I müyamrü le inü I tsangkhitkhi tüzhobah.” 38Jumonü apinü tha, “Yüang.” Tüsho apinü alibe ju khinu mahne thsungkheak thiyia yüshih; alibenü amüyamrü lung yü tüsho anihbe tsangkhitkhi awungbo kheaknü tüzho. 39Khinu mahne dunglim alibenü abuh kilim alode arü, tüsho apinü thiyuchihchimkhi yande alibe sheshih. Alibe ju atsangkhitkhi lakheah. Tüsho ha Israel ching yakli khülang kam, 40junangde Israel tsührü aliberübonü Gileadrü Jephtha tsührübe dünkheak tüzhopü kam aban nimung phüyi yüde alakheah.
Currently Selected:
MAHKHAPRÜ 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
