MAHKHAPRÜ 12
12
Jephtha tüsho Ephraimrü
1Judüki Ephraim mihtsürübo mukhungbah Zaphon hode yü, tüsho Jephtha ki tha, “ Tümü thsükhi nü Amon mihtsürü bede keochihpü hode ayükhea tüsho nü lung yüpü isa müjikhea? Isanü nü kheaknü nü yam takkheamjihbah!” 2Tüsho Jephthanü arü ki tha, “I tüsho I mihtsürübo Amon mihtsürü kheak tode rukachihde alakheah; tüsho küyimki inü nü ki jikhea, nünü I arü khah chingnü mübekhit. 3Jumonü küyimki nünü I mübekhit de inü angükhea, inü I rhangdung shuhmülanga jihde Amon mihtsürü azhihde hode ayükheah; tüsho Atungpuhnü arübo I khah ching jih. Dale tümüde nüsa khihni I bede keochihpü atukhea?” 4Kheakü Jephthanü Gilead mihtsürü alala bemukhung tüsho Ephraim bede keochih. Tüsho Gilead mihtsürübonü Ephraim kuk, tümütüsho arünü tha, “Nüsa Gileadrü ju Ephraim tüsho Manaserü bolung tsotsahrümtsahrü ah.” 5Ephraimrü mukhiungyide Gileadrünü Jordan dükihhopung yandoabah. Ephraimrü atsokhitrü khürünü tha, “I dükihhoanü,” Gilead mihtsürübonü api ki tha, “Nü Ephraimrü a de?” Apinü, “Yung,” de thasho, 6arünü api ki tha, “Dale, Shibboleth de thaang.” Tüsho apinü athabah, “Sibboleth,” tümütüsho apinü dükde müthakhitkhuk. Judüki arünü api bede yübah Jordan dükihhopung laksah-a bahde alakheah. Ju kim khülang chingnü Ephraimrü 42,000 laksah.
7Tüsho Jephthanü kam thuruk Israel mahkhap. Jushu Gileadrü Jephtha sheabah tüsho Gilead kiuto khülang ching kiuyukabah.
Ibzan, Elon, tüsho Abdon
8Api dunglim, Bethlehemrü Ibzannü Israel mahkhap. 9Atsührü athrürü 30 tüsho aliberü 30 lakheah, atsührü 30 rhangshih, tüsho atsührübo thsungkheak aliberü 30 bedarü. Apinü kam thüne Israel mahkhap. 10Jushu Ibzan sheabah tüsho Bethlehem ching kiuyukabah. 11Api dunglim, Zebulunrü Elonnü Israel mahkhap. Apinü kam thürü Israel mahkhap. 12Zebulunrü Elon sheabah tüsho Zebulun lomi Aijalon ching kiuyukabah. 13Api dunglim, Pirathonrü Hillel tsührü Abdonnü Israel mahkhap. 14Atsührü 40 tüsho tsührü-tsührü 30, donki 70 kheak binrü lakheah. Apinü kam tizheah Israel mahkhap. 15Judüki Pirathonrü Hillel tsührü Abdon sheabah tüsho Amalekrü wungbo, Ephraim lomi, Pirathon ching kiuyukabah.
Currently Selected:
MAHKHAPRÜ 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
