ISAIA 66
66
Atungpuhnü Trükshihbo Mahkhapkhi
1 Atungpuhnü ha thachoh: Yinmi I kiulongthsü-binkiu tüsho alomi I jing dubopung; nüsanü I thsungkheak tümü yam thsüjihba, tüsho I sühakhimpung tümü a? 2Harü alala I khahnü thrün, jumonü ha alala I yo, Atungpuhnü thachoh. Tüshe azhihayih tüsho mulong rholokhi, tüsho I yu sobah ajanrü kheak inü akheahbah.
3Sherünü moshipung laksahchonü mihtsürü laksahrü ruk; sherünü namfimihnununü kingaünchonü, khihnu hung yihshakrü ruk; sherünü hi kingaün jihchonü, kheaknu thiyih jihrü ruk; sherünü mümihpü jinjinlak jihchonü, sangthsü ki tamkhüntamnükhi ruk ah. Harünü arü nihbuh limrobo mokhitdo, tüsho arü athraneanbebo ching arü menü asühchoh; 4inü she arü keangrüpü mokhitbah, tüsho arünü atrekhi arü kheak handarübah; tümütüsho inü ajichoki, shenü malo, inü asukchoki arünü mani; tüshe I mük ki arünü amütsü rhimodo, tüsho inü masühkhi mokhit.
5 Atungpuh yu aniang, nüsa sherü api yu sobah ajancho: Nüsa thraneanrü nüsa mihtsürü tüsho I mung chingnü nüsa bahyukrünü tha, “Atungpuh müretahshang, junangde isanü nüsa asühkhi ngüanü”; tüshe arübo achih ngübah. 6Aniang, kiuto ching arhunganimkhi! Arüngyam ching düsheak! Atungpuh düsheak, api riri athrihlochoh!
7Anihbe mükhiyide alibenü zübejih; anihbe kheak thsünü marüyide tsührü khülang zübejih. 8Shenü hadürü sode? Shenü hadürü ngüde? Nimung khülangnü alomi zübeba de? Kim khülang chingnü trükshih zübeba de? Tütüshe Zion thsünü akede alibenü atsührübo zübejih. 9Inü nuyam yeahshungbah müzübeba de? Atungpuhnü thachoh; I, angüshihbuhnü nuyam yihdoba de? Nü Thrünpuhnü thachoh.
10Jirusalem lung asühachihang, tüsho anihbe thsungkheak asühang,
nüsa anihbe muzhorü alala;
nüsa anihbe kurungkheak tüzhorü alala asühkhi ching anihbe lung asühachihang.
11Junangde nü mütrübah tüsho mulong shukheamkhi khüh kheak reangkeambah;
junangde anihbe müretahkhi khüh chingnü asühde duka yungbah.
12Tümüde Atungpuhnü ha thachoh: Inü anihbe kilim lalim atsü ayung nangde akamshihbah, tüsho trükshihbo lakhit kenü müleamde abukkhi nangde akamshihbah; nüsa mütrübah tüsho anihbe bin kheak shuhbah tüsho anihbe mukhuk kheak zobah. 13Berünü tsührü shukheamkhi nangde, inü nüsa shukheambah; Jirusalem ching nüsa mulong shukheambah. 14Nüsanü angübah tüsho nüsa mulong asühbah; nüsa robo rimkiu nangde shih kihbah; tüsho Atungpuh khah api yamlarübo kheak lah de mükheahbah, tüsho abukakhiukkhi api riribo azhihde lah.
15Tümüde Atungpuh mo ching, tüsho api khora-lolungbebo chitmühean nangde, api bukakhiukkhi jihlopü bukmüshakkhi ching, tüsho apinü thürühkhi motru ching arübah. 16Tümüde Atungpuhnü mo tüsho api nukshang hode mihtsürü alala kheak mahkhapbah; tüsho Atungpuhnü alaksahkhi ahihdo labah.
17Sherünü kheaknu shih, athraneanbebo tüsho phihnu tsühkhi bolung sangthsü dunglim ayündo ching yüpü nihbuh küdah thsüde tsangkhitchonü, arü rukhühnü adükheakbah, Atungpuhnü thachoh. 18Tümüde inü arü rhimobo tüsho arü lümkhi mükheahlah, tüsho trükshih le thiyutha alala bemukhungpü I arüchoh; tüsho arünü arübah I müretahkhi ngübah, 19tüsho inü arü bolung amütsan khülang zobah. Arü bolungnü inü trükshihbo ching arhang larü yüshihbah, Tarshish lim, Put, tüsho Lud–sanglüh kiprü– Tubal tüsho Javan lim, I mungthu tüsho I müretah müngükhi limshu keyean lomibo ching; tüsho arünü trükshih bolung I müretahkhi khipkhitbah. 20Arünü nüsa keoniorü alala trükshih alala chingnü A TU N GPU H kilim kingaün nangde, khorabo, khora-lolungbe, atho-lolungbe, khoranunu, tüsho kemelbo kheaknü Jirusalem ching I yo amüsüh wung kheak handarübah, Atungpuhnü thachoh, Israelrünü amüsüh yukpung chingnü hi kingaün Atungpuh yam ching handarükhi nangde alabah. 21Tüsho inü arübo khürü amükeamrü tüsho Levirü nangde alubah, Atungpuhnü thachoh.
22Tümüde inü athsüpü lakhi yinmibo aso tüsho alomi aso I miki aninga labah, Atungpuhnü thachoh; junangde nü tsühsoniusobo tüsho nüsa mung aninga labah. 23Khinu aso tüsho amunimung aban, mihtsürü alalanü I miki kingaünpü arübah, Atungpuhnü thachoh. 24Tüsho arünü awukhiukbah tüsho I azhihde alakmihkhi mihtsürü ashemibo kheak kheahbah: tümüde musobo müshe, arü takkhi mo küyimkishe mümüt tüsho mihtsürü alala miki arübo athraneanbe labah.
Currently Selected:
ISAIA 66: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
