ISAIA 65
65
Thrünpuhnü Azhihrü Thsümüchikhi
1I mükeokhirünü I yimde alakheah, I müyimrünü I ngükhit. I mung müjirü trükshih kilim inü tha, “ I ha ching lah, I ha ching lah.” 2Inü nimung amuyung mihtsürü azhihrü kilim I khah chungkih, shepü limro amütsü ching nihbuh lümkhi yande tsahcho; 3mihtsürü shepünü I bukakhiukshihde I miro neaneashihcho, shahwünbo ching laksah-a kingaünde tüsho lotaklungbo kheak arhümthüneabe kingaünde; 4shepü kiuyukbo lung bincho, tüsho azhing ching kiuyukbo ching lacho; shepünü kheaknu shih tsühcho, tüsho arü phühbo ching athraneanbe kelam la; 5shepünü thacho, “ Nü khanguhang, I thüninde darü, tümüde nü thsungkheak a I khide amüsüh lah.” Harübo I nupung ching mokhüh ah, nimung amuyung takkhi mo lah.
6Kheahang, I miki ha thrüta lah: Inü zhikde müla, tüshe inü athrihlobah; atsütsü inü nü ki samde athrihlobah, 7arü mülimkhibo tüsho arü jipürü mülimkhibo rukhühnü, Atungpuhnü thachoh; tümütüsho arünü awungbo kheak rhümthüneabe tak, tüsho awung mujukbo kheak I azhihde tha, jumonü ahokhi rhimobo thülünde inü arü thsümüchibah.
8 Atungpuhnü ha thachoh: Kurungaso ching yukhu ngüchoh, tüsho arünü tha, “Ha düthsümünim, tümüde ju ching müngühmühi lah,” jumonü I yamlarü thsülimnü inü arhimobah, tüsho arü alala müthsümünim. 9Inü Jakob kheaknü tsühsoniuso, tüsho I wungbo yamrüplurüp lurü Juda chingnü handarübah; inü mokhitkhinü ju yamrüplurüp lubah, tüsho I yamlarübo ju ching labah. 10I yimrü I mihtsürübo thsungkheak Sharon ju mihnu boto yimtsühpung kambah, tüsho Akor jindükhün ju moshibo yappung kambah.
11Tüshe nüsa sherünü Atungpuh bahyukcho, shepünü I wung amüsüh mihcho, shepünü kuhi thsungkheak dükhüm kheanga zocho tüsho kuhi-lalim thsungkheak pung ching yukhu yukcho; 12inü nukshang kilim nüsa sangkhik thsüjihbah, tüsho nüsa alalanü alaksahpü ki mükhümbah; tümütüsho, küyimki inü ajikhea, nüsanü malo, küyimki inü asukkhea, nüsanü mani, tüshe I miki amütsü tümüanü nüsanü rhimodo, tüsho inü tümü masühnü mokhitdo. 13Jumonü Atungpuh Thrünpuhnü thachoh: I yamlarübo atsühbah, tüshe nüsa akhümbah; I yamlarübo ayungbah, tüshe nüsa kethüribah; I yamlarübo asühachihbah, tüshe nüsa achih ngüshihbah; 14I yamlarübo mulong asühkhinü khün thsübah, tüshe nüsa mulong rozhakkhinü atripbah, tüsho me thsünükhinü atüzhobah. 15Nüsa mung ju inü mokhitkhi kilim athruajipü zojihbah, tüsho Atungpuh Thrünpuhnü nüsa a asheshihbah; tüshe api yamlarübo ki apinü mung püpünü ajibah. 16Judüki sherünü lomi ching müngühmühi kheangbanü thiyuro Thrünpuhnü müngühjihbah, tüsho sherünü lomi ching thiyuchihchimbanü thiyuro Thrünpuh damde thiyuchihchimbah; tümütüsho akhuhlim küpkhuk mihdo tüsho I mük kinü rama lah.
Aso Thrünkhi
17Tümüde inü yinmibo aso tüsho alomi aso thrünpü thsüchoh; akhuhlim dünjikhibo mülümkhit yungsho lüm ching marü. 18Tüshe inü athrünkhi ching lünnü asühbah tüsho asühachihbah; tümüde inü Jirusalem ju asühkhi thrünpü thsüchoh, tüsho ha mihtsürü asühpü labah. 19Inü Jirusalem ching asühachihbah, tüsho I mihtsürü kheak asühbah; ju ching atripkhi düsheak musolo, yungsho lümthsünü zhikhi müla. 20Kheaküa ju ching khungarü nimung anükhüh müla, yungsho ashinbuhrü rhangdung khiukde alabah; tümüde shepü kam 100 ching shebanü athunu khebah, tüsho shepü kam 100 mukhiungbanü muthrumünean khebah. 21Arünü thüyambo thsübah tüsho ju ching labah; arünü kurungasolubo thsübah tüsho asobo tsühbah. 22Arünü thüyambo thsübah püpürü mülashih; arünü yangbah püpürü mütsühshih; tümüde sangdung nimungbo nangde I mihtsürübo nimungbo labah, tüsho inü amokhitkhibonü arü khah rhimo ching ruhde asühachihbah. 23Arünü akeangkeang ching mürhimo, yungsho thsümütsü thsungkheak tsührü müzübe; tümüde arübo Atungpuhnü müngühjihkhi münü labah, tüsho arü tsühsoniusobo she ju ruk labah. 24Arünü müjiyide inü alobah, arü asukachihde lachoki inü asobah. 25Rimre tüsho namfimihnunu rukhühnü yimtsühbah, kekhüzünü moshipung nangde hineang tsühbah; tüshe phuruto jim a asungthulung labah! Arübo I wung amüsüh alala kheak muyuri yungsho müthsümünim, Atungpuhnü thachoh.
Currently Selected:
ISAIA 65: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
