JEREMIA 1
1
1Benjamin lomi Anathoth ching lakhi amükeamrü bolung Hilkia tsührü Jeremia yubo, 2Amon tsührü Juda kiulongthsüpuh Josia nimungbo ching api kiulongthsü kam thürükheak mahsampü ching anihbuh kilim Atungpuh yu arü. 3Kheaküshe Josia tsührü Juda kiulongthsüpuh Jehoiakim nimungbo ching, tüsho Josia tsührü Juda kiulongthsüpuh Zedekia kam thürükheak khülang akheam khiungde, khinu phüngü ching Jirusalemrü ramde ayükhi khiungde arü.
Jeremia Jikhi
4Kheakü Atungpuhnü I ki tha, 5“ Inü nü nuyam ching müthrünchokinü inü nü mükheahlah, tüsho nü müzübeyide inü nü müsühkhit; inü nü trükshihbo kilim wukihrü khülang thsüpü mokhit.”
6Judüki inü tha, “Ah, Atungpuh Thrünpuh ! Kheahang, inü küde athabanü mümükheah, tümüde I azürü nunu khülang ah.”
7Tüshe Atungpuhnü I ki tha, “‘ I azürü nunu khülang ah’ de dütha.” Tümüde inü nü sherü kilim yüshihbanü nü ayübah, tüsho inü tümüpürü nü ki thiyukhüm jihbanü nünü athabah. 8Arü dütre, tümüde nü kümpü I nü lung lah, Atungpuhnü thachoh.
9Judüki Atungpuhnü akhah chungkhit tüsho I mün qiu; tüsho Atungpuhnü I ki tha, “ Kheahang, inü I yubo nü mün ching yukjihdo. 10Kheahang, khihni inü nü trükshih tüsho kiulongthsübo kurungkheak arukkhitpü tüsho athomülünpü, athsümünimpü tüsho lahyuka bahpü, athsüpü tüsho akhimpü zojihchoh.”
Michih Mahne
11 Atungpuhnü I ki keokhi, “Jeremia, nünü tümü ngücho?” Tüsho inü tha, “ Inü almond sangkhah khülang ngüchoh.” 12Judüki Atungpuhnü I ki tha, “ Nünü tsüde ngüdo, tümüde I yu dünjipü rhimoa huhpü inü kheahde lah.” 13Atungpuhnü I ki thalo, “ Nünü tümüpürü ngücho?” Tüsho inü tha, “Phüh khülang amapde alakhi dukulim peangnü angübah ngüde ayükhi inü ngüchoh.”
14Judüki Atungpuhnü I ki tha: Lomi ching larü alala kheak dukulim peangnü thsümütsü zhikihde arübah. 15Tümüde kheakü inü dukulim kiulongthsü trükbo alala ki jichoh, Atungpuhnü tha; tüsho arü arübah tüsho arü alalanü Jirusalem chipiripitbo ki mükamde alakhi rhü alala kheak tüsho Juda kiutobo alala kheak kiulongthsü-binkiu zobah. 16Tüsho arünü I bahyukde mihbukmuyukkhi alala thsungkheak inü arü azhihde I mahkhapkhibo thabah; arünü jipürü thrünpuhbo ki rhümthüneabe taka kingaün, tüsho arü nihbuh khahnü arhimokhi ki kingaün. 17Tüshe nü, nü chim rümang; asürang tüsho inü nü ki thiyukhüm jihkhi alala arü ki thaang. Arü miki dütre jude yungsho inü nü arü miki treshihbah. 18Tüsho kheahang, khihni inü nü kilim chipi ayünkhi kiuto, yinchi dungjing, müwayinchi rhü, lomi alala azhihde– Juda kiulongthsürübo, yakzanshuhrübo, amükeamrübo tüsho lomi mihtsürü azhihde thsüjihdo. 19Arünü nü bede keochihbah; tüshe arünü nü mukuk, tümüde nü bekhitpü I nü lung lah, Atungpuhnü thachoh.
Currently Selected:
JEREMIA 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
