ISAIA 64
64
1O nünü yinmi chakashungbah akikhülaa, junangde awungbonü nü miki niukbah– 2monü sangkhah aniuchoki nangde tüsho monü ke amapshihchoki nangde–nü azhihrü ki nü mung mükheahshihpü, junangde trükshihbonü nü miki ajanbah! 3Küyimki nünü isanü mükkin mülakhi atrebe rhimokhea, nü aki, awungbonü nü miki ajan. 4Ahokhi lünbo ching shenü muso, she nükhünnü musokhit, api aleangrü thsungkheak shepünü rhimocho, nü hobah she müknü tümü Thrünpuh müngü. 5Asühde alungki rhimorü nü limrobo ching nü lümkhitrü nünü shoruchoh. Tüshe nü bukakhiukde alakheah, tüsho isanü neak yihbeak; hanangde isanü mutuklode rhimosho, küde thsah isa khümkhitba? 6Isa alala mümüsührü nangde kamdo, tüsho isa thiyurolungki rhimo alala amüneankhi khim nangde lah. Isa alala sangyü nangde kamshihchoh, tüsho isa amülimnü apung nangde isa yünde tsochoh. 7Nü mung jirü she müla, yungsho nü ramlopü mürangrü müla; tümüde nünü nü miro isa kheaknü jikabah, tüsho isa neak dünkheaknü isa bahyuk.
8Tütüshe, O Atungpuh , nü a isa Abuh; isa ju alo, tüsho nü isa phühdamrü; isa alala nü khah rhimo ah. 9Müshakde bukdakhiuk, O Atungpuh , tüsho lünnü amülim dülümkhit. Kheakü lümakheahang, isa alala nü mihtsürü. 10Nü amüsüh kiutobo sunglo kamdo, Zion ju sunglo kamdo, Jirusalem zhikrangkhündo lah. 11Isa yo amüsüh tüsho akheahakham arüngyam, küpü ching isa jipürünü nü mung shikhea, ju monü takabahdo, tüsho isa lopung atsübo athsümünimkhibo kamdo. 12Ha alala dunglim, nü tukloba de, O Atungpuh ? Nü zhikde alaba de, tüsho isa khitode thsümüchiba de?
Currently Selected:
ISAIA 64: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
