ISAIA 63
63
Thrünpuhnü Royimkhi
1“ Edom ching lakhi Bozra chingnü rung-khiungkhi khim yihbah arücho ju shepü a? Müretahkhinü züt thsübah, wu ato chingnü arücho ju shepü a?”
“Ha I, thiyuro-lungki ching asukchoh, akhümkhitpü wu lah.”
2“Tümü thsükhi nü züt thsükhibo mürümla, tüsho nü khimmihbo kurungaso-nitrü yo nangde la?”
3“ I langzünü kurungaso nitdo tüsho mihtsürü bolungnü sheshe I lung mülakheah; inü I bukakhiukkhi chingnü arü nit tüsho I bukmüshakkhi ching inü arü jung; akebo I khimmih kheak yükih, tüsho I züt alala pang. 4Tümüde royimkhi nimung I mulong ching lakheah, tüsho inü rhokhitpü kam arüdo. 5Inü kheah, tüshe arungrü she mülakhea; I müyinsah, tümüde I duhyitrü she mülakheah, jumonü I khahnü akuk ngükhi handarü, tüsho I bukakhiukkhinü I rung. 6I bukakhiukkhi ching inü mihtsürübo thrümthünak, I bukakhiukkhi ching inü arü zünak, tüsho inü arü rhangdung thiyih alomi kheak dungabah.”
Atungpuhnü Israel ki Tsükhi
7Inü Atungpuh mihmuzho rhimobo,
mung shipü thülünkhi Atungpuh rhimobo,
Atungpuhnü isa thsungkheak rhimokhi alala dünkheak,
tüsho Israel yamkhün kilim tode tsüdakkhi,
apinü anihbuh mihmüthsüm yande arü ki huhkhi,
api muzhodakkhi muzhomopung yande athabah.
8Tümüde apinü tha, “Tsükjide arübo I mihtsürü, amülim müthsüpü tsührübo”; tüsho api arü khümkhitrü kam. 9Arü lümthsünü alala ching api she lümthsünüde kam, yunirü khülangnü yung tüshe Atungpuhnü arü khümkhit; api muzho ching tüsho api khah-ching müyüzahkhinü arü bemusu tüsho awün nimungbo alala ching buh. 10Tüshe arünü azhih tüsho api memüsüh mulong rozhakshih; jumonü api ju arü riri kam; anihbuhnü arü azhihde keochih.
11Judüki apinü Mosa tüsho api mihtsürü awün nimungbo lümkhit; api namfimihnu neakrübonü bebah keto chingnü arü bekhitbuh küching la? Arü bolung memüsüh yukjihbuh küching la, 12api mung akheam mülakhi kamshihpü shepünü api müretahkhi khah Mosa khah tsülim tsahshihkhea, shepünü arü müngüh kebo chamnakkhea, 13shepünü asükbo hode arü bekhea? Loshelo ching khora nangde arü jing mümükhe. 14Jindükhün ching moshi yüzahkhi nangde, Atungpuh menü arü kilim sühakhim jih. Hanangde nü mung müretahpü thsungkheaknü nünü nü mihtsürü be.
Mihmüthsüm tüsho Arung Tamkhüntamnü
15Yinmi chingnü, nü yo amüsüh tüsho müretahkhi lapung chingnü abinkhia kheahang. Nü künkhi tüsho nü wu-sühmüh küching la? Nü amuzho tüsho nü lümrhihkhi thsü küching la? Arübo isa kheaknü tukloa lah. 16Tümüde nü isa abuh, Abrahamnü isa mümükheahkheah she tüsho Israelnü isa mümütsantsan she; nü, O Atungpuh , isa abuh lah; adüsonü isa Rhokhitbuh ju nü mung ah. 17Tümüde, O Atungpuh , nünü isa nü limro chingnü tsoshihcho tüsho isanü nü mütrepü thsüde isa mulong müküpshihcho? Nü yamlarübo mung chingnü, nü yamrüplurüp trükbo mung chingnü rholoang.
18Nü yo amüsüh mihtsürübonü anikhühkheak thsungkheak lakhitkukruk ludo; tüshe kheakü isa azhihrübonü nü arüngyam jungkheamdo. 19Isa ashangkhüh nünü yakzan mushuhkhi nangde, nü mungnü müjirü nangde lado.
Currently Selected:
ISAIA 63: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
