ISAIA 62
62
1Anihbe akuk ngükhi yapsu nangde mütahyi khiungde,
tüsho anihbe akhümkhit tsün nangde mütahyi khiungde,
Zion thsungkheaknü inü zhikde müla, tüsho Jirusalem thsungkheaknü inü sühakhim mulu.
2Trükshihbonü nü thiyuro-lungki
tüsho kiulongthsürü alalanü nü müretahkhi ngübah;
tüsho nü mung asonü ajibah, ju Atungpuh münnü ajibah.
3 Atungpuh khah ching nü akheahakham kuthran labah,
tüsho nü Thrünpuh khah ching kiulongthsü mürezhingzhing kuthran labah.
4Kheaküa nü Amihkhi de müji tüsho nü lomi Azhikkhi de müji;
tüshe I Asühkhi Anihbe kheak lah de nü ki jibah,
tüsho nü lomi rhangdo de ajibah;
tümüde Atungpuhnü nü kheak asühchoh tüsho nü lomi arhangbah.
5Athrününgtsüng khülangnü anünürü kheak yamkhün kamkhi nangde nü thrünrünü nü ki rhangbah,
tüsho yamkhün-kambuhnü yamkhün-kambe kheak asühachihkhi nangde,
nü Thrünpuhnü nü kheak asühachihbah.
6Nü rhübo kheak, O Jirusalem,
inü aheangrü zojihlah;
nimungroro tüsho tsüngreroro arünü zhikde müla.
Nüsa sherü Atungpuh ki lümkhitloshihbanü zhikde düla,
7tüsho Jirusalem mülaloyi khiungde tüsho alominü müshijihyi khiungde,
api sühakhim müjihbeah.
8 Atungpuhnü api khah tsülim tüsho Wuto khahnü thiyuchihchimdo:
Inü kheaküa nü hi nüsa riri jim thsüpü müjih,
tüsho nü khisahkhi chingnü khiungkerünü yukhu muyung;
9tüshe sherünü yimlubanü ju tsühbah tüsho Atungpuh mung shibah,
tüsho sherünü hanmukhungbanü I yo amüsüh yam ching ju yungbah.
10Hode yüang, chipiripitbo hode yüang,
mihtsürübo thsungkheak limro thsakhamang;
zünang, limtobo zünang, lungbo moa bahang,
mihtsürübo kurungkheak amütsan shuhkihang.
11 Atungpuhnü alomi akheam khiungde zhiyukdo:
Zion tsührübe ki thaang,
“ Kheahang, nü khümkhitbuh arado;
api thsambah anihbuh lung lah tüsho apinü bekhitrü api müngüh belah.”
12Arübo ki “Amüsüh Mihtsürü,
Atungpuhnü Rhokhitkhi” de ajibah;
tüsho nü ki “Ayimkhitkhi, Mübahyukkhi Kiuto” de ajibah.
Currently Selected:
ISAIA 62: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
