ISAIA 61
61
Abekhitkhi Thiyusheak Atsü
1Atungpuh T H RÜ NPU H me I kheak lah,
tümütüsho Atungpuhnü I zhochihrü kilim thiyusheak atsü thsangyupü mujude-mokhit;
mulong thsümünima larü thsüngushihpü,
aramrü kilim zuzu kuhi zhiyukpü,
tüsho ramyukrü dükheshihpü apinü I thiyi;
2 Atungpuh mulongkhi kam zhiyukpü,
tüsho isa Thrünpuh royimkhi nimung zhiyukpü;
tüzhode alarü alala shukheampü;
3Zion ching tüzhorü kilim jihchungpü,
arü kilim awah müthri sangbünlak jihpü,
tüzhopü müthri asühako müdangke,
müdüküngkhi me müthri mungshi khim.
Arübo ki thiyuro-lungki thülamdungbo de ajibah,
Atungpuhnü akhimkhi,
api müretah huhpü labah.
4Adüso thsümünimkhibo arünü athsülobah,
akhuhlim thsünimthsüshikhi arünü shuhmusulobah;
lün ahihdo ching thsümünimkhi kiuto arünü athsülobah.
5Jaksorübonü azhipbah tüsho nü mihnu boto yimkipbah,
khiungkerübonü nü lo kiubah tüsho nü yo kurungasolubo mupungbah;
6Tüshe nüsa Atungpuh amükeamrübo de ajibah,
isa Thrünpuh tankihrübo de nüsa jibah;
nüsanü trükshih lakhitbo tsühbah tüsho arü lakhitbo ching nü müretahbah.
7Tümütüsho arü khitode achih ngüdo,
tüsho akinashu mülakhi arü shihcham nangde zhiyuk,
jumonü arü shihcham alü thsüde alubah;
akheam mülakhi asühachihpü arü yo thsübah.
8Tümüde I Atungpuhnü thiyuro muzholah,
inü ahühara tüsho amülim rhimo thraneanlah;
inü thiyuronü arü kilim thsambah jihbah,
tüsho inü arü ki akheam mülakhi tangzüng khülang thsübah.
9Arü tsühsoniusobo trükshih bolung mükheahbah,
tüsho arü münübo mihtsürü bolung mükheahbah,
arü ngürü alalanü arübo ju Thrünpuhnü müngühjihkhi mihtsürü de amükheahbah.
10Inü Atungpuh lung tode asühachihbah,
I menü I Thrünpuh lung asühbah;
tümüde apinü akhümkhit khimmih I kheak phuyujih,
apinü thiyuro-lungki shulünkhimnü,
yamkhün-kambuhnü sangbün laknü züt thsükhi nangde,
tüsho arhangberünü zülubonü züt thsükhi nangde I muhiudojih.
11Tümüde alonü adübit chinshihkhi nangde,
tüsho ayündo ching yangkhi mukhuhkhi nangde,
junangde Atungpuh Thrünpuhnü thiyuro-lungki tüsho mungshi ju trükshih alala miki mukhuhshihbah.
Currently Selected:
ISAIA 61: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
