ISAIA 55
55
Thrünpuh Mihmüthsüm Jihkhi
1He, sherü kethürila,
ke ching arang;
tüsho nüsa sho mülarübo,
arang, luang tüsho tsühang!
Arang, yukhu tüsho niuhke adün müjihde luang.
2Tümüde nünü yikhap yungde püpü thsungkheak sho bahcho,
tüsho reangmükeampü thsungkheak nünü rhimocho?
Kümkangde I ki aniang, tüsho tümü atsüanü tsühang,
tüsho birikhi tsühyungpü ching nü me asühang.
3Nü nükhün muphoang, tüsho I kilim arang;
aniang, junangde nü labah.
Inü nü kheak akheam mülakhi tangzüng,
inü muzhodakkhi, David thsungkheak tsükjide muzhokhi labah.
4Kheahang, inü api ki mihtsürübo thiyumütsan thsüjihdo,
limberü khülang tüsho mihtsürübo thsungkheak limthorü lah.
5Kheahang, nünü mümükheahkhi trükshihbo nünü ajibah,
tüsho nü mümükheahkhi trükshihbonü,
Atungpuh , nü Thrünpuh, Israel Amüsüh Thrünpuh dünkheaknü nü kilim arübah;
tümüde apinü nü müretahshih.
6Api ngüpü lachoki Atungpuh yimang,
api thüninde lachoki api ki jiang;
7mihbukmuyuknü arü limro tüsho thiyuro mülarünü arü lümkhi bahyukshang;
arünü Atungpuh kilim rholoshang,
junangde apinü arü kheak mihmüthsüm labah,
tüsho isa Thrünpuh kilim rholoshang,
tümüde apinü suhdahde neak bahjihbah.
8Tümüde I lümkhibo ju nü lümkhibo yung,
yungsho nü limrobo ju I limrobo yung,
Atungpuhnü thachoh.
9Tümüde yinmibo ju alomi kheaknü achangbe,
junangde I limrobo ju nü limrobo kheaknü achangbe tüsho I lümkhibo ju nü lümkhi kheaknü achangbe.
10Tümüde tsüng tüsho phürüm thüning chingnü akichoh,
tüsho alo müpangyi khiungde ju ching müyükihlo,
bemusushihde tüsho mukhuhshihde,
müjih-hiurü kilim müjih jihde tüsho atsührü kilim yikhap jihde,
11junangde I mün ching I yu wukhiukbah;
I kilim akeangkeang malodarü tüshe I lümkhi akuk ngübah,
tüsho inü thiyikhi ching kukzambah.
12Tümüde nü asühachihkhi ching wukhiukbah,
tüsho mungtsü ching belodarübah;
nü müngüh lakhi awungbo tüsho amujukbonü khün thsüde alanbah,
tüsho thulu ching sangbo alalanü khah dambah.
13Ayang müthri saipress sang asürübah;
khingphu müthri martel sang asürübah;
tüsho ha Atungpuh kilim mümihkhi khülang labah,
tümüde akheam mülakhi amütsan khülang müdükheakshih.
Currently Selected:
ISAIA 55: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
