ISAIA 54
54
Israel thsungkheak Atungpuh Amuzho
1Khün thsang, O bünkeang-berü;
khün thsang, tüsho zhiang,
nü khungarü müzübebe!
Tümüde arhangrü tsührü kheaknü bahyuka lakhi tsührü ahihbe labah, Atungpuhnü thachoh.
2Nü khimyam lopung jashang
tüsho nü lapung zhindokhibo thoshangang;
düzünglo; nü liu shangshang tüsho ashungdung düküngshang.
3Tümüde nü tsülim tüsho huzulim bude ayübah,
tüsho nü tsühsoniusobonü trükshihbo lubah tüsho abahkhitkhi kiutobo ching labah.
4Dütre, tümüde nü achih müngü;
mulong dünini, tümüde nü achih ngüde müküpkhuk;
nü athunu achihahean nünü amihbah,
tüsho nü khimokhi achihahean nünü mülümkhitlo.
5Tümüde nü Thrünrü ju nü yamkhünbuh lah,
Wuto Atungpuh ju api mung lah;
Israel Amüsüh Thrünpuh ju nü Rhokhitrü,
api alomi athrünkhi Thrünpuh de jichoh.
6Tümüde Atungpuhnü nü abahyukkhi tüsho me ching tüzhokhi liberü nangde jikheah,
athunu mihtsürü niuberü bahyukkhi nangde,
nü Thrünpuhnü thachoh.
7Kim anükhüh thsungkheak inü nü bahyuk,
tüshe amuzhokhi atonü inü nü bea lubah.
8Kim khülang thsungkheak bukakhiukkhinü I miro nü kheaknü jik tüshe akheam mülakhi amuzhonü inü nü kheak amuzho labah,
Atungpuh , nü Rhokhitbuhnü thachoh.
9Ha I ki Noa nimungbo nangde lah:
Inü thiyuchihchimkhi nangde Noa kebo küyimkishe alomi kheak müyü,
junangde nü kheak bukmakhiuk tüsho nü müthürüh de inü thiyuchihchim.
10Tümüde awungbo tsopü tüsho awung mujukbo lah-a bahpü kuklah,
tüshe I muzhodakkhi nü kheaknü müchamachih,
tüsho I mungtsü tangzüngkhi makhin,
nü kheak muzhokhi Atungpuhnü thachoh.
Jirusalem Arübe-kuhi
11O thsünükhi, chinthrüm-yünkhi, tüsho mushukheamkhi,
inü nü khimtanbo shotolungbonü akhimbah,
12inü aheangsadam amo-achaknü,
chipiripitbo mürelungnü tüsho nü rhübo alala shotolungbonü athsüjihbah.
13Nü tsührü alala Atungpuhnü thsangyubah,
tüsho nü tsührü mungtsü tüsho latsühlayung labah.
14Thiyuro-lungki ching nü rünkihbah;
nü junopü chingnü limshude alabah,
tümüde nü mütrede alabah,
tüsho atrebe müla, tümüde ju nü phünide marü.
15Khürünü nü zündosho, ju I kilimnü yung;
sherünü nü zündobanü nü hode alungbah.
16Kheahang, yingkingrü inü athrünkheah,
shepünü mokhih yüntrucho tüsho yihnüpü thsüde thsühnuk kingkhitcho;
alaksahpü thsüde athsümünimrü she inü thrün.
17Nü azhihde athsükhi thsühnuk tümü she mütsüp,
tüsho mahkhap ching nü azhihde athakhi yubo alala nünü alokhukbah.
Ha Atungpuh yamlarü yamrüplurüp tüsho I kilimnü arü thiyuro-mütsan lah,
Atungpuhnü thachoh.
Currently Selected:
ISAIA 54: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
