ISAIA 53
53
1Isa yusheak shepünü akinkhea?
Tüsho shepü ki Atungpuh khah akhiukkhea?
2Tümüde api müngüh api sangji nangde asürü,
tüsho alo akung ching yo sangying nangde;
isanü api kheak kheahpü thsüde api trungdung yungsho wüntre-müretah müla,
api jakphü ching isanü api mürühpü thsüde tümü müla.
3Api ju mihtsürübonü mükhemükim tüsho bahyuk;
mulong tukthsü mihtsürü tüsho thsünümih lakheah;
tüshe mihtsürübonü api kheaknü miro ramabah,
api mükhemükim thsü, tüsho isanü api mükheyuk.
4Tsükjide apinü isa thsünü arümdo tüsho isa tukthsü hando;
tütüshe api a Thrünpuhnü ashikkhi,
tüsho thsünüshihkhi nangde isanü lüm.
5Tüshe isanü alakmihkhi thsungkheak api yuri,
isa amülimbo thsungkheak zünak;
api kheak thsümüchi hode isa khiukde kamshih,
tüsho api mübo hode isa ngushih.
6Isa alala namfimihnunubo nangde tsophülapdo;
isa alala nihbuh limro rholodo,
tüsho Atungpuhnü isa alala mülimkhibo api kheak zojih.
7Api ajunokheah, tüsho api thsümüchido tütüshe apinü amün mükhimshuh;
namfimihnunu alaksahpü bede ayükhi nangde,
tüsho namfimihnunu khülang anam rhiprü miki zhikde alakhi nangde,
apinü amün mükhimshuh.
8Thsümüchide tüsho mahkhapde api bede tso.
Shepünü api arübe-kuhi lümakheah-a laba?
Tümüde rhangdung lakhi lomi chingnü api dükheakshih,
I mihtsürünü alakmihkhi dün shik.
9Apinü thiyih mubuka lalashe tüsho amün ching akeangyu mülalashe,
Arünü api mibahpung ju mihbukmuyuk lung thsü tüsho api kiuyuk alarü lung thsü.
10Tütüshe api thsünüde azünakpü ju Atungpuh lümkhi lakheah.
Küyimki nünü api rhangdung neak dün kingaün jihbanü,
apinü anihbuh tsührü ngübah tüsho api nimungbo thoshangbah;
api hode Atungpuh lümkhi akuk ngübah.
11Api thsünükhi chingnü apinü ayin ngübah;
api mükheahmudu hode api reangkeam ngübah.
Thiyuro-lungki labuh, I yamlarünü ahihdo thiyuro-lungki kamshihbah tüsho apinü arü mülimkhibo hanbah.
12Jumonü inü ato bolung api ki shihcham jihbah tüsho sühmüh lakhi lung api
ayankhikhi-kukruk chama jihbah;
tümütüsho apinü anihbuh langzünü she tüsho alakmihrü lung kheyuk;
tütüshe apinü ahihdo neak han tüsho alakmihrü thsungkheak tamkhüntamnü.
Currently Selected:
ISAIA 53: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
