EZEKIEL 48
48
Lomi Chamnakkhi
1Trükbo mung ju harü ah: dukulim aredungyeannü tankihbah, Hethlon limro kheak, Lebo-hamath chingnü Hazar-enon khiungde (Damaska aredungyean, dukulim Hamath la), tüsho aniakhiuklim thripnü aniyüzahlim khiungde, Dan kilim shihcham khülang. 2Aniakhiuklimnü aniyüzahlim khiungde, Dan lomi arede, Asher shihcham khülang. 3Aniakhiuklimnü aniyüzahlim khiungde, Asher lomi arede Naphtali shihcham khülang. 4Aniakhiuklimnü aniyüzahlim khiungde, Naphtali lomi arede, Manase shihcham khülang. 5Aniakhiuklimnü aniyüzahlim khiungde, Manase lomi arede, Ephraim shihcham khülang. 6Aniakhiuklimnü aniyüzahlim khiungde, Ephraim lomi arede, Reuben shihcham khülang. 7Aniakhiuklimnü aniyüzahlim khiungde, Reuben lomi arede, Juda shihcham khülang.
8Aniakhiuklimnü aniyüzahlim khiungde, Juda lomi arede nünü shuhmuwuh-a zopü shihcham ju atolim khahnap 25,000, tüsho ayunglim trük khülang kilim shihchambo jihkhi khiukde, aniakhiuklimnü aniyüzahlim khiungde, aphulung ching arüngakopung labah. 9Nünü Atungpuh thsungkheak shuhmuwuh-a zopü shihcham ju ayunglim khahnap 25,000, tüsho atolim khahnap 10,000, 10Harü ha amüsüh shihcham jihkhibo labah: dukulim thrip amükeamrü jihpü ju khahnap 25,000 labah, aniyüzahlim thrip atolim khahnap 10,000, aniakhiuklim thrip atolim khahnap 10,000, tüsho düjinglim thrip ayunglim khahnap 25,000, ju aphulung ching Atungpuh arüngakopung labah. 11Ha Levi trük khürü Israel mihtsürü tsophülapchoki, I yukhüm zokhi, Zadok tsühsoniusobo atsangkhitkhi amükeamrübo thsungkheak labah. 12Ha amüsüh lomi shihcham chingnü büthsüde arü shihcham labah, khide amüsüh dangpung, Levirü lomi arede alabah. 13Amükeamrü yande, Levirü shihcham ju ayunglim khahnap 25,000 tüsho atolim 10,000 labah. Ayunglim alalanü khahnap 25,000 tüsho atolim 10,000 labah. 14Arünü ju müyin yungsho mümüthriachih; arünü ha amokhitkhi lomi makhin, tümüde ha Atungpuh kilim amüsüh lah.
15Aningkhi, atolim khahnap 5000 tüsho ayunglim 25,000 ju kiuto thsungkheaknü yihnüpü, lapungbo thsungkheak tüsho mükeak labah. Ju aphulung ching kiuto labah; 16tüsho akekhibo harü labah: Dukulim thrip khahnap 4500, düjinglim thrip 4500, aniakhiuklim 4500, tüsho aniyüzahlim 4500. 17Kiuto ju mükeak labah: Dukulim khahnap 250, düjinglim 250, aniakhiuklim 250, aniyüzahlim 250. 18Amüsüh shihcham yande aningkhi ayunglim ju aniakhiuklim khahnap 10,000, tüsho aniyüzahlim 10,000 labah. Ju chingnü akhiukkhi ju kiuto ching rhimorü thsungkheak tsühyungpü labah. 19Kiuto ching rhimorü, Israel trük alala chingnü ju thulu thsübah. 20Nünü shuhmuwuh-a zopü shihcham abümnü khahnap 25,000 rukhüh labah, ju kiuto lakhit kukruk lungnü amüsüh shihcham labah.
21Amüsüh shihcham thrip abande aninga lakhi tüsho kiuto lakhit kukruk ju kiulongthsüpuh yo thsübah. Amüsüh shihcham khahnap 25,000 chingnü aniakhiuklim aredungyean khiungde, tüsho aniyüzahlim aredungyean lim khahnap 25,000, trük shihcham arihde, ha kiulongthsüpuh yo thsübah. Amüsüh shihcham aphulung ching arüngyam amüsüh dangpung bede, 22tüsho Levirü le kiuto lakhit kukruk ju kiulongthsüpuh yo phulung ching labah. Kiulongthsüpuh shihcham ju Juda lomi tüsho Benjamin lomi dükeak labah.
23Aningkhi trükbo thsungkheak: aniakhiuklimnü aniyüzahlim, Benjamin shihcham khülang, 24aniakhiuklimnü aniyüzahlim, Benjamin lomi arede, Simeon shihcham khülang. 25Aniakhiuklimnü aniyüzahlim, Simeon lomi arede, Issakar shihcham khülang. 26Aniakhiuklimnü aniyüzahlim, Issakar lomi arede, Zebulun shihcham khülang. 27Aniakhiuklimnü aniyüzahlim, Zebulun lomi arede, Gad shihcham khülang. 28Tüsho düjinglim Gad lomi arede, aredung ju Tamar kheaknü Meribath-kadesh kebo khiungbah, ju chingnü Ijip ayung yeande Ato Keto ching yübah. 29Ha nünü Israel trük bolung yamrüplurüp nangde chama jihpü lomi ah, tüsho harü ha arü shihchambo lah, Atungpuh Thrünpuhnü thachoh.
Kiuto Chipiripitbo
30Harü ha kiuto chipiripitbo labah: Dukulim peang, akekhi khahnap 4500, 31Chipiripit mahsam, Reuben chipiripit, Juda chipiripit, tüsho Levi chipiripit, kiuto chipiripitbo Israel trük mungnü jia labah. 32Aniakhiuklim peang, khahnap 4500, chipiripit mahsam, Josep chipiripit, Benjamin chipiripit, tüsho Dan chipiripit. 33Düjinglim peang, akekhi khahnap 4500, chipiripit mahsam, Simeon chipiripit, Issakar chipiripit, tüsho Zebulun chipiripit labah. 34Aniyüzahlim peang, khahnap 4500, chipiripit mahsam, Gad chipiripit, Asher chipiripit, tüsho Naphtali chipiripit labah. 35Kiuto mükamkhi ju khahnap 18,000 labah. Tüsho ju kimnü ründe kiuto mung ju, “Atungpuh Ju Ching Lah” de alabah.
Currently Selected:
EZEKIEL 48: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
