DANIEL 1
1
DANIEL TÜSHO APIMÜYAMRÜBO YUKHEAN
(1.1—6.28)
Nebukednezar Mahkhappung ching Athrününgtsüngbo
1Juda kiulongthsüpuh Jehoiakim kiulongthsü kam asampü ching Babilon kiulongthsüpuh Nebukednezarnü Jirusalem ching arü tüsho ju yanabah. 2Atungpuhnü Juda kiulongthsüpuh Jehoiakim tüsho Thrünpuh yam ching yo pungphuru khürü api khah ching jih. Apinü harü Shinar lomi ching handarü, tüsho pungphurubo ju api thrünpuhbo rahpung-yam ching zo.
3Judüki kiulongthsüpuhnü api yam putungrü Ashpenaz ki Israelrü khürü kiulongthsü yamkhün tüsho mükheahmudurü chingnü bedarüpü thiyukhüm jih– 4athrününgtsüng mihtsürü shihphü ching areak mülarü tüsho trungdung atsü, lümlung ching thsambah larü, mükheahmudu lakhi tüsho nahde anikhitrü, kiulongthsüpuh yam ching tankihpü athülün; arü ki Kaldearü yuthrüt tüsho yutha thsangyupü lakheah. 5Kiulongthsüpuhnü arü kilim kiulongthsürü jim tüsho yukhu nimung aban shihcham jih. Arü ju kam mahsam mükheahmudushihbah, junangde ju kim akheam ching kiulongthsüpuh miki tankihpü lakheah. 6Arü bolung ju Juda trük chingnü Daniel, Hanania, Mishael, tüsho Azaria lakheah. 7Akubeatobuhnü arü kilim püpü mung asobo jijih: apinü Daniel ki Belteshazzar de ji, Hanania ki Shadrak, Mishael ki Meshak, tüsho Azaria ki Abednego de ji.
8Tüsho Danielnü kiulongthsü jim tüsho yukhu hode anihbuh mümüneanpü lümalo; jumonü apinü anihbuh mümüneanshihpü akubeatobuh ki keokhi. 9Kheakü Thrünpuhnü akubeatobuh ki Daniel lümrhihshihpü jih. 10Akubeatobuhnü Daniel ki tha, “ Inü I tungpuh kiulongthsüpuh trelah; kiulongthsüpuhnü nü kilim atsühpü tüsho ayungpü akhua jihdo, tüsho nü thülünrü püpürü athrününgtsüng kheaknü nü müthülünde apinü ngüsho, apinü I laksahbah.”
11Judüki Daniel, Hanania, Mishael, tüsho Azaria kurungkheak akubeatobuhnü mokhitkhi aheangbuh ki Danielnü tha: 12“Muzhobah nü yamlarübo nimung thürü rükakiang. Isa kilim atsühpü awophüyak tüsho ayungpü ke jihang. 13Jushu nünü kiulongthsü jim tsührü püpürü athrününgtsüng shihphü ki isa shihphü akeakheahang, tüsho nünü akheahkhitkhi yande nü yamlarübo ki rhimoang.” 14Jumonü apinü ha lümkhi mulongkhit tüsho nimung thürü thsungkheak arübo rükaki. 15Nimung thürü akheam ching arübo ju kiulongthsü jim tsührü athrününgtsüngbo alala kheaknü shihphü atsü tüsho shihkihde kheahkhit. 16Jumonü aheangbuhnü arünü atsühyungbe kiulongthsü jim tüsho yukhu lulo, tüsho arü kilim wokephüyakbo jih. 17Harü athrününgtsüng phüyi kilim Thrünpuhnü mükheahmudu tüsho yuthrüt alala ching ayeanzam tüsho lümlung jih; Daniel she michihbo tüsho milimbo alala ching anikhitkhi lakheah.
18Nimung akheam ching küyimki kiulongthsüpuhnü arü bede azahpü thakhea, akubeatobuhnü Nebukednezar miki arü bede yüzah. 19Judüki kiulongthsüpuhnü arü ki asuk tüsho arü alala bolung Daniel, Hanania, Mishael, tüsho Azaria kheak akede sheshe müngükhit; jumonü arübo ju kiulongthsüpuh miki tankih. 20Lümlungbo tüsho anikhitkhi ching kiulongthsüpuhnü arü ki keokhikhi lüpdükhi ching apinü arübo api kiulongthsü athrünkhi ching kuhikheahrü tüsho wurük-huhrü alala kheaknü thürü kinü atsübe kheahkhit. 21Tüsho Sairus kiulongthsüpuh akhuhbe kam khiungde Daniel ju ching lakheah.
Currently Selected:
DANIEL 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
