EZEKIEL 47
47
Arüngyam chingnü Yungzü Bukkhi
1Jushu apinü I arüngyam ripit ki belodarü; arüngyam ching düküyukpung khüpnü ke bukde aniakhiuklim yüde alakheah (tümüde arüngyam ju aniakhiuklim abin); ke ju kingaün sadam düjinglim, arüngyam düjinglim thrip khüpnü bukde aki. 2Jushu apinü I dukulim chipiripit limronü bede wukhiuk, tüsho aniakhiuklim abinkhi aleangbe chipiripit aleanglim mükamde be; tüsho ke ju düjinglim bukkhitde alakheah.
3Api khah ching akesang shuhbah aniakhiuklim yüchoki, mihtsürü junü khahnap 1000 ake, tüsho I ju ke hode bede yü; tüsho ju lahzhi lokhüh sükde alakheah. 4Kheaküshe apinü 1000 ake, tüsho I ke hode bede yü; tüsho ju mukhuk lokhüh sükde alakheah. Kheaküshe apinü 1000 ake, tüsho I ke hode bede yü; tüsho ju chim khiungde akih. 5Kheaküshe apinü 1000 ake, tüsho ju inü müdükihhokhukpü thsüde ayung khülang lakheah, tümüde ke ju yükih; ha aphungpü khide sükde, müdükihhokhukpü thsüde ayung khülang lakheah. 6Apinü I ki tha, “Mihtsürü tsührü, nünü ha ngüdü shi?”
Jushu apinü I ayung münküp yeande belodarü. 7I alode arüchoki, ayung khülang münküp kheak thripkhüh tüsho püpü thrip sangdung ahihdo inü ngü. 8Apinü I ki tha, “Ha ke aniakhiuklim bukde yüchoh tüsho Araba lim yükichoh; tüsho küyimki ha amubukkhi keto ching yüzahbanü, ke ju aso kambah. 9Ayung kürü ching yübanü, abükhi lorilokobo rhangdung labah, tüsho ju ching ha kebo khiungsho thüngüh hihde alabah. Ha aso kambah; tüsho ayung kürü ching yübanü, lüpdükhi rhangdung labah. 10Mihtsürübonü keto yean Engedi kheaknü Engelaim khiungde thüngüh ramde azhipbah; ju keang jippü dangpung khülang labah; thüngüh ju Keto Ato ngüh nangde atoto aphuaphu ahihdo labah. 11Tüshe alomukmukbo tüsho akhimniuhniuhbo aso kamde mütsangkhit; jurübo thimi thsungkheak aninga labah. 12Ayung münküp thrip abande, tsühyungpü thsungkheak sangdung aphuaphu mukhuhbah. Ayübo muyiuh yungsho asobo mayo, tüshe khinu abande aphüyak asobah, tümütüsho arü thsungkheak arüngakopung chingnü ke bukchoh. Sangasobo ju tsühyungpü thsungkheak labah, tüsho ayübo ju moli labah.”
Lomi Aredungbo
13Atungpuh Thrünpuhnü ha thachoh: Harü ha Israel trük thürükheak mahne bolung nünü lomi yamrüplurüp champü aredungbo lah. Josep a dangpung mahne labah. 14Nünü ju arihkhühnü achambah; inü ha nüsa jipürü kilim jihpü thiyuchihchim, tüsho ha lomi ju nü yamrüplurüp thsübah.
15Ha lomi aredung labah: Dukulim Ato Keto chingnü Hethlon limro yande Lebo-hamath, tüsho Zedad khiungde, 16Berotha, Sibraim (küpü Damaska tüsho Hamath aredungyean la), Hauran aredungyean kheak lakhi Hazar-hattikon khiungde. 17Junangde aredung ju keto chingnü Hazar-enon khiungbah; ha dukulim Damaska aredungyean, Hamath lah. Ha dukulim thrip labah.
18Aniakhiuklim ju Hauran tüsho Damaska dükeak labah; Gilead tüsho Israel lomi dükeak Jordan yeande alabah; aniakhiuklim keto tüsho Tamar khiungbah. Ha aniakhiuklim thrip labah.
19Düjinglim thrip Tamar chingnü Meribath-kadesh kebo khiungbah, ju chingnü Ijip ayung yeande Ato Keto khiungbah. Ha düjinglim thrip labah.
20Aniyüzahlim thrip, Lebo-hamath mikhuh kheak Ato Keto ju aredung labah. Ha aniyüzahlim thrip labah.
21Jumonü nünü nüsa bolung Israel trükbo yande ha lomi chamnakbah. 22Nünü ha nüsa thsungkheak tüsho nüsa lung larü khiungkerü nüsa bolung tsührü larü thsungkheak yamrüplurüp khülang nangde chama jihbah. Arünü nü lung Israel mihkhung nangde alabah, nü lung arübo kilim Israel trük bolung yamrüplurüp jihbah. 23Sherü trük ching khiungkerü lanü, ju ching nünü arü kilim arü yamrüplurüp jihbah, Atungpuh Thrünpuhnü thachoh.
Currently Selected:
EZEKIEL 47: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
