EZEKIEL 43
43
Arüngyam lim Atungpuh Arülokhi
1Jushu apinü I aniakhiuklim abinkhi chipiripit lim bedarü. 2Tüsho ju ching Israel Thrünpuh müretahkhi ju aniakhiuklimnü arüde alakheah; düsheak ju keto ato düsheak nangde alakheah; tüsho api müretahkhinü alomi tah. 3Inü angükhi michih ju apinü kiuto thsümünimpü arüchoki inü Kebar Ayung ki ngükhi michih nangde alakheah; tüsho inü I miro mükhüm. 4Aniakhiuklim abinkhi chipiripit chingnü Atungpuh müretahkhi arüngyam ching azahshu, 5menü I shuhkih, tüsho alungbe khikzhakpung ching I bede yüzah; tüsho Atungpuh müretahkhinü arüngyam mide kam.
6Mihtsürü ju I rheang ki zhipde lachoki, Atungpuhnü arüngyam chingnü I ki asukkhi inü so. 7Apinü I ki tha: Mihtsürü tsührü, ha I Israel bolung lünnü alapü lakhi I kiulongthsü-binkiu zopung tüsho I jinglung dubopung. Israel yamkhünnü kheaküa arünü yungsho arü kiulongthsürübonü, arü yüliyürakhinü, tüsho arü kiulongthsürübo shechoki asheminü I mung amüsüh mümüneanjih. 8Küyimki arünü arü düküyukpung ju I düküyukpung ki zokhea tüsho arü ripitbo I ripit dung ki I le arü dükeak rhü khülangnü lang arebahle azokhea, arünü ayihbeakkhi athraneanbenü arünü I mung amüsüh müneanjihde alakheah; jumonü I bukakhiukkhi ching inü arü muyukheah. 9Kheakü arünü arü sangthsü kingaünkhibo tüsho arü kiulongthsürü ashemibo I kheaknü limshude bahshang, tüsho inü arü bolung lünnü alabah.
10Mihtsürü tsührü, nünü Israelrü ki arüngyam dünkheak thaang, tüsho arünü ha lümshang; tüsho arünü arü mülimkhibo dünkheak achih ngüshang. 11Küyimki arünü arhimokhi alala dünkheak arü achih ngübanü, arüngyam lümkhi tsangshukhi, ripitbo tüsho düküyukpung, tüsho kilüm alala–thiyuzüng alala, lümkhi athrünkhi tüsho yakzan alala arü ki mükheahshang; tüsho ju arü mük ki thrütang, junangde arünü angükhitbah tüsho lümkhi athrünkhi tüsho thiyuzüng alala arünü ayanbah. 12Ha arüngyam yakzan ah. Müzüng mujuk kheak lomi athrünkhi mükamphülapde khide amüsüh labah. Ha arüngyam yakzan ah.
Kingaün Sadam
13Khahnapnü akekhi kingaün sadam ju harü lakheah: ajingbo lim achangkhi khahnap 1, tüsho atolim khahnap 1, amünkheam mükamde müyikhüh tokhi phuhpho khülang. Kingaün sadam achanglim ha labah: 14Alo kheak ajingbo kheaknü abobe kipdam khiungde khahnap 2; kipdam atolim khahnap 1; kipdam aninibe kheaknü kipdam atobe khiungde khahnap 4; tüsho kipdam atolim khahnap 1; 15tüsho kingaün sadam mokin khahnap 4; tüsho kingaün sadam mokin kheaknü akulim duhkihkhi ajuh phüyi. 16Kingaün sadam mokin thrip phüyi arihkhühnü, ashanglim khahnap 12 tüsho atolim khahnap 12 labah. 17Kipdam she arihkhühnü ashanglim khahnap 14 tüsho atolim khahnap 14 labah, ju mükamde phuhpho khahnap chamkhüh, tüsho ajingbo lim mükamde khahnap 1. Leak-dukkhibo ju aniakhiuklim abin.
Kingaün Sadam Müsühkhitkhi
18Judüki apinü I ki tha: Mihtsürü tsührü, Atungpuh Thrünpuhnü ha thachoh: Harü ha kingaün sadam thsungkheak thiyuzüngbo lah: Ju kheaknü taka kingaünpü tüsho ju kheak thiyih rhakkihpü ha lahmusu nimung, 19Zadok yamkhün Levirü amükeamrübo I tankihpü I phünide arürü kilim neak kingaünpü thsungkheak moshipung khülang nünü jihang, Atungpuh Thrünpuhnü thachoh. 20Tüsho nünü athiyih khürü lubah, tüsho kingaün sadam juh phüyi kheak kipdam mühit phüyi kheak, tüsho phuhpho alala mükamde ayihkihbah; hanangde nünü ju müsühkhitbah tüsho ju thsungkheak dünthsükhibah. 21Kheaküshe neak kingaün thsungkheak nünü moshi 1 lubah, tüsho ju arüngyam akhukhitkhi dangpung, amüsüh dangpung wungdonü atakbah.
22Mahnepü nimung nünü neak kingaün thsungkheak lapha mükihkhi mihnu pung 1 jihang; tüsho moshipungnü müsühkhitkhi nangde, kingaün sadam müsühkhitbah. 23Küyimki nünü ju müsühkhitkhi banbanü, nünü lapha mükihkhi moshipung 1 tüsho mihnu bolungnü lapha mükihkhi namfimihnupung 1 jihbah. 24Nünü jurü Atungpuh miki jihbah, tüsho amükeamrübonü jurü kheak thimi sukbah tüsho Atungpuh kilim taka kingaünbah. 25Neak kingaün thsungkheak nimung thüne nünü nimung abande mihnu khülang jihbah; kheaküshe moshipung khülang tüsho mihnu bolungnü namfimihnupung khülang lapha mükihkhi jihbeah. 26Arünü nimung thüne kingaün sadam thsungkheak dünthsükhibah tüsho ju tsangkhitde müsühkhitbah. 27Küyimki harü nimungbo hobanü, nimung tizheah ninü rünbah amükeamrübonü nü yo taka kingaünbo tüsho mungtsü kingaün sadam kheak jihbah; tüsho inü nü leangkhibah, Atungpuh Thrünpuhnü thachoh.
Currently Selected:
EZEKIEL 43: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
