EZEKIEL 44
44
Kiulongthsürü, Levirü, Amükeamrü
1Judüki apinü I aleangbe arüngakopung chipiripit, aniakhiuklim abinkhi ki belodarü; tüsho ju rihdoa lakheah. 2Atungpuhnü I ki tha: Ha chipiripit rihdoa labah; ha mükhimshuh, tüsho shenü she ha hode müyüzah; tümüde Atungpuh , Israel Thrünpuh ha chingnü yüzahdo; jumonü ha rihdoa labah. 3Kiulongthsüpuhnü lang Atungpuh miki tsühyungbe tsühpü yüzahpü kuklah; apinü chipiripit mükü limronü ayüzahbah tüsho ju limronü awukhiukbah.
4Jushu apinü I dukulim chipiripit limronü arüngyam mikhuh bedarü; tüsho inü kheah, tüsho kheahang! Atungpuh müretahkhinü Atungpuh arüngyam mia lakheah; tüsho inü I miro mükhüm. 5Atungpuhnü I ki tha: Mihtsürü tsührü tsüde mütsanang, phünide kheahang, tüsho Atungpuh arüngyam yuzüngbo tüsho yakzanbo alala dünkheak inü nü ki thapü lakhi alala nükhün yukde aniang; tüsho arüngyam ching azahrü tüsho arüngakopung chingnü awukhiukrü tsüde mütsanang. 6Kheakü azhihrü Israel yamkhün ki thaang, Atungpuh Thrünpuhnü ha thachoh: O Israel yamkhün, nüsa athraneanbe rhimokhi akheam thsüang! 7Nüsanü athraneanbe rhimokhi lungnü nüsanü mulong tüsho shih tsütamübahkhi khiungkerü I arüngyam ching beyukde nüsanü tsühyungpü, amüdang tüsho athiyih jihchoki I arüngyam müneanjih tüsho nüsanü I ki tangzüngkhi thsümünim. 8Tüsho nüsanü amüsüh kingaün jihpü mürhimo; tüshe nüsanü nüsa thsung thsüde I yo arüngyam ching rhimoshihpü khiungkerübo ki jih.
9Atungpuh Thrünpuhnü ha thachoh: Israelrü bolung lakhi khiungkerübo mulong tüsho shih tsütamübahrü sheshe I arüngakopung ching müyüzah. 10Tüshe Levirübo sherünü I kheaknü limshude chamkhibah Israelrü lung arü sangthsübo dunglim yüa lanü, arünü arü amülim hanbah. 11Arünü arüngyam chipiripit neakde I arüngyam ching tankihpü kuklah; arünü taka kingaünbe tüsho mihtsürübo thsungkheak laksah-a kingaünbebo laksahpü mihtsürübo miki zhippü tüsho arü tankihpü kuklah. 12Tüshe arünü Israelrü thsungkheak sangthsübo miki arüngako thsü tüsho arü yamkhün amülim ching jing mükheshih, jumonü arünü arü thsümüchi hanbah de arü dünkheak inü thiyuchihchimchoh, Atungpuh Thrünpuhnü thachoh. 13Arünü amükeamrü thsüde tankihpü I thüninde marü, yungsho khide amüsüh I yo kingaünbo khürü phünide marü; tüshe arünü ayihbeakkhi athraneanbebo achih hanbah. 14Tütüshe arüngyam rhimobo tüsho ju ching rhimobe alala ching arü ki rhimo jihbah.
15Tüshe Levirü amükeamrübo Zadok tsühsoniusobo, Israel mihtsürübo tsophülapchoki, sherünü I yo arüngakopung neakchonü, I tankihpü I thüninde arübah; tüsho arünü amüdang tüsho athiyih jihpü I ki zhipbah, Atungpuh Thrünpuhnü thachoh. 16I yo arüngakopung ching azahpü, I dükhüm ki I tankihpü arüpü ju arü labah, tüsho arünü I kingaün mukhung bebah. 17Küyimki arünü alungbe khikzhakpung ripitbo ching yüzahbanü, arünü khimthünak yihbah; arünü alungbe khikzhakpung ripitbo tüsho ju ching I tankihchoki arü kheak shihnamkhim müyih. 18Arünü arü ku kheak kuhingbe athünak tüsho arü chim kheak alungbe-khim thünak lubah; shoke shube tümü she arünü arü kheak mürümkih. 19Küyimki arünü mihtsürübo kilim aleangbe khikzhakpung ching wukhiukbanü, arünü tankihpung ching khimthünak arünü ayihkhitbah, tüsho jurü ju amüsüh khiungshakbo ching zobah; tüsho arünü püpü khimmih yihbah, junangde arünü amüsüh-khim yihbah mihtsürübo müsühkhitde mükamshih. 20Arünü arü kuyü mühüt yungsho ashang she müshangshih; arünü arü kuyü atsükheaknü awobah. 21Amükeamrünü khikzhakpung alungbe ching yüzahchoki yukhu muyung. 22Arünü khimoberü yungsho abahkhi liberü mulu tüshe Israel yamkhün chingnü atsangkhit yungsho amükeamrü niuberü lang alubah. 23Arünü I mihtsürü ki amüsüh tüsho amümüsüh dükeak thsangyubah, tüsho künangde amümüsüh tüsho amüsüh dükeak mütsanmükhibanü arü ki huhbah. 24Atsangachihkhi ching arünü mahkhaprü nangde arhimobah, tüsho I mahkhapkhi yande arünü khapzhakbah. Akhukhitkhi I yo thüniobo dünkheak arünü I yakzanbo tüsho I yuzüngbo alala zobah, tüsho arünü I yo amunibo müsühde azobah. 25Arünü ashekhi mihtsürü phünide ayükhi hode arü müneana mulu; judüalalashe abuh yungsho abe, tüsho tsührü yungsho tsührübe tüsho akhiung yungsho mürhangkhi achi thsungkheaknü arü zangrü müneana lupü kuklah. 26Api amüsüh kamkhi dunglim, arünü anihbuh thsungkheak nimung thüne khebah. 27Alungbe khikzhakpung ching, amüsüh dangpung ching tankihpü api yüzahkhi nimung, apinü nihbuh neak kingaün jihbah, Atungpuh Thrünpuhnü thachoh.
28Ha arü yamrüplurüp labah: I ju arü yamrüplurüp; nünü arü kilim Israel ching yamalo müjih; I ju arü yamalo lah. 29Arünü hi kingaün, neak kingaün, tüsho amülim kingaün tsühbah; tüsho Israel ching kingaünkhi kukruk alala arü yo thsübah. 30Sangaso bolung akhuh asokhi, tüsho nüsanü amungji aban kingaünkhi alala amükeamrübo yo thsübah; nüsanü akhuhde anungkhi yikhap amükeamrübo kilim jihbah, junangde nüsa yambukbo kheak müngühmühi labah. 31Wuhnu yungsho shiwüh, akeangnü ashekhi yungsho shiwühbonü anguhsahkhi amükeamrübonü mütsüh.
Currently Selected:
EZEKIEL 44: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
