EZEKIEL 42
42
Amükeamrü thsungkheak Khiungshakbo
1Judüki apinü dukulim, aleangbe khikzhakpung I bede wukhiuk tüsho arüngyam mikhuh tüsho dukulim thüyam mikhuh khiungshakbo ching I bedarü. 2Dukulim lakhi thüyam ayunglim ju khahnap 100, tüsho atolim khahnap 50 lakheah. 3Alungbe khikzhakpung khahnap 20 kheanghode, tüsho aleangbe khikzhakpung limtsahpung thrip abinde, khiungshakbo ju rünkih mahsam ching rünhuhkhamde thsü. 4Khiungshakbo miki alunglim limtsahpung khülang, atolim khahnap 10 tüsho ashanglim khahnap 100,#Ibri yu ching khahnap 1 ah. tüsho ripitbo ju dukulim lakheah. 5Kheakü akube khiungshakbo ju mütsümde alakheah, tümüde abobe tüsho thüyam aphulung ching khiungshakbo kheaknü alü thsüde arünhuhkhibonü atobe luabah. 6Tümüde jurü ju rünkih mahsam ching lakheah tüsho aleangbe khikzhakpung dungjingbo nangde dungjingbo mülade alakheah; jumonü akube khiungshakbo ju abobe tüsho aphulungbo kheaknü aninibe lakheah. 7Akhiungshakbo yeande rhü khülang aleangbe khikzhakpung thrip, akhiungshakbo mikhuh, ayunglim khahnap 50 lakheah. 8Tümüde aleangbe khikzhakpung kheak akhiungshakbo khahnap 50 lakheah tüshe arüngyam mikhuhbo a khahnap 100 lakheah. 9Harü khiungshakbo jing kheak ju aleangbe khikzhakpung chingnü yüzahpü thsüde aniakhiuklimnü yüzahpü limtsahpung khülang lakheah. 10Limtsahpung atolim ju khikzhakpung rhünü khiungdoa lakheah.
Düjinglim she, arüngyam mikhuh akhiungshakbo 11jurü mikhuh ki limtsahpung khülang lakheah; jurübo ju dukulim khiungshakbo nangde lakheah, ashanglim tüsho atolim rukhüh, ripitbo le akeara tüsho khimdopübo rukhüh lakheah. 12Junangde düjinglim khiungshakbo ching yüzahpung ju limtsahpung ku kheak, aniakhiuklimnü, rhü arihkhi hobah ayüzahpungnü yüzah.
13Judüki apinü I ki tha, “Dukulim tüsho düjinglim arüngyam mikhuh lakhi khiungshakbo ju amükeamrübonü Atungpuh ki yübah khide amüsüh kingaünkhi tsühpü lakhi amüsüh khiungshakbo ah; ju ching arünü khide amüsüh kingaünbo zobah–hi kingaün, neak kingaün, tüsho amülim kingaün, tümüde dangpung ju amüsüh ah. 14Küyimki amükeamrübonü amüsüh dangpung yüzahbanü, arünü tankihpung khimmih muzoyikia arübo aleangbe khikzhakpung ching muwukhiuk, tümüde harübo amüsüh ah; mihtsürübo thsungkheak lakhi dangpungbo ching müyüyide arünü khimmih püpü yukbah.”
15Küyimki apinü arüngyam alunglim akekhamkhea, apinü aniakhiuklim abinkhi chipiripit ki I bede wukhiuk tüsho arüngyam alala mükamde ake. 16Apinü akesangnü akekhi aniakhiuklim thrip khahnap 500. 17Jushu apinü anguhlo tüsho dukulim akesangnü akekhi khahnap 500. 18Jushu apinü anguhlo tüsho düjinglim akesangnü akekhi khahnap 500. 19Jushu apinü aniyüzahlim anguh tüsho akesangnü akekhi khahnap 500. 20Apinü thrip phüyi ake. Ju mükamde amümüsüh chingnü amüsüh chamnakpü lakhi rhü ju ashanglim khahnap 500 tüsho atolim 500 lakheah.
Currently Selected:
EZEKIEL 42: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
