EZEKIEL 41
41
1Jushu apinü aphulungbe khiungshak ching I bedarü, tüsho ripit dungbo ake; thrip aban ripit dungbo atolim khahnap 6 lakheah. 2Ayüzahpung atolim khahnap 10 tüsho ayüzahpung athrip rhübo thrip aban khahnap 5 lakheah. Apinü aphulungbe khiungshak khahnap 40, tüsho atolim khahnap 20 ake. 3Jushu apinü alungbe khiungshak ching yüzah tüsho ayüzahpung ripit dung khahnap 2 ake; tüsho ayüzahpung achanglim khahnap 6; tüsho ayüzahpung athrip rhübo khahnap 7. 4Apinü khiungshak ju ayunglim khahnap 20, tüsho atolim khahnap 20 aphulung khiungshak hode ake. Tüsho apinü I ki tha, Ha khide amüsüh dangpung ah.
5Jushu apinü arüngyam rhü akheahlim khahnap 6 ake; tüsho athriplim khiungshakbo atolim, arüngyam alala mükamde khahnap 4. 6Harü khiungshakbo ju rünkih mahsam ching, adamkhi khülang aban khiungshak samrü lakheah. Arüngyam aleangbe rhü adamkhi aban kheak ju abobe damkhi kheaknü abübe lakheah, junangde amükhamlobebo ju arüngyam rhü ching muyuk. 7Arheanglim khiungshak limtsahpung ju khinkih chingnü khinkih dükeak mülihde yü; tümüde arüngyam mükamde athsükhi ju jade ayükihbe lakheah, junangde khülang yükihchoki khiungshakbo ju mülihde kam. Rünkihlimro ju aphulung damkhi hode abobe damkhi kheaknü akube damkhi ching yükih. 8Inü arüngyam ju mükamde adamkihkhi khülang she ngü; arheanglim khiungshak khimtanbo akekhi ju akesang amuyungnü, khahnap 6 lakheah. 9Arheanglim khiungshak rhübo akheahlim ju khahnap 5; tüsho arüngyam arheanglim khiungshakbo dükeak küngküngkhi 10tüsho khikzhakpung khiungshakbo ju thrip aban arüngyam alala mükamde atolim khahnap 20 lakheah. 11Arheanglim khiungshakbo ching yüzahpü ju aküngküng chingnü zuzu thsüde zo, khülang khimdopü dukulim, tüsho püpü khimdopü düjinglim; tüsho küngküngde azokhi atolim ju alala mükamde khahnap 5 lakheah.
12Aniyüzahlim arüngyam limkhuhlim abinkhi thüyam ju atolim khahnap 70; tüsho thüyam rhü akheahlim ju alala mükamde khahnap 5, tüsho ashanglim khahnap 90 lakheah.
13Jushu apinü arüngyam akekhi ju ashanglim khahnap 100; tüsho limkhuh le rhü bede thüyam ju ashanglim khahnap 100; 14kheaküshe arüngyam aniakhiuklim mikhuh tüsho limkhuh ju khahnap 100.
15Jushu apinü aniyüzahlim limkhuh abinkhi thüyam ashanglim akekhi ju, thrip aban adamhuhkhibo bede, khahnap 100 lakheah.
Arüngyam khiungshak aphulungbe khiungshak le aleangbe mükü, 16adamkhi kheaknü ayinripitbo khiungde alala sangnü lüpdo. Harü ayinripitbo sangnü lüpdoa lakheah. 17Arüngyam rhübo alungbe, khimdopü kumungbo ju adokihkhibo lakheah. 18Ha cherubim tüsho ashidungbonü thsüa lakheah, cherub le cherub dükeak ashidung khülang lakheah. Cherub abande miro mahne lakheah: 19Thripkhüh mihtsürü mironü ashidung lim abin, tüsho püpü thrip kekhüzü nunu mironü ashidung lim abin. Arübo ju arüngyam alala mükamde dokih; 20adamkhi kheaknü khimdopü kumung khiungde cherubim tüsho ashidungbo ju rhü kheak dokih-a lakheah.
21Aphulungbe khiungshak khimdopü dungjingbo ju shahrihkhüh lakheah. Amüsüh dangpung mikhuh tümükhüh kiphahkhi ju 22sang kingaün sadam khülang, achanglim khahnap 3, ashanglim khahnap 2, tüsho amühit, ajing tüsho rhübo ju sang lakheah. Apinü I ki tha, “Ha Atungpuh miki dubokhi dükhüm ah.” 23Aphulung khiungshak tüsho amüsüh dangpung aban khimdopü mahne lakheah. 24Khimopü mahne ju aphulungnü khimshuhmülih-a zo. 25Aphulungbe khiungshak khimdopü kheak cherubim tüsho ashidungbo dokih, ha ruk rhübo kheak dokih; tüsho wungdo mükü miki sangnü lüpdo. 26Tüsho thrip aban, mükü rheang lim rhübo kheak amütsüm ayinripitbo tüsho ashidungbo lakheah.
Currently Selected:
EZEKIEL 41: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
