EZEKIEL 40
40
Kiuto Aso, Arüngyam Aso
1Isa ramtsokhi kam mukukheak phüngüpü ching, kam atankih, nimung thürü nipü, kiuto thsümünimbah kam thürükheak phüyipü dunglim ju nimung tsütsü, Atungpuh khah I kheak lakheah, tüsho apinü I ju ching bedarü. 2Apinü I Thrünpuh michihbo ching Israel lomi lim bedarü tüsho müzüng khide achang kheak binshih; ju kheak düjinglim ju kiuto khülang thrünkhi nangde alakheah. 3Küyimki apinü ju ching I bedarükhea, ju ching mihtsürü khülang ashihphü müwayinchi nangde, api khah ching khimthünak liu tüsho akesang khülang lakheah; tüsho api ju chipiripit limro zhipde alakheah. 4Mihtsürünü I ki tha, “Mihtsürü tsührü, kheahkihde kheahang tüsho tsüde aniang, tüsho inü nü ki huhkhi alala kheak nü lümkhi zoang, tümüde inü ha nü ki huhpü thsüde nü ha ching bedarükheah; nünü angükhi alala Israel yamkhün ki thaang.”
Aniakhiuklim Chipiripit
5Kheakü arüngyam wungdo alala mükamde rhü khülang lakheah. Mihtsürü khah ching lakhi akesang ju ashanglim khahnap 6 lakheah; jumonü apinü rhü akheahlim ju akesang 1 ake tüsho achanglim akesang 1 ake. 6Jushu apinü aniakhiuklim abinkhi chipiripit limro ching yüzahbah, jingdükübo ching wutu, tüsho chipiripit limro ju asüklim akesang 1 ake. 7Chipiripit khiungshakbo aban ashanglim akesang 1 tüsho atolim akesang 1 lakheah; chipiripit khiungshakbo dükeak ju khahnap 5 lakheah; tüsho alungbe chipiripit mükü ki chipiripit limro asüklim akesang 1 lakheah. 8Jushu apinü chipiripit limro mükü alungbe khahnap 1 ake. 9Jushu apinü chipiripit limro khahnap 8 ake; tüsho chipiripit dungtobo akheahlim khahnap 2 lakheah; tüsho chipiripit mükü ju alunglim akheam kheak lakheah. 10Aniakhiuklim chipiripit ching thripkhüh chipiripit khiungshak khülang tüsho püpü thrip mahsam lakheah; mahsam chido akekhi rukhüh lakheah; tüsho thrip abande chipiripit ashungdungbo akekhi rukhüh lakheah. 11Jushu apinü chipiripit limro alahashungbe atolim khahnap 10 ake; tüsho chipiripit limro ayunglim khahnap 13 ake. 12Akhiungshakbo miki rhü khülang thrip aban khahnap 1 lakheah; tüsho akhiungshakbo ju thrip aban khahnap 6 lakheah. 13Jushu apinü chipiripit khiungshak khülang kheaknü püpü khiungde ayi-lüpkhi kheaknü chipiripit ju ake; khimdopünü khimdopü kheahachihde, atolim khahnap 25 lakheah. 14Apinü chipiripit dungjingbo khahnap 60 ake; tüsho chipiripit limro alala mükamkhi khikzhakpung ju chipiripit dungbo khiungde alakheah. 15Ayüzahpung chipiripit mikhuh kheaknü alungbe chipiripit mükü akheam khiungde khahnap 50 lakheah. 16Akhiungshakbo tüsho chipiripit dungbo ching, chipiripit limro alungbe alala mükamde arihdobe bebah ayinripitbo lakheah, tüsho alunglim alala mükamde mükübo she ayinripitbo lakheah; tüsho chipiripit ashungdungbo kheak ashidungbo dokih-a lakheah.
Aleangbe Limkhuh
17Jushu apinü khikzhakpung aleangbe lim I bedarü; ju ching akhiungshakbo tüsho limtsahpung khülang khikzhakpung alala mükamde alakheah; limtsahpung yeande akhiungshak samrü lakheah. 18Limtsahpung ju chipiripitbo mükamde ashanglim nangde mülihde alakheah; ha limtsahpung abobe lakheah. 19Jushu apinü alunglim abobe chipiripit limro kheaknü alungbe khikzhakpung wungdo khiungde ake; aniakhiuklim tüsho dukulim akekhi ju khahnap 100 lakheah.
Dukulim Chipiripit
20Jushu apinü dukulim abinkhi aleangbe khikzhakpung chipiripit, asüklim tüsho atolim ake. 21Thrip aban khiungshak mahsam, chipiripit dungbo tüsho mükü ju akhuhbe chipiripit nangde akekhi rukhüh lakheah; ayunglim khahnap 50 tüsho atolim khahnap 25 lakheah. 22Ayinripitbo, mükü, tüsho ashidungbo ju aniakhiuklim abinkhi chipiripit akekhi rukhüh lakheah. Ju ching jingdükü 7 yükih; tüsho mükü ju alunglim lakheah. 23Aniakhiuklim nangde dukulim chipiripit mikhuh kheak alungbe khikzhakpung chipiripit khülang lakheah; apinü chipiripit mahne dükeak akekhi ju khahnap 100 lakheah.
Düjinglim Chipiripit
24Jushu apinü I düjinglim bede yü, tüsho düjinglim chipiripit khülang lakheah; tüsho apinü chipiripit dungbo tüsho mükübo ake; püpübo nangde jurü akekhi rukhüh lakheah. 25Ju alala mükamde mükü ching püpürü nangde ayinripitbo lakheah; ayunglim khahnap 50, tüsho atolim khahnap 25 lakheah. 26Ju kheak yükihpü ju jingdükü 7 lakheah; mükü ju alunglim lakheah. Chipiripit dung thrip aban kheak ashidung lakheah. 27Düjinglim alungbe khikzhakpung yo chipiripit khülang lakheah; tüsho apinü düjinglim chipiripit mahne dükeak akekhi ju khahnap 100 lakheah.
Alungbe Limkhuh
28Jushu apinü I düjinglim chipiripit ki alungbe khikzhakpung ching bedarü, tüsho apinü düjinglim chipiripit ju ake; püpürü nangde akekhi rukhüh lakheah. 29Akhiungshakbo chipiripit dungbo, tüsho mükü püpürü nangde akekhi rukhüh lakheah; tüsho ju alala ching mükamde tüsho mükü ching püpürü nangde ayinripitbo lakheah; ashanglim khahnap 50, tüsho atolim khahnap 25 lakheah. 30Alala mükamde mükübo lakheah, ashanglim khahnap 25 tüsho atolim khahnap 5. 31Mükünü aleangbe limkhuh lim abin, tüsho chipiripit dungbo kheak ashidungbo lakheah, tüsho limro kheangkihkhi ju jingdükü 8 lakheah.
Alungbe Limkhuh: Aniakhiuklim Chipiripit
32Jushu apinü I aniakhiuklim alungbe khikzhakpung lim bedarü, tüsho apinü chipiripit ju ake; püpürü nangde akekhi rukhüh lakheah. 33Akhiungshakbo, chipiripit dungbo, tüsho mükü ju püpürü nangde rukhüh lakheah; tüsho alala mükamde tüsho mükü ching ayinripitbo lakheah; ashanglim khahnap 50, tüsho atolim khahnap 25 lakheah. 34Mükü ju aleanglim khikzhakpung lim abin, tüsho chipiripit dungbo kheak ashidungbo thrip abande lakheah; tüsho limro kheangkihkhi ju jingdükü 8 lakheah.
Alungbe Limkhuh: Dukulim Chipiripit
35Jushu apinü I dukulim chipiripit lim bedarü, tüsho apinü ju akeakheah; püpürü nangde ha rukhüh lakheah. 36Akhiungshakbo, chipiripit dungbo, tüsho mükü ju püpürü nangde rukhüh lakheah; tüsho alala mükamde ayinripitbo lakheah. Ayunglim khahnap 50, tüsho atolim khahnap 25 lakheah. 37Mükü ju wungdo limkhuh lim abin, tüsho thrip abande chipiripit dungbo kheak ashidungbo lakheah; tüsho limro kheangkihkhi ju jingdükü 8 lakheah.
Dukulim Chipiripit Phünide Thüyambo
38Chipiripit mükü ching khimdopü bede akhiungshak khülang, taka kingaünbe müsühpung lakheah. 39Tüsho chipiripit mükü ching thrip abande dükhüm mahnene lakheah, ju taka kingaün, neak kingaün tüsho laksah-a kingaünpü laksahpung lakheah. 40Mükü aleanglim dukulim chipiripit ki dükhüm mahne lakheah; tüsho chipiripit mükü püpü thrip kheak dükhüm mahne lakheah. 41Alunglim dükhüm phüyi, tüsho aleanglim chipiripit ki dükhüm phüyi, laksah-a kingaünbe laksahpungbo ju dükhüm tizheah lakheah. 42Kheaküshe ju ching taka kingaünpü thsungkheak akheankhi lung dükhüm phüyi lakheah, ashanglim khahnap 1 kheak thripkhüh, tüsho atolim khahnap 1 kheak thripkhüh, tüsho achanglim khahnap 1, ju kheak laksah-a kingaünpü laksahbe kukrukbo zode alakheah. 43Alunglim ju awuhpungbo atolim müyikhühnü alala mükamde rhükkih; tüsho shuhmülanga kingaünbe shih ju dükhümbo kheak lakheah.
44Alungbe chipiripit aleanglim alungbe khikzhakpung ching khün thsürü thsungkheak khiungshakbo lakheah, khülang ju düjinglim abinkhi dukulim chipiripit thrip lakheah, püpü ju dukulim abinkhi düjinglim chipiripit thrip lakheah. 45Apinü I ki tha, “Düjinglim abinkhi khiungshak ha arüngyam ching tankihrü amükeamrübo thsungkheak ah, 46tüsho dukulim abinkhi khiungshak ha kingaün sadam kheak tankihrü amükeamrübo thsungkheak ah; harü ha Levi trük Zadok tsühsoniuso bolungnü lang api tankihpü Atungpuh thüninde arüpü kuklah.” 47Apinü khikzhakpung ju ake, ashanglim khahnap 100, tüsho atolim khahnap 100, shahrihkhüh lakheah; tüsho kingaün sadam ju arüngyam limkhuh kheak lakheah.
Arüngyam
48Jushu apinü I arüngyam mükü lim bedarü tüsho mükü ripit dungbo thripkhüh thripkhüh khahnap 5 ake; tüsho chipiripit athriplim rhübo ju thrip aban khahnap 3 lakheah. 49Mükü ayunglim khahnap 20 tüsho atolim khahnap 12; ayükihkhi ju jingdükü 10; tüsho thrip aban ripit dung yean dungjingbo lakheah.
Currently Selected:
EZEKIEL 40: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
