EZEKIEL 37
37
Akung Robo Jindükhün
1 Atungpuh khah I kheak arü, tüsho Atungpuh me ching I bekhit tüsho jindükhün khülang phulung ching binshih; ju robonü mide alakheah. 2Apinü jurübo mükamde I be; jurübo jindükhün ching khide hihde alakheah, tüsho khide kungde alakheah. 3Apinü I ki tha, “Mihtsürü tsührü, harü robonü rhangdung lakhukba de?” Inü alo, “ O Atungpuh T H RÜ NPU H , nünü mükheahlah.” 4Judüki apinü I ki tha, “Harü robo ki müchitang tüsho arü ki thaang: O akung robo, Atungpuh yu soang. 5Atungpuh T H RÜ NPU H NÜ harü robo ki thachoh: Inü nüsa kheak sheak yüzahshihbah, tüsho nüsa rhangdung labah. 6Inü nüsa kheak sühbo yihkihbah, tüsho küpnü alüpdobah, tüsho nüsa kheak sheak yukbah, tüsho nüsa rhangdung labah; tüsho I Atungpuh de nüsanü mükheahbah.”
7Jumonü I ki thiyukhüm jihkhi nangde inü müchit; tüsho inü müchitshu, zukleangnü kürakkürak de düsheak khülang lakheah, tüsho robonü ro ki rukhüh shumukhung. 8Inü mürünga kheah, tüsho arü kheak sühbo lakheah, tüsho arü kheak sihtsü yükih, tüsho küpnü arü lüpdo; tüshe arü kheak sheak mülade alakheah. 9Judüki apinü I ki tha, “Sheak ki müchitang, mihtsürü tsührü, müchitang tüsho sheak ki thaang: Atungpuh Thrünpuhnü ha thachoh: Apungbo thrip phüyi chingnü arang, O sheak, tüsho harü alaksahkhibo kheak sheak thsüyukang, junangde arübo rhangdung labah.” 10Apinü I ki thiyukhüm jihkhi nangde inü müchit, tüsho arü kheak sheak arü, tüsho arü rhangdung la, tüsho boto ato arü jingnü zhip.
11Judüki apinü I ki tha, “Mihtsürü tsührü, harü robo ha Israel yamkhün athrünkhi ah. Arünü thachoh, ‘ Isa robo kunga lah, tüsho isa mulonglam dükheaka lah; isa shahde lipshaka bahdo.’ 12Jumonü müchitang tüsho arü ki thaang, Atungpuhnü ha thachoh: Inü nüsa kiuyukbo khimshuhpü lah, tüsho kiuyukbo chingnü nüsa bemusubah, O I mihtsürü; tüsho inü nüsa Israel lomi ching belodarübah. 13Tüsho inü nüsa kiuyukbo khimshuhchoki, tüsho kiuyukbo chingnü nüsa bemusuchoki, I Atungpuh de nüsanü mükheahbah, O I mihtsürü. 14Inü I me nüsa kheak yukjihbah, tüsho nüsa rhangdung labah, tüsho inü nüsa nihbuh lo kheak lashihbah; judüki I Atungpuhnü asukkheah tüsho rhimobah de nüsanü mükheahbah,” Atungpuhnü thachoh.
Juda tüsho Israel Kiulongthsü Khülang
15 Atungpuh yu I ki arü: 16Mihtsürü tsührü, tso khülang luang tüsho ju kheak thrütang, “Juda kiulongthsü.” Jushu tso püpü luang tüsho ju kheak thrütang, “ Israel kiulongthsü”; 17tüsho ane tso khülang kamshang, junangde ane nü khah ching khülang kambah. 18Tüsho küyimki nü mihtsürübonü nü ki thaba, “Harü amütsan nünü isa ki muhuhba de?” 19Arü ki thaang, Atungpuh Thrünpuhnü ha thachoh: Inü Israel mung chingnü tso khülang lubah tüsho ju Juda tso kheak yihkihbah, tüsho ane tso khülang kambah, junangde ane I khah ching khülang labah. 20Küyimki nünü athrütkihkhi tsobo arü mük ki nü khah ching laba, 21arü ki thaang, Atungpuh Thrünpuhnü ha thachoh: Inü Israel mihtsürübo arü yüpung trükshih bolungnü alubah, tüsho thrip aban chingnü arü bemukhungbah, tüsho arü nihbuh lomi ching bedarübah. 22Inü Israel müzüngbo kheak, lomi ching arübo trükshih khülang kamshihbah; tüsho arü alala kurungkheak yakzan shuhpü kiulongthsürü khülang labah. Küyimkishe arü trükshih mahne müla, tüsho küyimkishe arü kiulongthsü mahne mücham. 23Arünü küyimkishe nihbuh zangrü arü sangthsübo tüsho athraneanbebo yungsho alakmihkhi khürü hode müneana mulu. Arü rholode atsokhi neakbo alala chingnü inü arü khümkhitbah, tüsho inü arü müsühkhitbah. Arü I mihtsürü thsübah, tüsho I arü Thrünpuh thsübah.
24I yamlarü David arü kurungkheak kiulongthsüpuh labah; tüsho arü alala namfimihnu neakrü khülang labah. Arünü I yuzüngbo ching tsahbah tüsho I yakzan thsükhibo anipü kümkangbah. 25Inü I yamlarü Jakob kilim jihkhi nüsa jipürü lakhi lo ching arübo labah; arü le arü tsührü tüsho arü tsührü tsührübo lünnü ju ching labah; tüsho I yamlarü David lünnü arü yakzanshuhrü thsübah. 26Inü arü kheak mungtsü tangzüng khülang thsübah; ju arü kheak akheam mülakhi tangzüng khülang labah; tüsho inü arü müngühjihbah tüsho wüh bushihbah, tüsho arü bolung I arüngakopung lünnü alashihbah. 27I lapung arü lung labah; tüsho I arü Thrünpuh thsübah, tüsho arü ju I mihtsürü thsübah. 28Judüki arü bolung I arüngakopung lünnü alachoki, I Atungpuhnü Israel müsühkhitchoh de trükshihbonü mükheahbah.
Currently Selected:
EZEKIEL 37: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
