EZEKIEL 36
36
Israel kheak Atungpuh Müngühmühi
1Tüsho, nü mihtsürü tsührü, Israel müzüngbo ki müchitang, tüsho thaang: O Israel müzüngbo, Atungpuh yu soang. 2Atungpuh Thrünpuhnü ha thachoh: Tümütüsho thiririnü nüsa ki tha, “Aha!” tüsho, “Jipü wung achangbo isa yamalo kamdo,” 3jumonü müchitang, tüsho thaang: Atungpuh Thrünpuhnü ha thachoh: Tümütüsho arünü nüsa zhikrangkhündo kamshih, tüsho thrip alala chingnü nüsa züthünak, junangde nüsa ju aningkhi trükshihbo yamalo kam, tüsho mihtsürü bolung nüsa ju dünthamungtha tüsho jipjiprara kam; 4jumonü, O Israel müzüngbo, Atungpuh T H RÜ NPU H yu soang: Atungpuh Thrünpuhnü aninga lakhi mühirü trükshih alala ki yankhia lukhi tüsho keangrümüne kukruk khülang kamkhi Israel müzüngbo, awungbo, ayungbo, jindükhün, azhik tüsho abahkhi le abahkhitkhi kiutobo ki ha thachoh; 5jumonü Atungpuh Thrünpuhnü ha thachoh: Inü aningkhi trükshihbo tüsho Edom alala azhihde mükthsükhi chingnü inü asukchoh. Arünü mulong athrünkhinü asühachih tüsho bahyukde I lomi yankhia lu tüsho ha rimlopung arü yamalo thsüpü lu. 6Jumonü Israel lomi dünkheak müchitang, tüsho müzüngbo le awungbo, ayungbo tüsho jindükhünbo ki thaang, Atungpuh Thrünpuhnü ha thachoh: Inü mükthsüde mulong zhipzhipkhi chingnü asukchoh, tümütüsho trükshihbo mükhemükim ching nüsa thsünüdo; 7jumonü Atungpuh Thrünpuhnü ha thachoh: Nüsa mükamde alakhi trükshihbo alala arü zangrünü thsünübah de inü nüsa ki I khah shuhkihde thiyuchihchimchoh.
8Tüshe, nüsa, O Israel müzüngbo, nü khahbo chinkhitba shi, tüsho I mihtsürü Israel kilim aso asojihba shi; tümüde arübo nahde thüyam lim arübah. 9Kheakü kheahang, I a nüsa thsungkheaknü lah; I nüsa kilim rholobah, tüsho nüsa wochakbah tüsho mükheanbah; 10tüsho inü nüsa kheak mihtsürübo wüh bushihbah, Israel yamkhün athrünkhi lashihbah; kiutobo ching lalobah tüsho athsümünimkhi dangpungbo thsülobah; 11tüsho inü nüsa kheak mihtsürü tüsho shiwühbo wüh bushihbah. Arübo alü kambah tüsho aso asobah; tüsho akhuhlim kimbo ching nangde inü nüsa kheak laloshihbah, tüsho püpüki kheaknü alü nüsa ki tsüde arhimobah. Judüki I Atungpuh de nüsanü mükheahbah. 12Inü nüsa kheak I mihtsürü Israel tsahshihbah tüsho arünü nüsa mükühbah, tüsho nüsa ju arü yamrüplurüp thsübah. Tüsho nüsanü küyimkishe arü tsührübo dünkheak arü ki mimütrip.
13Atungpuh Thrünpuhnü ha thachoh: Tümütüsho arünü nüsa ki tha, “ Nüsanü mihtsürü muyuchoh, tüsho nüsanü nüsa trükshihbo tsührü tüzhoshihchoh,” 14jumonü nüsanü küyimkishe nüsa trükshih mihtsürübo mümuyu tüsho mütüzhoshih, Atungpuh Thrünpuhnü thachoh; 15tüsho trükshihbonü mükhemükimkhi inü nüsanü musoshih, mihtsürübo achihahean nüsanü kheaküa mühan; tüsho kheaküa nüsanü nüsa trükshihbo jing mümükheshih, Atungpuh Thrünpuhnü thachoh.
Israel Rhangdung Aso
16 Atungpuh yu I ki arü: 17Mihtsürü tsührü, küyimki Israel yamkhün arü nihbuh lo kheak lakheanü, arünü arü limrobo tüsho arü rhimobonü ju müneanjih; I miki arü limro ju aliberü nihbe khinushihcham yüchoki mümüsühkhi nangde alakheah. 18Jumonü arünü lomi kheak thiyih bukkhi tüsho arünü bede müneankhi sangthsübo dünkheaknü arü kheak I mulong zhipzhip dungkih. 19Inü arübo trükshih bolung hiumüzütshih, tüsho arübo lomibo ching müzütshih; arü limro tüsho rhimobo yande inü arü mahkhap. 20Küyimki arünü trükshihbo kilim arükheanü, arü yüpungbo ching, arünü I mung amüsüh müneanjih, ju ching arü dünkheak tha, “Harü ha Atungpuh mihtsürübo, tütüshe arünü api lomi chingnü awukhiukpü kam.” 21Tüshe Israel yamkhünnü arü arüpung trükshih bolung müneanjihkhi I mung amüsüh dünkheak inü lümrhih.
22Jumonü Israel yamkhün ki thaang, Atungpuh Thrünpuhnü ha thachoh: Ha nü thsülimnü inü arhimopü thsüchoh yung, O Israel yamkhün, tüshe nü arüpung trükshih bolung nünü müneanjihkhi I mung amüsüh thsülimnü ah. 23Trükshih bolung nünü müneankhi I mung ato inü müsühkhitbah, tüsho nü hode arü mük ki inü I amüsüh huhchoki trükshihbonü I Atungpuh de mükheahbah, Atungpuh Thrünpuhnü thachoh. 24Inü nü trükshihbo chingnü alubah, tüsho lomibo alala chingnü bemukhungbah, tüsho nihbuh lo ching nü beyukbah. 25Inü nü kheak ke amüsüh rhakkihbah, tüsho mümüsühkhibo chingnü nü müsühbah, tüsho nü sangthsübo alala chingnü inü nü müsühbah. 26Inü mulong aso khülang nü kilim jihbah, tüsho me aso khülang nü kheak yukjihbah; tüsho inü nü pang chingnü lungto mulong yihkhitbah tüsho nü kilim shihtsü mulong khülang jihbah. 27Inü I me nü kheak yukjihbah, tüsho I yakzan thsükhibo ching tsahbah tüsho I yuzüngbo rhimopü kümkangshihbah. 28Judüki inü nüsa jipürü ki jihkhi lo ching nü labah; tüsho nü I mihtsürü thsübah, tüsho I nü Thrünpuh thsübah. 29Inü nü mümüsühkhibo alala chingnü nü khümkhitbah, tüsho inü hi jihbah tüsho muzhomopungde akamshihbah tüsho nü kheak khümzung mülashih. 30Inü sangaso tüsho thulu chingnü akhiukkhi muzhomopungde akamshihbah, junangde trükshih bolung nü khümzungnü achih ngükhi küyimkishe müthsünülo. 31Judüki nü amütsü limrobo tüsho amütsü rhimobo nünü alümkhitbah; tüsho nünü nü amülimbo tüsho athranean rhimobo dünkheak thraneanbah. 32Ha nü thsülimnü inü arhimopü thsüchoh yung, Atungpuh Thrünpuhnü thachoh; ju nünü mükheahang. Nü limrobo thsungkheak achihang tüsho lümchihyuk ngüang, O Israel yamkhün.
33Atungpuh Thrünpuhnü ha thachoh: Inü nü mülimkhibo alala chingnü nü müsühkhit nimung, inü kiutobo ching laloshihbah, tüsho athsümünimkhi dangpungbo thsülobah. 34Atsahhorü alala mük ki zhikrangkhündo lakhi lo wochakbah. 35Tüsho arünü athabah, “Ha lo zhikrangkhündo alakhi thsü Eden shahwün nangde kamdo; tüsho abahkhi, azhikkhi tüsho athsümünim kiutobo ching kheaküa lalolah tüsho chipi ayünlah.” 36Judüki nü mühide alakhi trükshihbo alalanü I Atungpuhnü , athsümünim dangpungbo thsüloa lah tüsho abahkhi khimloa lah de mükheahbah; I Atungpuhnü asukdo, tüsho inü ju rhimobah.
37Atungpuh Thrünpuhnü ha thachoh: kheaküshe Israel yamkhün mihtsürübo namfimihnu boto nangde akamshihpü rhimopü thsüde arünü I ki keokhibah. 38Laksah-a kingaünpü namfimihnu boto nangde, thünio kim ching Jirusalem ching namfimihnu boto nangde, mihtsürübonü athsümünimkhi kiutobo mibah. Judüki I Atungpuh de arünü mükheahbah.
Currently Selected:
EZEKIEL 36: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
