EZEKIEL 38
38
Gog azhihde Müchitkhi
1 Atungpuh yu I ki arü: 2Mihtsürü tsührü, Magog lomi ching Meshek tüsho Tubal yo akubeato yakzanshuhbuh Gog kilim nü miro abinang. Api azhihde müchitang 3tüsho thaang: Atungpuh Thrünpuhnü ha thachoh: Inü nü azhihde lah, O Gog, Meshek tüsho Tubal akubeato yakzanshuhbuh; 4inü nü bephülapbah tüsho nü mün ching khoyangbo yukjihbah, tüsho inü nü bonungrü alala, khorabo tüsho khoraberübo, arü alala thirithsü zülu khiukchimde yihshihbah boto ato arü alala tsung tüsho tsungnini, nukshangbo shuhbah mükamde nü bebah. 5Persia, Ethiopia, tüsho Libya arü lung bebah, arü alala tsungnini tüsho yinchi kuthran labah; 6Gomer tüsho thirithsürü alala; Beth-togarma thirithsürübo bebah limshukhi dukulimnü mihtsürü ahihdo nü lung lah.
7Thsakhamang; nü tüsho nü mükamde alakhi thirithsürübo tsanglungang, tüsho arü ki thiyukhüm jihang. 8Nimung ahihkhüh dunglim nüsa mukhungbah; ashulim kambo ching nüsanü, ashangkhüh thsümünima lakhi, thirithsü kheamkhi lomi khülang, trükshih ahihdo chingnü mukhungde arüpung Israel müzüng azhihde ayübah; ha mihtsürübo trükshihbo chingnü bekhit tüsho kheakü arü alala akhümkhitkhi ching lah. 9Nü mikhuh ching, tsüngpungtsüngpung khülang nangde arübah; nü ju alomi shodokhi amo khülang nangde, nü tüsho nü yo thirithsürü alala, tüsho nü lung mihtsürü ahihkhüh labah.
10Atungpuh Thrünpuhnü ha thachoh: Ju nimung lümkhibo nü lüm ching arübah, tüsho nünü amütsü asah khülang thsübah. 11Nünü athabah, “Chipi ayünkhi kiulongbo azhihde inü wutubah; chipibo, akhrihbebo yungsho chipiripitbo mülakhi, mungtsü mihtsürü sühakhim ching larü kheak inü akeambah”; 12ajangkhikhi lupü tüsho ayankhikhi hanpü, thsümünima labah kheakü mihtsürü lakhi dangpungbo yanpü, tüsho trükshihbo chingnü amukhungkhi mihtsürübo, moshi tüsho kukrukbo larü, lomi phulung ching larü rampü labah. 13Sheba tüsho Dedan tüsho Tarshish shothsümolorü tüsho athunu thirithsürübo alalanü nü ki thabah, “Ajangkhikhi lupü nü arükhea de? Ayankhikhi hanpü, shotoyinchi tüsho suna hande atsopü, moshi tüsho kukrukbo hande atsopü, ahüh-a lukhi atokhüh lupü nünü mihbo bemukhungkhea de?”
14Jumonü, mihtsürü tsührü, Gog ki müchitang tüsho thaang: Atungpuh Thrünpuhnü ha thachoh: I mihtsürü Israel khümkhita lakhi nimung, nü asürübah 15tüsho dukulim limshu chingnü nü lapung chingnü arübah, nü tüsho nü lung mihtsürü ahihdo, arü alala khorabo kheak binbah, mihbo ato, wuto bonungrü; 16amonü alomi liudokhi nangde nünü I mihtsürü Israel azhihde atubah. Ashube nimungbo ching I lomi azhihde inü nü bedarübah, O Gog, nü hode arü mükbo ki I amüsühkhitkhi huhchoki, trükshihbonü I mükheahbah.
17Atungpuh Thrünpuhnü ha thachoh: Adüso nimungbo ching I yamlarü Israel wukihrübonü arübe nimungbo ching arü azhihde inü bedarüpü kambo müchitkhi ju nü a de? 18Ju nimung, küyimki Gognü Israel lomi azhihde arübanü, Atungpuh Thrünpuhnü thachoh, I mulong zhipzhipbah. 19Tümüde I mükthsükhi ching tüsho I mulong zhipzhipkhi ching inü khipkhitchoh: Ju nimung Israel lomi ching muliuyuk züngkhi ato labah; 20keto ngüh, thüning wuhnubo, mütüm shiwühbo, alo kheak abüde atsahbe lorilokobo alala, tüsho alomi kheak lakhi mihtsürü alala I miki ajanbah, tüsho müzüngbo le awung mujukbo keamkhibah, tüsho chipi alala alo kheak keama yapbah. 21Inü I wungbo alala kheak Gog azhihde nukshang jihbah, Atungpuh Thrünpuhnü thachoh; mihbüm aban thsühnuknü khülangnü khülang azhihbah. 22Arüm-tukthsü tüsho thiyih bukde inü api kheak mahkhappü ching yüzahbah; tüsho inü api le api lung lakhi mihtsürü ahihdo kheak düchi tsüng tüsho arubo, mo tüsho motsüng akishihbah. 23Junangde inü I tokhi tüsho I müsühkhitkhi huhbah tüsho trükshih ahihdo miki I mükheahshihbah. Judüki I Atungpuh de arünü mükheahbah.
Currently Selected:
EZEKIEL 38: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
