EZEKIEL 35
35
Atungpuhnü Edom Thsümüchikhi
1 Atungpuh yu I ki arü: 2Mihtsürü tsührü, Edom müzüng azhihde nü miro abinang, tüsho ju azhihde müchitang, 3tüsho thaang, Atungpuh Thrünpuhnü ha thachoh:
Inü nü azhihde lah, Edom müzüng;
nü zhikshihpü tüsho abahkhi kamshihpü inü nü azhihde I khah chungkihlah.
4Inü I kiutobo athsümünim ching lashihlah;
nü azhihkhi khülang kambah tüsho I Atungpuh de nünü mükheahbah.
5Tümütüsho nü a mutuklode Israel riri lakheah, tüsho arü thsümütsü, arü akheam thsümüchi kim ching Israel mihtsürü nukshang wu kilim jih; 6jumonü I lale, Atungpuh Thrünpuhnü thachoh, Inü thiyih thsungkheak nü thsakhambah, tüsho thiyihnü nü müshambah; tümütüsho nünü thiyih bukkhi müthranean, thiyih bukkhinü nü müshambah. 7Inü Edom müzüng abahkhi tüsho azhik khülang kamshihbah; tüsho ju ching arüla yüla dürü laksah-a bahbah. 8Inü müzüngbo ju alaksahkhinü amishihbah; nü wungbo kheak tüsho nü jindükhün le jindükhünasükbo ching nukshangnü alaksahrü keambah. 9Inü nü kiutobo lünnü azhikkhi kamshihbah, tüsho nü yo kiutobo ching küyimkishe mülaloshih. Judüki I Atungpuh de nünü mükheahbah.
10Tümütüsho nünü tha, “Ha trükshih mahne tüsho lomi mahne I yo thsübah, tüsho isanü arü yamalo lubah,”–Atungpuh ju ching laa lalashe– 11jumonü I lale, Atungpuh Thrünpuhnü thachoh, nünü arü azhihde thraneankhi dünkheak nü bukakhiukkhi tüsho nünü mükthsükhi yande inü nü kheak rhimobah; tüsho inü nü mahkhapchoki nüsa bolung I mükheahshihbah. 12Judüki nünü Israel wungbo bahyukde athakhi alala I Atungpuhnü sodo de nünü mükheahbah. Nünü tha, “Arübo thsümünima yaplah tüsho amuyushihpü arübo isa kilim jihdo.” 13Tüsho nünü I azhihde nü münnü nü küdah thsüde kükheanga lu, tüsho I azhihde nü yubo alü kamshih; inü ju sodo. 14Atungpuh Thrünpuhnü ha thachoh: Alomi athrünkhi asühachihchoki, inü nü zhikrangkhündo kamshihbah. 15Tümüde nünü Israel yamkhün yamrüplurüp kurungkheak asühachihdo, tümütüsho ha zhikrangkhündo lakheah, jumonü inü nü ki rhimobah; nü zhikrangkhündo alabah, O Edom müzüng, nü tüsho Edom alala. Judüki I Atungpuh de arünü mükheahbah.
Currently Selected:
EZEKIEL 35: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
