EZEKIEL 31
31
Ijip ju Cedar Akeakheahkhi
1Kam thürükheak khülang ching, khinu asampü, akhuhbe nimung, Atungpuh yu I ki arü: 2Mihtsürü tsührü, Ijip kiulongthsüpuh Pharao tüsho api boto mihtsürü ki thaang:
Nü tokhi nangde she la le?
3Asiria lümakheahang, Lebanon cedar khülang,
akhahbo atsü tüsho alamdokhi murung,
tüsho tode amo khiungde achangkhi.
4Kebonü ju toshih,
asüknü ju shangde asürüshih,
ayungbo bukshihde ju mühi khim,
thulu sangdungbo alala kilim yungzübo yüshih.
5Ke suhdahkhinü thulu sangdungbo alala kumung changde yükih;
sangkhahbo tode ashangshang kam.
6Sangkhahbo ching wuhnubo alalanü asap shuchoh;
ha dübeakkhi khüpnü mükeak shiwühbo alalanü anunu anujih;
tüsho ha alamme khüp trükshihbo alala la.
7Ha atolim tüsho adübeakbo changkhi akhamde lakheah;
tümüde ayingbo ju suhdahkhi ke ching yüzah.
8Thrünpuh wündo ching cedar ha mazhihkhuk,
yungsho tsünsangnü adübeakbo marihkhuk
yungsho yütosangnü adübeakbo makekhuk–
Thrünpuh wündo sang tümünü ha akhamkhi marihkhuk.
9Inü akhahbo suhdahde ha akhamde thsü,
Thrünpuh shahwün Eden ching sangdung alala bolung asühmühkhi lah.
10Jumonü Atungpuh Thrünpuhnü ha thachoh: Tümütüsho ha changde rünkih tüsho amobo lung yükih tüsho achangkhinü mulong kükheangde kam, 11inü ju trükshihbo yakzanshuhbuh khah ching jih; apinü ju ki rimthsümünim thülün rhimo. Inü ju bahyuk. 12Khide atrebe trükshihbo ching khiungkerübonü ju kiushak tüsho bahbah tso. Müzüngbo kheak tüsho jindükhünbo ching akhahbo keamkhi, tüsho jindükhün lo asükbo ching zhaka yaplah; tüsho mihtsürü alala ha alamme khüpnü bahbah tso. 13Wuhnubo alalanü lunga yapkhi sangdung ching la, tüsho thulu shiwühbo alala ju khahbo ching la. 14Jumonü keyean sangbonü nihbuh küdah thsüde müshangkihlo, amobo hode mushuhkih. Ke tsüde aduhkhi sang tümü she ha ruk achangkhi mukhiung; tümüde arübo alokhün ching yüzahrü, ashepü mihtsürü lung shepü arübo akhua lah.
15Atungpuh Thrünpuhnü ha thachoh: Ha Ashe-lomi ching yüzah nimung inü tüzhode asük kumung khimdo, tüsho wudoabah; inü ayungbo tukloshih, tüsho ke atobo mütsanmüküh. Inü Lebanon amonü mitingdo khüpdo, tüsho thulu sangdungbo alala keamabah. 16Inü alokhün ching yüzahrü lung Ashelomi ching nimyukchoki, akeamkhi düsheaknü trükshihbo ajanbah; tüsho Eden sangdungbo alala Lebanon ching mokhitkhi tüsho atsüdak ke duhkhi alala Ashe-lomi ching shukheambah. 17Ha alamme khüp larü, trükshih bolung müshiprü she nukshangnü alaksahrü lung bepü Ashe-lomi ching yüzahbah.
18Eden sangdung bolung nü nangde müretahkhi tüsho toshangkhi küpü a? Kheakü nü a Eden sangdungbo lungnü abobe lomi ching bede yüzahbah; nü ju nukshangnü alaksahkhi tsütamübahrü bolung yapbah. Ha Pharao tüsho api boto alala ah, Atungpuh Thrünpuhnü thachoh.
Currently Selected:
EZEKIEL 31: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
