EZEKIEL 30
30
1 Atungpuh yu I ki arü: 2Mihtsürü tsührü, müchitang tüsho thaang, Atungpuh Thrünpuhnü ha thachoh:
Tüzhoang, “ I nimung thsungkheak are!”
3Tümüde nimung thüninde lah,
Atungpuh nimung thüninde lah;
ha amo-khüpkhi nimung labah,
trükshih thsungkheak kim lah.
4Nukshang khülang Ijip kheak arübah,
tüsho thsünükhi Ethiopia ching labah,
küyimki alaksahkhi Ijip ching keamba,
tüsho lakhit hande atsoba tüsho ju khimtanbo thomülünba.
5Ethiopia, Libya, Ludia, Arabia, Kub alala, tüsho müship lomi mihtsürü alala Ijiprü lung nukshangnü akeambah.
6 Atungpuhnü ha thachoh: Sherünü Ijip rungchonü akeambah tüsho kükheangküyang sühmüh keamkhibah; Migdol chingnü Sene khiungde arübo ju ching nukshangnü akeambah, Atungpuh Thrünpuhnü thachoh. 7Arübo püpürü azhik lomi bolung azhikkhi labah tüsho athsümünimkhi kiuto bolung arü kiutobo labah. 8Küyimki inü Ijip kheak mo takkihba, tüsho ju rungrü alala thsümünima laba, I Atungpuh de arünü mükheahbah.
9Ju nimung, mulong tomihkhi Ethiopia müzünpü I kinü yunithsürü sangkungbo chingnü awukhiukbah; tüsho Ijip thsümünimpü nimung arü kheak thsünü arübah; tümüde ha arüchoh!
10Atungpuh Thrünpuhnü ha thachoh: Inü Ijip mihhihkhi Babilon kiulongthsüpuh Nebukednezar khah hode akheam thsüshihbah. 11Api tüsho api lung amihtsürübo, trükshihbonü khide atrekhi, lomi thsümünimpü bemukhungbah; tüsho arünü Ijip azhihde arü nukshangbo dukkhitbah, tüsho alaksahkhinü lomi mishihbah. 12Inü ayungbo kungshihbah tüsho lomi ju mihbukmuyuk khah ching yinbah; inü lomi tüsho ju ching lakhi lüpdükhi kheak athsümünim khiungkerübo khah hode handarübah; I Atungpuhnü asukdo.
13Atungpuh Thrünpuhnü ha thachoh: Inü sangthsübo thsümünimbah tüsho Memphis ching mejakbo kheamshihbah; Ijip lomi ching yakzanshuhrü mülalo; junangde inü Ijip lomi ching atrepü yukjihbah. 14Inü Pathros azhik khülang kamshihbah, tüsho Zoan kheak mo takkihbah, tüsho Thebes kheak mahkhapbah. 15Inü Pelusium kheak I mulong zhipzhip dungkihbah, Ijip chipi adüküng, tüsho Thebes mihhihkhi kheamshihbah. 16Inü Ijip kheak mo takkihbah; Pelusium ju thsünü ato ching labah; Thebes lakashungbah tüsho animung Memphisnü azhih-rithsü shorubah. 17On tüsho Pi-beseth athunu mihtsürü nukshangnü akeambah; tüsho kiutobo ramtso ching yübah. 18Küyimki inü Ijip sangkap yihshakba, tüsho kükheangküyang sühmüh akheam kamshihbanü Tapanhes ching animung mitingbah; kiuto ju amonü akhüpdobah, tüsho kiuto mihtsürübo ramtso ching yübah. 19Hanangde inü Ijip kheak mahkhapbah. Judüki I Atungpuh de arünü mükheahbah.
20Kam thürükheak khülang, akhuhbe khinu, nimung thüne nipü, Atungpuh yu I ki arü: 21Mihtsürü tsührü, inü Ijip kiulongthsüpuh Pharao bin yihshakdo; dükünglode nukshang shuhpü thsüde angushihpü mürümlo yungsho arümbenü mürümdo. 22Jumonü Atungpuh Thrünpuhnü ha thachoh: Inü Ijip kiulongthsüpuh Pharao azhihde lah, tüsho api bin adüküngbe tüsho azhakkhi chido yihshakbah; tüsho inü akhah chingnü nukshang keamkhishihbah. 23Inü Ijiprübo trükshih bolung hiumüzütshihbah, tüsho lomibo ching arübo müzütshihbah. 24Inü Babilon kiulongthsüpuh bin düküngshihbah, tüsho I nukshang akhah ching yukjihbah; tüshe inü Pharao bin yihshakbah, tüsho ashepü yurirü nangde api miki anihbuhnü ashearabah. 25Inü Babilon kiulongthsüpuh bin düküngshihbah, tüshe Pharao binbo keambah. Inü Babilon kiulongthsüpuh khah ching I nukshang yukjihchoki, I Atungpuh de arünü mükheahbah. Apinü Ijip lomi azhihde ju shuhkihbah, 26tüsho inü Ijiprü trükshih bolung hiumüzütshihbah tüsho lomibo ching arübo müzütshihbah. Judüki I Atungpuh de arünü mükheahbah.
Currently Selected:
EZEKIEL 30: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
