EZEKIEL 32
32
1Kam thürükheak mahne, khinu thürükheak mahne ching, akhuhbe nimung, Atungpuh yu I ki arü: 2Mihtsürü tsührü, Ijip kiulongthsüpuh Pharao kurungkheak tüzhoang, tüsho api ki thaang: Nünü nü ju trükshih bolung kekhüzü khülang khechoh, tüshe nü a ketobo ching shiwüh khülang ruk ah; nünü nü yungbo ching awuhchoh, nü jingnü ke rhumüneanchoh, tüsho ayungbo rhuzhihzhihchoh. 3Atungpuh Thrünpuhnü ha thachoh: Mihtsürü ahihdo mukhungkhi ching inü I keang nü kheak jipkihbah; tüsho inü I keang ching nü phudoa lubah. 4Inü nü alo kheak bahbah, mükeak ching inü nü jiba bahbah, tüsho thüning wuhnubo alala nü kheak keamshihbah, tüsho inü lomi alala shiwühbonü nü tsühshihbah. 5Inü nü shih müzüngbo kheak hiukihbah, tüsho nü asheminü jindükhün mishihbah. 6Inü lomi ju nü thiyih bukkhinü müzüngbo khiungde chimkhitshihbah, tüsho keyungbo nünü amibah. 7Küyimki inü nü thsümünimba, inü thüningbo lüpdobah, tüsho chiningbo mitingshihbah; inü amonü ani khüpdobah, tüsho khinunü nihbuh ayin müjih. 8Thüningbo ayinatrüm alala inü nü kurungkheak mitingshihbah, tüsho nü lomi kheak amiting yukjihbah, Atungpuh Thrünpuhnü thachoh.
9Inü nü trükshih bolung nünü mümükheahkhi lomibo ching thsümünimchoki inü mihtsürü ahihdo mulong küpkhukshihbah. 10Inü mihtsürü ahihdo nü kheak müyinsahshihbah; arü kiulongthsürübo nü dünkheaknü ajanbah. Küyimki inü arü miki I nukshang phürapbanü, arü mihbüm abannü nihbuh rhangdung thsungkheak kim abande nü keam nimung ajanbah.
11Tümüde Atungpuh Thrünpuhnü ha thachoh: Babilon kiulongthsüpuh nukshang nü kheak arübah. 12Inü nü mihtsürü boto ju athrungrü nukshangbonü akeamshihbah, arü alala trükshih bolung khide atrebe lah. Arünü Ijip kükheangkhi thsümünimbah, tüsho mihbo alala dükheakbah. 13Inü ke suhdahkhi mungyeannü nü shiwüh alala thsümünimbah; tüsho mihtsürü jingnü arü küpkhuk müjihlo, yungsho moshi biuobonü jurü müthrüm. 14Judüki inü kebo müsühde akamshihbah, tüsho yungzübo müdangke nangde abukshihbah, Atungpuh Thrünpuhnü thachoh. 15Küyimki inü Ijip zhikrangkhündo kamshihba tüsho lomi chingnü lüpdükhi phüta bahba, küyimki inü ju ching larü alala kingmülünba, judüki arünü I Atungpuh de mükheahbah. 16Ha tüzhokhi lah; ha khün thsübah. Trükshih liberübonü ha khün thsübah. Ijip tüsho mihbo alala kurungkheak arünü athsübah, Atungpuh Thrünpuhnü thachoh.
17Kam thürükheak mahne, akhuhbe khinu, thürükheak phüngü nimung, Atungpuh yu I ki arü: 18Mihtsürü tsührü, Ijip mihbo kurungkheak tüzhoang, tüsho wulakhi trükshihbo kilim Ashe-lomi ching yüzahshang. 19Arü ki thaang,
“Püpürü kheaknü nüsa atsübe de lümcho de?
Yüzahang tüsho tsütamübahrü lung yapang!”
20Arübo nukshangnü alaksahrü bolung keambah. Ijip ju nukshang kilim jihdo; ha le mihbo chido hande tsoshang. 21Ashe-lomi ching wuto limberübonü Ijip tüsho amüshiprü dünkheak thabah, “Arü azahdo tüsho nukshangnü alaksahkhi tsütamübahrü lung yaplah.”
22Ju ching bonungrü bede Asiria lah; nukshangnü akeamshihkhi kiuyukbonü anihbe mükamdolah. 23Arü kiuyukbo ju alokhün asük ching lah tüsho anihbe kiuyuk mükamde bonungrü, rhangdung lapung lomi ching mihtrebe bushihrü alala nukshangnü laksah-a yapshihlah.
24Elam ju ching lah, tüsho mihbonü akiuyuk mükamdolah; arü alala nukshangnü laksah-a yapshihlah. Rhangdung lapung lomi ching atrebe bushihrü alala tsütamübahde Ashe-lomi ching yüzahdo. Arübo alokhün ching yüzahrü lung achih ngüde lah. 25Arünü Elam ju alaksahkhi bolung yapshihlah, anihbe bonungrü kiuyukbo api mükamde lah, arü alala tsütamübah, nukshangnü alaksahkhi lah; tümüde rhangdung lapung lomi ching arü trekhi bua lakheah, tüsho alokhün ching yüzahrü lung arünü achih ngüde lah; arübo alaksahkhi bolung zolah.
26Meshek tüsho Tubal ju ching lah, tüsho arü boto alala, arü kiuyukbo alala mükamde lah, arü alala tsütamübah, nukshangnü alaksahkhi lah; tümüde arünü rhangdung lapung lomi ching atrebe bushih. 27Tüsho arübo adüso athrungrü bolung müyap, sherü thirithsü thsühnuk bede Ashe-lomi ching yüzah, sherü nukshangbo arü kubo khüp zola, tüsho sherü tsungbo arü robo kheak la; tümüde athrungrübo trekhi rhangdung lapung lomi ching lakheah. 28Junangde nü nukshangnü alaksahkhi tsütamübahrü lung nü thsümünimbah tüsho ayapbah.
29Edom ju ching lah, kiulongthsürübo tüsho yakzanshuhrü alala, arü wu lalashe nukshangnü alaksahrü lung yaplah; arübo tsütamübahrü alokhün ching yüzahrü lung yaplah.
30Dukulim yakzanshuhrübo ju ching lah, arü alala tüsho Sidonrü alala arü wunü atreshihkhi dünkheak achih ngüde alaksahkhi lung yaplah; arübo tsühamübahde nukshangnü alaksahrü lung yaplah, tüsho alokhün ching yüzahrü lung achih ngüde lah.
31Küyimki Pharao tüsho api bonungrünü nukshangnü alaksahkhi mihbo ngübanü api mulong shukheambah, Atungpuh Thrünpuhnü thachoh. 32Tümüde apinü rhangdung lapung lomi ching atrebe bushih; jumonü nukshangnü alaksahkhi tsütamübahrü bolung Pharao tüsho api bonungrü boto alala sühakhimde ayapbah, Atungpuh Thrünpuhnü thachoh.
Currently Selected:
EZEKIEL 32: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
