EZEKIEL 29
29
Ijip azhihde Müchitkhi
1Kam thürü, khinu thürü, nimung thürükheak mahne nipü, Atungpuh yu I ki arü: 2Mihtsürü tsührü, Ijip kiulongthsüpuh Pharao azhihde nü miro anguhang tüsho api le Ijip alala azhihde müchitang; 3asukang, tüsho thaang, Atungpuh Thrünpuhnü ha thachoh: Inü nü azhihde lah, Ijip kiulongthsüpuh Pharao, shiwüh ato ayung phulung lakhinü thachoh, “ Nile ju I yo; ha I thsungkheak inü thsü.” 4Inü khoyang nü münjak ching yukjihbah, tüsho ayung chingnü thüngühbo nü phülap kheak lüpkihshihbah. Inü nü ayung chingnü thokhitbah, ayung ching yo thüngüh alala nü phülapbo kheak lüpkihshihbah. 5Inü nü tüsho ayung ching thüngühbo alala sunglo ching jipa bahbah, nü a mükeak ching keambah, tüsho mushuhmukhung tüsho kiuyuka mübah. Alomi shiwühbo tüsho thüning wuhnubo kilim inü nü tsühyungpü jihdo. 6Judüki Ijip ching larü alalanü I Atungpuh de mükheahbah tümütüsho nü a Israel yamkhün ki anüh tso khülang lakheah; 7küyimki arü khahnü nü thrüa lukhea, nü yihrüp, tüsho arü dubuhbo tsütrüp; tüsho küyimki arünü nü kheak angükhea, nü yihrüp, tüsho arü jingbo alala nimnimshih.
8Jumonü Atungpuh Thrünpuhnü ha thachoh: Inü nü kheak nukshang khülang handarübah, tüsho mihtsürü le shiwüh bolungnü nü lipkhia bahbah; 9tüsho Ijip lomi ju azhikkhi tüsho athsümünimkhi labah. Judüki I Atungpuh de arünü mükheahbah. Tümütüsho nünü tha, “ Nile ju I yo, tüsho inü ju thsükheah,” 10jumonü, inü nü tüsho ayungbo azhihde lah, tüsho inü Ijip lomi shahde thsümünimbah tüsho, Migdol chingnü Sene, Ethiopia aredungyean khiungde azhihshihbah. 11Mihtsürü jingnü ha mütsahho, tüsho shiwühnü ha mütsahho; ha kam yirü mülade alabah. 12Inü azhikkhi lomi bolung ching Ijip lomi azhikkhi kamshihbah; tüsho thsümünima lakhi lung anihbe kiutobo kam yirü azhikkhi labah. Inü Ijiprübo ju trükshih bolung hiumüzütshihbah, tüsho lomi bolung ching müzütshihbah.
13Kheaküshe Atungpuh Thrünpuhnü ha thachoh: Kam yirü akheam ching inü Ijiprübo arü hiumüzütkhi mihtsürü bolungnü bemukhungbah; 14tüsho inü Ijip kuhi jihlobah, tüsho arü atankih lapung, Pathros lomi ching belode arübah; tüsho ju ching arü akheamkhibe kiulongthsü labah. 15Ha kiulongthsü bolung khide akheamkhibe labah, tüsho küyimkishe trükshih kurungkheak mushuhkihlo, tüsho inü arü khide aninishihbah, junangde arünü küyimkishe trükshihbo kurungkheak yakzan mushuhlo. 16Ijiprü ju küyimkishe Israel yamkhün angükihpung müthsülo; küyimki arünü arung thsungkheak arü kilim rholobanü, ju amülim ah de alümkhitlobah. Judüki Israelnü I Atungpuh T H RÜ NPU H de mükheahbah.
17Kam mukukheak thüne ching, akhuhbe khinu, atan nipü Atungpuh yu I ki arü: 18Mihtsürü tsührü, Babilon kiulongthsüpuh Nebukednezar nü Tair azhihde api bonungrü müküpde rhimoshihchoh; mihbüm aban ku rakrak kamdo tüsho dubuh sühkhido; tütüshe api le anihbuh bonungrünü ju azhihde mihkhah bahkhi dün Tair chingnü tümü she müngü. 19Jumonü Atungpuh Thrünpuhnü ha thachoh: Inü Ijip lomi ju Babilon kiulongthsüpuh Nebukednezar kilim jihbah; tüsho apinü ju lakhit hana lubah, jangkhia tüsho yankhia lubah; tüsho ju api bonungrü thsungkheak mihkhahmo labah. 20Inü apinü arhimokhi dün khinusho nangde api kilim Ijip lomi jihdo, tümütüsho arünü I thsungkheak rhimodo, Atungpuh Thrünpuhnü thachoh.
21Ju nimung inü Israel juh akhiukshihbah, tüsho inü arü bolung nünü athashihbah. Judüki I Atungpuh de arünü mükheahbah.
Currently Selected:
EZEKIEL 29: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
