EZEKIEL 28
28
Tair Kiulongthsüpuh azhihde Müchitkhi
1 Atungpuh yu I ki arü: 2Mihtsürü tsührü, Tair yakzanshuhrü ki thaang, Atungpuhnü ha thachoh: Tümütüsho nü kükheanglah tüsho nünü tha, “ I thrünpuh khülang ah, inü ketobo phulung ching thrünpuhbo binpung binchoh,” tütüshe nünü nü lümkhi thrünpuh lümkhi kheak akeke she nü a mihtsürü khülang ah tüsho thrünpuh yung. 3Nü a Daniel kheaknü lümlung labe ah, junangde nü kheaknü tümü rama mülakhuk de lümchoh; 4nü lümlung tüsho nü anikhitkhinü nü lakhit hanmukhung, tüsho suna le shotoyinchibo nü rahpung-yam ching lumukhungdo. 5Nü shothsümolo ching lümlung ato hode nü lakhit alü thsüdo tüsho nü lakhit ching nü mulong kükheangde kamdo.
6Jumonü Atungpuh Thrünpuhnü ha thachoh: Tümütüsho nünü nü lümkhi Thrünpuh lümkhi kheak akeakheah, 7jumonü inü nü azhihde jaksorü atrebe trükshih handarübah; arünü akhamkhi nü lümlung azhihde nukshangbo thokhitbah tüsho nü mungthu müneanbah. 8Arünü alokhün ching nü nimyukbah, tüsho keto phulung ching nü a thsümütsüde ashebah. 9Judü lang, “ I a thrünpuh khülang ah,” de nü laksahrü miki thaba de? Nü a le nü yurirübo khah ching mihtsürü ah tüsho thrünpuh yung. 10Khiungkerübo khah hode nü a tsütamübahrü shenü ashebah; tümüde inü asukdo, Atungpuh Thrünpuhnü thachoh.
Tair Kiulongthsüpuh Lungkhi
11Kheaküshe Atungpuh yu I ki arü: 12Mihtsürü tsührü, Tair kiulongthsüpuh dünkheak tüzhoang, tüsho api ki thaang, Atungpuh Thrünpuhnü ha thachoh: Nü khiukdahkhi lümlungnü mide tüsho jaktsü ching khiukdahkhi amütsan lakheah. 13Nü a Thrünpuh shahwün, Eden ching lakheah; shotolungbonü nü züt thsü: shotomürüm-lung, shotolung-müküp, tüsho shihshihlung, wurüklung, lungmüsang, tüsho asherühü lung, shotolung-bluk, lungphüyak, tüsho lungmürüm; tüsho sunanü athsükhibo ju nü binpungbo tüsho nü künkihpungbo lakheah. Nü thrünkhi nimung jurübo tsanglung, 14mujude-mokhitkhi cherub khülangnü inü nü binshih; nü a Thrünpuh amüsüh müzüng kheak lakheah; nü azhingzhing shotolung bolung tsah. 15Nü thrünkhi nimungnü nü kheak amülim ngükhi khiungde nü a nü limrobo ching thülünde lakheah. 16Nü shothsümolo suhdahkhi ching athsümünimnü nü mide la, tüsho nünü neak yihbeak; jumonü amünean kukruk nangde Atungpuh müzüng chingnü inü nü bah, tüsho akümbuh cherubnü azhingzhing shotolung bolungnü nü yanabah. 17Nü jak tsümo nünü kükheang; nü mungthu hode nü lümlung thsümünim. Inü nü alo ching bah; inü nü kiulongthsürübo miki nü kheak arü mükbo mürüngshihpü lahkhita zojih. 18Nü amülim hihmonü, nü shothsümolo thiyuro mülakhi ching, nünü nü arüngakopungbo münean. Jumonü inü mo nü kheaknü yihkhit; junü nü aniuabah, tüsho nü ngürü alala miki inü nü alo kheak awahbo kamshih. 19Mihtsürü bolung sherünü nü mükheahlanü nü kheak müyinsah; nü a mihtrebe kamdo tüsho lünnü mülalo.
Sidon azhihde Müchitkhi
20 Atungpuh yu I ki arü: 21Mihtsürü tsührü, nü miro Sidon lim abinang, tüsho ju azhihde müchitang, 22tüsho thaang, Atungpuh Thrünpuhnü ha thachoh: Inü nü azhihde lah, O Sidon, tüsho nü phulung ching inü müretahbah. Küyimki inü ju ching mahkhapba, tüsho ju ching I amüsüh akhiukba, arünü I Atungpuh de mükheahbah; 23tümüde inü ju ching arüm-tukthsü yüshihbah tüsho ju wungdo ching thiyih bukshihbah, tüsho ju bolung ashekhi labah, thrip abannü nukshangnü ju azhihkhi alabah. Tüsho I Atungpuh de arünü mükheahbah.
Israel Müngühjihbah
24Israel yamkhünnü kheaküa amükeakbe khingphu yungsho achinkhitbe ayang arü bahyukde arhimorü arü yamhingrü bolung müngü. Tüsho I Atungpuh de arünü mükheahbah.
25Atungpuh Thrünpuhnü ha thachoh: Küyimki inü arü hiumüzütpung mihtsürü bolungnü Israel yamkhün bemukhungba, tüsho trükshihbo miki I amüsüh arü kheak akhiukba, judüki inü I yamlarü Jakob kilim jihkhi arü nihbuh lo kheak arünü alabah. 26Arünü ju ching tsüde alabah, tüsho thüyambo thsübah tüsho kurungasolubo thsübah. Arü bahyukde arhimorü arü yamhingrü alala kheak inü mahkhapchoki, arü tsüde alabah. Tüsho I Atungpuh arü Thrünpuh de arünü mükheahbah.
Currently Selected:
EZEKIEL 28: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
