EZEKIEL 21
21
Babilon ju Thrünpuh Mahkhap Nukshang
1 Atungpuh yu I ki arü: 2Mihtsürü tsührü, nü miro Jirusalem azhihde abinang tüsho arüngyam azhihde thsangyuthsangraang. Israel lomi azhihde müchitang 3tüsho anihbe ki thaang: Atungpuhnü ha thachoh: Inü nü azhihde lah. Inü nuktrüp chingnü nukshang dukkhitbah tüsho nü kheaknü thiyuro lakhi tüsho mihbukmuyuk chido lipkhibah. 4Tümütüsho inü thiyuro lakhi tüsho mihbukmuyuk lipkhibah, mihbüm aban düjinglimnü dukulim khiungde azhihde I nukshang müsütyuklo. 5Judüki mihtsürü alalanü I Atungpuhnü nuktrüp chingnü nukshang dukkhitkheah de mükheahbah; ha murholo.
6Jumonü asheang, mihtsürü tsührü! Arü miki mulong thsümünimde tüsho khühde lungride asheang. 7Tüsho küyimki arünü nü ki, “Tümüde nü ashecho le?” de keokhisho, nünü athabah, “Thiyusheak arükhi dünkheak. Mihbüm aban mulong niuthünakbah tüsho khah kikbah; me keahkhibah tüsho mukhuk niukbah. Ha arüchoh! Ha tsükjide adünjibah,” Wuto Atungpuhnü thachoh.
8 Atungpuh yu I ki arü: 9Mihtsürü tsührü, müchitang tüsho thaang, Atungpuhnü ha thachoh:
Nukshang khülang, nukshang khülang azükhitkhi tüsho aphekhitkhi–
10Alaksahpü thsungkheak zükhitkhi, chinchobe nangde phürappü phekhit!
Ju ching asühachihpü müla,
tümüde I mihtsürübonü dühdükhi tüsho thsümüchikhi mükhemükimdo.
11Nukshang ju phekhitpü akhudo,
khah ching shuhpü lah;
ha zükhita tüsho phekhita lah,
alaksahrü khah ching yukjihpü thsakhama lah.
12Zhiang tüsho tüzhoang, mihtsürü tsührü;
tümüde ha I mihtsürü azhihkhi lah;
ha Israel limberü alala azhihkhi lah.
Arübo I mihtsürü lungnü alaksahpü lah.
Jumonü nü khüh yümang.
13Inü I mihtsürü rükakichoh,
tüsho arünü mulong müthripü thsunglosho,
ha alala arü kheak dünjibah.
14Dale jumonü, mihtsürü tsührü, müchitang tüsho nü khah damang. Nukshang alochode achungbah. Ha alaksahpü thsungkheak–tode alaksahpü nukshang khülang, arü kheak thrip abande rihdochoh. 15Junangde mulong niuthünakbah tüsho akeamkhi hihbah, inü alaksahpü thsungkheak arü chipiripitbo alala kheak nukshang hanmukhungdo. O! Ha chinchobe nangde phürappü thsülah, alaksahpü ha thrüa ludo. 16O nukshang, tsülim lipang, jushu huzulim, nü nukhünü abin limpeang. 17I she I khahbo dambah, tüsho I mulong zhipzhip keamlobah. I Atungpuhnü asukdo.
18 Atungpuh yu I ki arü: 19Mihtsürü tsührü, Babilon kiulongthsüpuh nukshang yüpü limro mahne, ane chido lomi rukhüh chingnü tankihkhi amütsan thsang. Kiuto ching limro dübeakde yükhi amütsan khülang thsang. 20Amonrü kiuto Rabba azhihde arüpü nukshang limro khülang amütsan tüsho püpü ju Juda tüsho chipi ayünkhi Jirusalem azhihde thsang. 21Tümüde Babilon kiulongthsüpuhnü kuhi kheahpü limdübeak ching, limro mahne dübeakkhi kheak tuklobah: Apinü hühzo mahnenü azan thsübah, apinü anihbuh sangthsübo keobah, apinü shihmüsan kheak kheahbah. 22Api khah tsülim peang Jirusalem thsungkheak azan akhiukbah, küching apinü chipi-yümkheambe zoba, alaksahpü thiyukhüm jihpü, keochih düsheak zhipü, chipiripitbo yande chipi-yümkheambe zopü, alo wumujungpü tüsho sadambo thsübah. 23Arünü thiyuchihchimkhi ju arükchih müchitkhi nangde alabah, tüshe apinü arü mülimkhi lümkhitshihbah tüsho arü ramde atsobah.
24Jumonü Wuto Atungpuhnü ha thachoh: Tümütüsho nüsa mihtsürünü amikheaknü azhihde nüsa lümkhi ching nüsa mülimkhi handarü, nüsa rhimokhi alala ching nüsa neakbo akhiuka huh–tümütüsho nüsanü ha rhimokhinü, nüsa ramde atsobah.
25O amüneankhi tüsho mihbukmuyuk Israel yakzanshuhrü, shepü nimung arüa la, shepü thsümüchi kim akheam khiunga la, 26ha Wuto Atungpuhnü thachoh: Kuhingbe yihkhiang, kuthran yihkhitang. Ju ruk lakhi nangde ju müla: Abobe shuhkihbah tüsho shuhkih-a lakhi abobe kamshihbah. 27Athsümünim! Athsümünim! Inü ha kiuto thsümünimbah! Tüshe ha kiuto thsümüchipü mokhitkhi marüyi khiungde müdünji; api kilim inü ju jihbah.
28Tüsho nü, mihtsürü tsührü, müchitang tüsho thaang, Amonrü tüsho arü mükhemükimrü dünkheak, Wuto Atungpuhnü ha thachoh: Nukshang khülang, nukshang khülang, alaksahpü dukkhitdo, amuyupü phekhita tüsho chinchobe nangde phürappü lah! 29Nüsanü angükhi michihbo tüsho müchitbo akeangyu, nüsa mihbukmuyuk tüsho amütsürü tüsho nüsa akheam thsümüchipü nimung arüchoh, nukshang ju nüsa hungbo kheak keampü lah. 30Nukshang ju nuktrüp ching yukang. Nüsa thrünkhi dangpung ching nüsa asürüpung ching inü nüsa mahkhapbah. 31Inü I mulong zhipzhip nüsa kheak dungkihbah tüsho nüsa azhihde I bukakhiukkhi mo mütkihbah; inü nüsa bukmüke mihtsürü, athsümünimpü ching athsükhit mihtsürü khah ching jihbah. 32Nüsa monü thsümünimbah, nüsa thiyih nüsa lomi ching bukbah, nüsa kheaküa mülümkhitlo; tümüde I Atungpuhnü asukdo.
Currently Selected:
EZEKIEL 21: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
