EZEKIEL 22
22
Jirusalem Neakbo
1 Atungpuh yu I ki arü: 2Mihtsürü tsührü, nünü mahkhapba shi, nünü ha thiyih bukkhi kiuto mahkhapba shi? Anihbe athraneanbe rhimobo alala huhang 3tüsho thaang: Wuto Atungpuhnü ha thachoh: O nihbe bolung ching thiyih bukkhi tüsho sangthsükhinü müneankhi kiuto, nü kim arüchoh. 4Nünü thiyih bukkhinü nü amülim kamdo tüsho nünü athsükhi sangthsünü nü müneando. Nünü nü nimungbo phünide handarüdo, tüsho nü kambo akheam arüdo. Jumonü inü nü trükshihbo ki mükhemükim tüsho lomi alala ki münedung kamshihbah. 5Phünide alarü tüsho limshude alarünü nü keangrübah, O neamneamrurunü mide alakhi, mungchih kiuto. 6Israel limberü alalanü nihbuh sühmüh ching kinchoh tüsho laksahdo. 7Kiuto ching shenü she buhrü tüsho berü wüntre müjih; nünü khiungkerü mülapyuk tüsho buhrü mülarü le khimoberü kheahmüchihdo. 8Nünü I amüsüh kukrukbo mükhemükimdo tüsho I amunibo müneando. 9Nüsa mihtsürü khürü asheshihpü akeangyu tharü lah. Arü khürünü sangthsü kingaünkhibo tsühchoh tüsho yüliyürarü lah. 10Khürünü nihbuh abuh niube ki yapchoh. Khürünü khinu shihcham yükhi liberü thsümünimchoh. 11Khürünü nihbuh yamhingrü niube kheak athraneanbe yihbeakchoh, püpürünü nihbuh tsühmeakrü thsümünimchoh, tüsho püpürünü nihbuh chiniurü thsümünimchoh. 12Nüsa mihtsürü khürünü thiyih bukkhi buknim luchoh; nünü sholü alü luchoh tüsho nü yamhingrü kheaknü jangkhijangrakhinü alarü kamchoh. Tüsho nünü I mihabahdo, Wuto Atungpuhnü thachoh.
13Kheahang, nü ahühkhi tüsho alaksahkhi kheak inü I khah adanchoh. 14Inü nü keo nimung nü mulong tokhi laba de, yungsho nü khahbo sühmüh zahde alaba de? I Atungpuhnü asukdo, tüsho inü ju rhimobah. 15Inü nü trükshih bolung hiumüzütshihbah tüsho nü lomibo ching müzütshihbah, tüsho nü mümüsühkhi akheam thsüshihbah. 16Tüsho küyimki trükshihbo miki nü müneanbanü, I Atungpuh de nünü mükheahbah.
17 Atungpuh yu I ki arü: 18Mihtsürü tsührü, Israelrübo I ki yihnüpü müla. Arübo abahkhi yinchi lah–mürümmuchu lung, yinchiliolio, yinchi, tüsho motru ching shotoyinchi khih takkhikhi athünak-yinchi nangde lah. 19Jumonü Atungpuh Thrünpuhnü ha thachoh. Tümütüsho nüsa alala yihnüpü mülade kamdo, inü nüsa Jirusalem ching bemukhungbah. 20Khürünü shotoyinchi, sunalung, yinchi, yinchithünak, tüsho yinchiliolio aniushihpung hanmukhunga, jurübo niushihpü mo kheak mütkhi nangde; inü I bukakhiukkhi tüsho mulong zhipzhip ching nüsa bemukhungbah, tüsho inü nüsa yuka niuthünakshihbah. 21Inü nüsa bemukhungbah tüsho I mulong zhipzhip monü nüsa kheak mütbah tüsho nü ju ching niuthünakbah. 22Aniube ching shotoyinchi niuthünakkhi nangde, nü ju ching niuthünakbah tüsho I Atungpuhnü nü kheak mulong zhipzhip dungkihdo de nünü mükheahbah.
23 Atungpuh yu I ki arü: 24Mihtsürü tsührü, Israelrü ki thaang: arü lo mümüsüh de thaang, jumonü I bukakhiukde ju ching thsümüchichoh. 25Ju ching limberübo ju shiwüh chakthünakde arungkhi kekhüzü nangde lah; arünü mihtsürü rhangdung muyudo; arünü rahpungbo tüsho shoto ludo; arünü ju ching khimoberü hihde kamshih. 26Amükeamrübonü I yakzan lakmihdo tüsho I yo amüsüh kukrukbo müneanjihdo; arünü amüsühkhitkhi tüsho mümüsühkhi dükeak müpüthsü, arünü amüsüh tüsho amümüsüh dükeak müthsangyu, tüsho arünü I amunibo akinashu müla, junangde arü bolung I müneanjih. 27Ju ching lakhi atorübo ju shiwüh thonakbe, thiyih bukpü, thiyuro mülakhi alü ngüpü rhangdungbo thsümünimkhi rimrebo nangde lah. 28Wukihrübonü arü thsung thsüde amüyenü mujudo, arükchih michih ngüde tüsho arü thsungkheak Atungpuhnü müthakhi akeangyu müchitde thachoh, “Atungpuh Thrünpuhnü ha thachoh.” 29Lomi mihtsürünü jangkhijangra tüsho khukshik rhimodo; arünü zhochihrü tüsho müthsümülarü juno, tüsho alim mahoride khiungkerü ki jangkhijangrado. 30Tüsho chipi thsülopü tüsho lomi thsung thsüde chipi keamkhi ching zhippü arü bolung inü khürü yim, junangde inü ju müthsümünim; tüshe inü sheshe müyimkhit. 31Jumonü inü arü kheak I mulong zhipzhip dungkihkheah; arü rhimo dünkheak I bukakhiukkhi monü inü arü thsümünimbah; Atungpuh Thrünpuhnü thachoh.
Currently Selected:
EZEKIEL 22: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
