EZEKIEL 20
20
Azhih Israel
1Kam thüne, khinu phüngü, nimung thürü nipü, Israel azothsürü khürü Atungpuh ki keokhikeorapü arü, tüsho arübo I miki bin.
2Judüki Atungpuh yu I ki arü: 3Mihtsürü tsührü, Israel azothsürü ki asukang tüsho arü ki thaang, Wuto Atungpuhnü thachoh: Nüsa I keokhikeorapü arükhea de? Tsükjide I lale, nüsa I mükeokhishih, Wuto Atungpuhnü thachoh.
4Nünü arü mahkhapba shi? Nünü arü mahkhapba shi, mihtsürü tsührü? Dale tüsho arü buhrünü athraneanbe rhimokhibo arü ki mükheahshang, 5tüsho arü ki thaang: Wuto Atungpuhnü ha thachoh: Inü Israel mokhit nimung, inü I khah shuhkihde Jakob yamkhün tsühsoniuso ki thiyuchihchim thsü tüsho Ijip ching arü ki I akhiuka huh. I khah shuhkihde inü arü ki tha, “ I Atungpuh nüsa Thrünpuh.” 6Ju nimung inü arü ki Ijip chingnü arü thsungkheak yimkhitkhi niuhke tüsho mukhuke bukkhi lomi, alala kheaknü khide akhamkhi lomi ching bekhitpü arü ki thiyuchihchim thsü. 7Tüsho inü arü ki tha, “ Nüsa mihbüm abannü nüsa mük ki lakhi athraneanbe mejakbo yihkhita bahang, tüsho Ijip sangthsü kheak nü dümünean. I Atungpuh nüsa Thrünpuh.”
8Tüshe arünü I azhih tüsho I ki mani; arü mük ki lakhi athraneanbe mejakbo arünü yihkhita mübah, yungsho arünü Ijip sangthsübo mübahyuk. Jumonü I mulong zhipzhip arü kheak dungkihpü tüsho Ijip ching arü kheak I bukakhiukpü inü tha. 9Tüshe I mung chingnü arü lapung trükshihbo miki mümüneanpü inü rhimo tüsho arü mikinü Israelrü Ijip chingnü bekhitde I akhiuka huh. 10Jumonü inü arübo Ijip chingnü bekhit tüsho sunglo ching beyuk. 11Inü arü kilim I yakzan thsükhibo jih tüsho I yakzanbo arü ki mükheahshih, tümüde jurü mihyu anikhi hode mihbüm aban alabah. 12Kheaküshe isa dükeak amütsan thsüde arü kilim I yo amunibo jih, junangde I Atungpuhnü jurü müsühkhitdo de arünü mükheah.
13Tütüshe Israel mihtsürünü sunglo ching I azhih. Mihtsürünü mihyuanibah rhangdung lapü lalashe, arünü I yakzan thsükhibo müyan tüshe I yakzanbo bahyuk tüsho arünü shahde I amunibo müneanjih. Jumonü inü arü kheak I bukakhiuk dungkihbah tüsho sunglo ching arü dükheakshihbah de inü tha. 14Tüshe I mung chingnü rhimode trükshihbo miki mümüneanshihpü inü arü mikinü inü arübo bekhit. 15Kheaküshe inü arü kilim jihkhi lomi, niuhke tüsho mukhuke bukkhi lomi, khide akhamkhi lomi ching bede marüpü arü ki inü sunglo ching thiyuchihchim thsü, 16tümütüsho arünü I yakzanbo bahyuk tüsho I yakzan thsükhibo müyan tüsho I amunibo müneanjih; tümüde arü mulong arü sangthsübo dunglim yü. 17Tütüshe inü arü ki muzhode kheah tüsho arü müdükheakshih yungsho sunglo ching arü mükheamshih. 18Inü sunglo ching arü tsührübo ki tha, “ Nüsa bebuhrü yuzüngbo düyan yungsho arü yakzanbo düzo yungsho arü sangthsübo kheaknü nüsa müneana dulu. 19I Atungpuh nüsa Thrünpuh; I yakzan thsükhibo yanang tüsho I yakzanbo zopü kümkangang. 20I amunibo müsühde zoang, junangde jurübo isa dükeak amütsan khülang labah. Judüki I Atungpuh nüsa Thrünpuh de nüsanü mükheahbah.”
21Tüshe tsührübonü I azhih: Arünü I yakzan thsükhibo müyan, mihtsürünü mihyu anibah rhangdung lapü lalashe arünü I yakzanbo zopü mükümkang, tüsho I amunibo müneanjih. Jumonü sunglo ching arü kheak I bukakhiuk dungkihpü tüsho arü azhihde bukakhiukpü inü tha. 22Tüshe inü I khah tuklo, tüsho I mung chingnü arü mikinü arü bekhitkhi trükshihbo miki mümüneanshihpü inü rhimo. 23Kheaküshe arü trükshih bolung müzütpü tüsho lomibo ching hiumüzütpü sunglo ching I khah shuhkihde arü ki thiyuchihchim thsü, 24tümütüsho arünü I yakzanbo mani tüshe I yakzan thsükhibo bahyuk tüsho I amunibo müneanjih, tüsho arü bebuhrü sangthsübo kheak arü mük kheahkih-a lakheah. 25Kheaküshe amütsü thiyuzüngbo tüsho arü mülakhukbe yakzanbo inü arü kilim jih; 26inü arü treshihpü thsüde, arü akhuh zübekhi thsambahbo jihkhi hode inü arü müneanjih, junangde I Atungpuh de arünü mükheahbah.
27Jumonü, mihtsürü tsührü, Israel mihtsürü ki asukang tüsho arü ki thaang, Wuto Atungpuhnü ha thachoh: Ha ching she nüsa bebuhrünü I bahyukde mükhemükim yu thado: 28Küyimki inü arü kilim jihpü alokhikhi lomi ching arü bedarükhea tüsho arünü awung achang yungsho ayüniuniu sangdung ngükhea, ju ching arünü laksah-a kingaün, I bukakhiukpü thsüde kingaün jih, arü yo arhümthüneabebo jih tüsho arü yo ayungbe kingaünbo dungabah. 29Judüki inü arü ki tha: Nüsa yüpung achang dangpung ha tümü a? (Ha khihni Bamah#Bamah amütsan achang dangpung. de jichoh.)
Mahkhap tüsho Lalokhi
30Jumonü Israel yamkhün ki thaang: Wuto Atungpuhnü ha thachoh: Nüsa bebuhrünü arhimokhi yande nüsa müneana luba de tüsho arü yo sheak mülakhi mejak dunglim mulong jihba de? 31Küyimki nüsanü nüsa tsührübo mo ching shuhmülanga jihde nüsa thsambah jihbanü, nüsanü khihni khiungde nüsa yo sangthsübo alala kheaknü müneanchoh. Inü nüsa ki I keokhishihba de, O Israel yamkhün? Tsükjide I lale, Wuto Atungpuhnü ha thachoh, Inü nüsa ki I mükeokhishih.
32Nüsanü thachoh, “ Isanü trükshihbo nangde, sang tüsho lung tankihrü lomi mihtsürübo nangde lanelah.” Tüshe nüsa lüm ching tümü lanü müdünji. 33Tsükjide I lale, Wuto Atungpuhnü thachoh, Inü nüsa kurungkheak wuto khah tüsho achungkhitkhi bin tüsho mulong zhipzhip yakzan shuhbah. 34Inü wuto khah, achungkhitkhi khah, tüsho bukakhiukde nüsa müzütshihpung mihtsürü chingnü bekhitbah tüsho lomibo chingnü bemukhungbah; 35inü nüsa trükshihbo sunglo ching bedarübah tüsho ju ching mironü miro, nüsa kheak inü mahkhapbah. 36Inü nüsa mahkhapbah, Wuto Atungpuhnü thachoh. 37Inü nüsa I tso khüp hosihbah tüsho tangzüngkhi ching inü nüsa hanyukbah. 38Nüsa I azhihrü inü müsühkhitbah. Arü lakhi chingnü inü arübo bekhitkhit she, arübo Israel lomi ching müyüzah. Judüki I Atungpuh de nüsanü mükheahbah.
39Nü thsungkheaknü, O Israel yamkhün, Wuto Atungpuhnü ha thachoh: Nüsa mihbüm abannü yüang tüsho nüsa sangthsübo tankihang! Tüshe ju dunglim tsükjide nüsanü I ki anibah tüsho kheaküa nüsa thsambahbo le nüsa sangthsübonü I mung amüsüh mümüneanjih. 40Tümüde I yo amüsüh müzüng, Israel müzüng kheak, Wuto Atungpuhnü thachoh, ju lomi ching Israel yamkhün lüpdükhinü I tankihbah, tüsho ju ching inü arübo leangkhibah. Ju ching inü nüsa kingaünbo tüsho amokhitkhi nüsa thsambahbo, nüsa yo amüsüh shuhmülanga jihkhi bede yihnüpü labah. 41Inü nüsa trükshihbo chingnü bekhitchoki tüsho nüsa hiumüzütpung lomi chingnü bemukhungchoki rhümthüneabe nangde nüsa leangkhibah, tüsho trükshih miki nüsa bolung I amüsüh huhbah. 42Inü nüsa bebuhrü jihpü khah shuhkihde thiyuchihchimkhi Israel lomi ching bedarüchoki I Atungpuh de nüsanü mükheahbah. 43Ju ching nüsanü nüsa rhimorhiyi tüsho nüsa küdah thsüde müneankhi rhimobo lümkhitbah, tüsho nüsanü arhimokhi amütsü alalanü nüsa mukhiukbah. 44Küyimki inü I mung chingnü nüsa ki rhimorhiyibo tüsho nüsa amütsü limrobo tüsho athsümünim rhimobo yande mürhimobanü, I Atungpuh de nüsanü mükheahbah, O Israel yamkhün, Wuto Atungpuhnü thachoh.
Düjinglim azhihde Müchitkhi
45 Atungpuh yu I ki arü: 46Mihtsürü tsührü, nü miro düjinglim abinang; düjinglim azhihde thsangyuthsangraang tüsho düjinglim murung azhihde müchitang. 47Düjinglim murung ki thaang: Atungpuh yu soang. Wuto Atungpuhnü ha thachoh: Inü nü kilim mo thsahkihpü lah, tüsho junü nü sangdungbo alala aphüyak tüsho akung chido aniubah. Mo trukhi mükheamde alabah, tüsho mihbüm aban miro düjinglimnü dukulim khiungde takreapreapa labah. 48Ha I Atungpuhnü atakkihkheah de mihbüm abannü mükheahbah; ha müyihmüt.
49Judüki inü tha, “Ah, Wuto Atungpuh ! Arünü I dünkheak thachoh, ‘ Apinü shihdanglimyu thachoh yung de?’ ”
Currently Selected:
EZEKIEL 20: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
