EZEKIEL 18
18
Neak Yihbeakrü Me Shebah
1 Atungpuh yu I kilim arü: 2“Bebuhrünü kurungaso asan tsüh, tüsho tsührübo hü mütramlah” de ha müchityu Israel lomi dünkheak thakhi ha amütsan tümü a?
3Tsükjide I lale, Wuto Atungpuhnü thachoh, nüsanü ha müchityu Israel ching kheaküa mütha. 4Tümüde arhang lakhi me aban I yo ah, buhrü tüsho tsührü–ane chido I yo ah. Me küpünü neak yihbeakchonü ashebah.
5Mürangkhüh thiyuro-lungki mihtsürü khülang thiyuro tüsho alungki rhimorü lakhülaa– 6apinü müzüng arüngakopungbo ching müyimtsüh yungsho Israel yamkhün sangthsübo mükheahsho, apinü anihbuh yamhingrü niuberü mümünean yungsho aliberü khinu shihcham yüchoki anihbe kheak munungsho, 7apinü she mujuno, tüshe thiyuchihchimde alukhi shonip jihlochoh. Apinü jangkhijangra müthsü, tüshe akhümrü kilim api tsühyungpü jihchoh tüsho bünkeangrü kilim khimmih jihchoh. 8Apinü sholü lude münipjih yungsho sholü kihode mulu. Apinü amülim rhimopü chingnü akhah tuklochoh tüsho mihtsürü le mihtsürü dükeak tsüde khapjihchoh. 9Apinü I yakzan thsükhibo yanchoh tüsho thiyuro lade I yakzanbo zochoh. Ju mihtsürü thiyuro-lungki ah; api tsükjide alabah, Wuto Atungpuhnü thachoh.
10Thiyuthiyu api tsührü ahührü thiyih bukrü lah, shepünü harü rhimocho 11(abuhnü harü khülang she mührimomo she): Apinü müzüng arüngakopungbo ching yimtsühchoh, apinü anihbuh yamhingrü niuberü müneanjihchoh. 12Apinü zhochihrü tüsho müthsümülarü junochoh. Apinü jangkhijangra rhimochoh. Apinü thiyuchihchimde alukhi müjihlo, apinü sangthsübo kilim kheahchoh. Apinü athraneanbebo rhimochoh. 13Apinü sholü lude nipjihchoh. Hadürü mihtsürü alaba de? Api müla! Tümütüsho apinü harü athraneanbe alala rhimodo, api tsükjide asheshihbah tüsho api thiyih anihbuh kheak labah.
14Tüshe thiyuthiyu ha buh tsührü khülang lah, shepünü nihbuh abuhnü neak yihbeakkhi alala ngü, tüsho apinü ngüa lalashe, anihbuhnü hadürü mürhimosho: 15Apinü müzüng arüngakopungbo ching mütsüh yungsho Israel yamkhün sangthsübo mükheah. Apinü nihbuh yamhingrü niuberü mümüneanjih. 16Apinü sheshe mujuno yungsho shozüng thsungkheak thiyuchihchim mulu. Apinü müjangkhijangra tüshe akhümrü kilim api tsühyungpü jihchoh tüsho bünkeangrü kilim khimmih jihchoh. 17Apinü amülim chingnü khah tuklochoh tüsho sholü yungsho sholü alü mulu. Apinü I yakzanbo zochoh tüsho I yakzan thsükhibo yanchoh. Api anihbuh abuh neak dün müshe; api tsükjide alabah. 18Tüshe abuh a nihbuh neak dün shebah, tümütüsho apinü jangkhijangra rhimodo, nihbuh keoniorü mülapyukjih tüsho api mihtsürü bolung tümü amülimanü rhimodo.
19Tütüshe nünü thachoh, “Tümüde tsührünü nihbuh abuh amülim mühanrung le?” Tümütüsho tsührü junü thiyuro tüsho alungki rhimodo tüsho kümkangde I yakzan thsükhibo zodo, api tsükjide alabah. 20Neak yihbeakrü me ju ashebah. Tsührünü abuh amülim mühanrung, yungsho abuhnü tsührü amülim mühanrung. Thiyuro-lungkirü thiyuro-lungkikhi ju api kilim yukajakjihbah, tüsho mihbukmuyukrü mihbukmuyukkhi ju api yo thsübah.
21Tüshe mihbukmuyuk mihtsürü khülangnü nihbuhnü ayihbeakkhi neakbo alala chingnü rholosho tüsho I yakzan thsükhi alala zosho tüsho tümü thiyuro tüsho alungkianü rhimosho, api tsükjide alabah; api müshe. 22Apinü alakmihkhi tümü she api azhihde mülümkhit. Tümütüsho apinü thiyuro-lungki rhimokhinü api alabah. 23Mihbukmuyuk shekhi ching inü tümükhüh asühpü lade? Wuto Atungpuhnü thachoh. Ju müthri, küyimki arünü arü limro chingnü rholobah rhangdung labanü inü masühcho de?
24Tüshe mürangkhüh thiyurolungki mihtsürü khülangnü nihbuh thiyuro-lungki chingnü rholo tüsho neak yihbeaksho tüsho mihbukmuyuk mihtsürünü arhimokhi rukhüh athraneanbe rhimosho, api alaba de? Api thiyuro-lungki rhimokhi tümü she mülümkhit. Tümütüsho api thiyuro mülakhinü mülimde lah tüsho apinü neak yihbeakkhinü, api ashebah.
25Tütüshe nünü thachoh, “Atungpuh limro thiyuro yung.” Aniang, O Israel yamkhün: I limro thiyuro yung de? Nü limrobo thiyuro mülakhi yung de? 26Thiyuro-lungki mihtsürü khülang nihbuh thiyurolungki chingnü rholosho tüsho neak yihbeaksho, ju dünkheak api ashebah; apinü ayihbeakkhi neak dünkheaknü api ashebah. 27Tüshe mihbukmuyuk mihtsürü khülangnü anihbuhnü ayihbeakkhi mihbukmuyuk chingnü rholode tsosho tüsho tümü thiyuro tüsho alungkianü rhimosho, api rhangdung khümkhitbah. 28Tümütüsho apinü alakmihkhi alala lümakheahchoh tüsho jurü chingnü rholode tsochoh, tsükjide api alabah; api müshe. 29Tütüshe Israel yamkhünnü thachoh, “Atungpuh limro thiyuro yung.” I limrobo thiyuro yung de, O Israel yamkhün? Nü limrobo thiyuro mülakhi yung de?
30Jumonü, O Israel yamkhün, inü nüsa mihbüm aban nihbuh limrobo yande mahkhapbah, Wuto Atungpuhnü thachoh. Mulong müthriang! Nünü alakmihkhi alala chingnü rholode tsoang; junangde neaknü nüsa mükeamshih. 31Nünü alakmihkhi alala chingnü tsokhitang, tüsho mulong aso tüsho me aso ngüang. Tümü thsükhi nü ashepü, O Israel yamkhün? 32Tümüde inü khürükhüh shekhi ching masühchoh, Wuto Atungpuhnü thachoh. Mulong müthriang tüsho laang!
Currently Selected:
EZEKIEL 18: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
