EZEKIEL 17
17
Müleang Mahne tüsho Kurungaso
1 Atungpuh yu I ki arü: 2Mihtsürü tsührü, Israel yamkhün ki lümshangmang khülang keoang tüsho shihdanglimyu khülang thaang. 3Arü ki thaang, Wuto Atungpuhnü ha thachoh: Müleang ato khülang wulakhi ghidükeangbo, amoghidung ashang tüsho aphuaphu kihbah Lebanon ching arüdo. Cedar kurungkheak tholobah, 4apinü achangbe adübit zükshakdo tüsho ju yinzüyindorü lomi ching hande yüdo, apinü ju yinzüyindorü kiuto khülang ching zo.
5Apinü nü lomi chingnü müjih khürü lu tüsho alo atsü ching yuk. Apinü ju willow sang nangde ke suhdahkhi ching khim, 6tüsho ju chinkhit tüsho nimde achinkhi kurungaso kam. Akhahbo amüngüh abin, tüshe ayingbo alung ching la. Junangde kurungaso khülang kam tüsho adübitbo chin tüsho ayü niuniude akhiuk.
7Tüshe kheaküshe müleang püpü wulakhi ghidükeang tüsho amoghidung arihde akihkhi lakheah. Kurungasonü akhimpungnü api kilim aying chinde yü tüsho ke duhshihpü thsüde api kilim akhahbo chinde yü. 8Ha ke suhdahkhi alo atsü ching khima lakheah, junangde akhahbo chin, aso aso tüsho athukhi kurungaso khülang kam.
9Arü ki thaang, Wuto Atungpuhnü ha thachoh: Ha atoba de? Ha aying murukkhitba de tüsho aso murhokhamba de, junangde yiuhamübahpü? Aso chinkhi alala ayiuhbah. Ha aying chingnü arukkhitpü wu ato yungsho mihtsürü ahihkhüh yihnüpü müla. 10Ha khimdo tüshe ha atoba de? Aniakhiuklim pungnü ayünchoki asürüpung chingnü shahde yiuhamübahba de?
11Judüki Atungpuh yu I kilim arü: 12Ha azhih yamkhün ki thaang, Ha amütsan nünü mümükheah de? Arü ki thaang: Babilon kiulongthsüpuh Jirusalem lim yü tüsho kiulongthsürübo tüsho atorübo api lung Babilon lim belobah arü. 13Judüki apinü kiulongthsü yamkhün chingnü khülang lu tüsho api ki thiyuchihchim lude tangzüng khülang thsü. Apinü lomi adungto mihtsürübo she aramrü kamde bebah yü, 14junangde kiulongthsü ju masürükhukde abobe kamde, api tangzüng zokhinü lang alapü lakheah. 15Tüshe Juda kiulongthsüpuhnü khorabo tüsho bonungrü boto bepü api yunithsürü Ijip ching yüshihde api azhih. Apinü akukba de? Hadürü rhimorü tsokhiba de? Apinü tangzüng thsümünimba de tüsho atsokhiba de?
16Tsükjide I lale, Wuto Atungpuhnü thachoh, kiulongthsüpuh lomi küpü ching api kiulongthsü-binkiu kheak zojih, shepü thiyuchihchim apinü mükhemükimkhea tüsho api tangzüng thsümünimjihkhea, api Babilon ching shebah. 17Babilonrünü mihtsürü ahihdo laksahpü aheangsadambo tüsho müthrimbo thsüa lachoki, wulakhi Ijip kiulongthsüpuh bonungrünü she api keochihpü murungkhuk. 18Apinü thiyuchihchim mükhemükim tüsho tangzüng thsümünim. Apinü hadürü alala rhimo, api mutsokhi.
19Jumonü Wuto Atungpuhnü ha thachoh: Tsükjide I lale, apinü mükhemükimkhi thiyuchihchim tüsho apinü thsümünimkhi I tangzüng inü api ku kheak yihkihbah. 20Inü api thsungkheak keang dütrüna zobah, tüsho api I qimürip ching phuhbah. Inü api Babilon ching handarübah tüsho api kheak mahkhapbah tümütüsho apinü I ki thiyuro mülade lado. 21Alihde atsokhi api yo thirithsürü atsübo nukshangnü akeambah, tüsho arhang larübo apungbo ching hiumüzütbah. Judüki I Atungpuhnü asukkheah de nünü amükheahbah.
22Wuto Atungpuhnü ha thachoh: Inü cedar kurungkheaknü adübit lubah tüsho akhimbah; inü aliuhliuh khah athunu dübit chingnü ayihshakbah tüsho müzüng achangbe kheak khimbah. 23Israel müzüng achang kheak inü ju khimbah; hanü akhahbo chinbah tüsho aso asobah tüsho athukhi cedar khülang kambah. Wuhnubo mungji abannü ju ching asap shubah; arünü ju khahbo alamme ching ku alampung ngübah. 24Thulu sang dungbo alalanü I Atungpuhnü sangdung ashang kheamkhishihchoh tüsho sangdung anim shangshihchoh, sangrhangbo yiuhshihchoh tüsho sangshe-dungbo phüyakshihchoh de amükheahbah; I Atungpuhnü asukdo, tüsho inü ju rhimobah.
Currently Selected:
EZEKIEL 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
