EZEKIEL 16
16
Thiyuro-mülakhi Jirusalem
1 Atungpuh yu I ki arü: 2Mihtsürü tsührü, Jirusalem ki athraneanbebo mükheahshang 3tüsho thaang, Ha Wuto Atungpuhnü Jirusalem ki thachoh: Nü lamih tüsho nü zübekhi ju Kananrü lomi ching lakheah; nü buh ju Amorrü tüsho nü be ju Hitrü lakheah. 4Nü zübe nimung nü phülekhuh liu münipshak, yungsho kemümüyihjih, yungsho thiminü münan yungsho khimbo ching mühing. 5Shenü muzhode nü mükheah yungsho nü thsungkheak harü khürü rhimopü mihmuzho müla. Ju müthri, nü ju thulu mükeak ching bahkheah, tümüde nü zübe nimungnü nü kheahmüchih.
6Judüki I hode yü tüsho nü thiyih ching nünü mükhede ngü, tüsho nü thiyih ching nü yapde lachoki nü ki inü tha, “ Laang!” 7Thulu sangrung nangde inü nü toshih. Nü zokih tüsho zoban tüsho khide akheahakhamde kam. Nü treangbo duduh tüsho nü nam chin tüshe nü bünkeang tüsho aleangkheak lakheah.
8Ju dunglim I hode yü, tüsho nü kheak kheah; nü ju muzhoachihpü kim lakheah. Inü I khim münkheam nü kheak züngkihjih tüsho nü bünkeang lakhi lüpdojih. Inü nü ki thiyuchihchim jih tüsho nü kheak tangzüngpü ching yüzah, Wuto Atungpuhnü thachoh, tüsho nü I yo kam.
9Inü nü kemüyihjih tüsho nü kheaknü thiyih müsühjih tüsho nü kheak müdangke mujujih. 10Inü yakthsükhi khim nü kheak phukihjih tüsho jingkhümpü yukjih. Inü nü atsüdakbe azhingzhing phuyujih tüsho amo-achak khimmihnü nü lüpdojih. 11Inü nü kheak mürezhingzhingnü züt thsüjih: Inü khubo nü bin ching yukjih tüsho lak nü hung mükamde yukjih, 12tüsho inü nü nupung kheak nupung-nüpü tüsho nü nukubo kheak nüpü yukjih tüsho akheahakham kuthran nü ku kheak thranjih. 13Junangde nü suna tüsho shotoyinchinü züt thsüjih; nü khimbo ju atsüdak khimzhingzhing tüsho amo-achak anüpnüp khim tüsho yakthsükhi lakheah. Nü tsühyungbe ju atsüdak ayikangkang, mukhuke tüsho oliv müdangke lakheah. Nü khide akhamde kam tüsho kiulongthsüberü khülang thsüpü asürü. 14Tüsho nü akhamkhi hode nü mungthu trükshih bolung soride yü, tümütüsho inü atsüdak nü ki jihkhinü nü khiukdahde akhamde kam, Wuto Atungpuhnü thachoh.
15Tüshe nünü nü akheahakhamkhi ching mulonglam tüsho nü mungthu lakhinü müzammüram ahori. Nünü atsahhorü khürü kheak müzammüram thsüde nü arü yo kamshih. 16Nünü nü khimmih khürü lu tüsho nü thsungkheak akheahpü aphuaphu arüngakopungbo thsü, tüsho jurü kheak müzammüram thsü; hadürü müdünjiakheah yungsho küyimkishe adünjibe yung. 17Inü nü jihkhi atsüdak mürelungbo she lu, I yo suna tüsho shotoyinchinü athsükhi mürelung, tüsho nü thsungkheak athrürü sangthsübo thsü tüsho jurü kheak müzammüram thsü. 18Tüsho nünü jurü kheak phukihpü yakthsükhi khimbo lu, tüsho nünü I yo müdangke tüsho rhümthüneabe arü miki jih. 19Kheaküshe inü nü tsühyungpü jihkhi atsüdak ayikangkang, oliv müdangke tüsho mukhuke, rhümthüneabe nangde arü miki jih. Ha adünjikhi lah, Wuto Atungpuhnü thachoh.
20Tüsho nünü I kilim zübejihkhi tsührübo tüsho tsührübebo lu tüsho sangthsübo kilim tsühyungpü nangde shuhmülanga jih. Nü müzammüramkhi musuh de? 21Nünü I tsührübo laksahdo tüsho sangthsübo kilim shuhmülanga jih. 22Nünü athraneanbe rhimokhibo alala tüsho müzammüramkhi ching nünü nü bünkeang nü thiyih ching mürhede alakhi athunu nimungbo mülümkhit.
23Ayokhe! Nü ayokhe, Wuto Atungpuhnü thachoh. Nünü mihbukmuyuk rhimokhi alala kheak yukrude, 24nünü nü limro yean aban kheak sangthsü kingaünpü tüsho müzammüram dangpungbo thsü. 25Limro ku aban kheak nünü kingaün dangpungbo thsü tüsho atsahhorü aban ki nü küdah alü müzammüramde nü akheahakham thsümünim. 26Nünü nü shihkünkhi nü phünirü Ijiprü kheak müzammüram thsü, tüsho alü müzammüramkhinü I bukakhiukshih. 27Jumonü nü azhihde I khah chungkih tüsho nü lomi nükde kamshih; inü nü rhimo-yakli kheahbah achih ngürü, Filistiarü, nü riri kilim jih. 28Nünü Asiriarü kheak she müzammüram, tümütüsho nü reangmükeamde alakheah; tüsho ju dunglim she nü reangmükeamde alakheah. 29Judüki nünü shothsümolorü lomi Babilonrü kheak müzammüram alü kam tüshe junü she nü reangmükeamde alakheah.
30Wuto Atungpuhnü thachoh, nünü achih mühanrü müzammüramrü nangde harü alala rhimodo. 31Nünü limro ku aban kheak sadambo tüsho kiudunglimro aban ching kingaün dangpungbo thsü, tüshe nü a müzammüramrü ruk yungde alakheah, tümütüsho nünü adün mulu.
32Nü müzammüramkhi niuberü! Nünü nihbe niubuhrü kheaknü jaksorü alü mürühchoh! 33Müzammüramrü alala kilim athrürübonü sho jihchoh tüshe nünü nü muzhorü alala kilim sho jihchoh, tüsho müzammürampü alala chingnü nü kilim arüshihpü buknimchoh. 34Jumonü nü müzammüramkhi ching püpürü liberü kheaknü büthsülah; tüsho shenü nü kilim sho müjihde, nünü sho jihdo; nü büthsülah.
35Jumonü nü müzammüramrü, Atungpuh yu aniang! 36Wuto Atungpuhnü ha thachoh: Nünü müzammüramrü nangde nü muzhorü tüsho nü yo athraneanbe sangthsübo kilim bünkeang huh, tüsho sangthsübo kilim nü tsührübo laksah-a jih. 37Jumonü nü muzhorü, sherü kheak nü shih asühkhi ngükhea, sherü nünü muzhokhea tüsho thraneankhea, alala inü bemukhungbah. Arübo nü azhihde dangpung alala chingnü bemukhungbah tüsho arü ki nü bünkeang huhbah, tüsho arünü nü bünkeang ngübah. 38Inü nü müzammüramrü tüsho thiyih bukrü liberü nangde mahkhapbah; tüsho mulong zhipzhip le mükthsü ching nü kheak thiyih handarübah. 39Judüki inü nü muzhorü khah ching nü jihbah, tüsho arünü nü müzammürampung tüsho sangthsü kingaünpungbo alala thsümünimbah. Arünü nü khimmih züngkhia lubah tüsho atsüdak shoto zülu lubah nü bünkeang tüsho aleangkheak zojihbah. 40Arünü nü azhihde arhunganim boto bedarübah, arünü nü kheak lungnü arubah tüsho arü nukshangbonü nü adütre kamde alipthünakbah. 41Arünü nü yambo takkheambah tüsho aliberübo mikinü nü thsümüchibah. Inü nü müzammüram tukloshihbah, tüsho kheaküa nünü nü muzhorü ki müjihchung. 42Judüki nü azhihde I mulong zhipzhip keamlobah tüsho I mükthsü bukakhiuk nü kheaknü rholode atsobah; I azhihayihde akambah tüsho kheaküa bukmakhiuk.
43Tümütüsho nü athunu nimungbo nünü mülümkhit tüshe harübo hode I mulong zhipzhipshih, tsükjide nünü arhimokhi inü nü ku kheak handarübah, Wuto Atungpuhnü thachoh. Nünü athraneanbe rhimokhibo püpü alala lung yukrude yüliyüra müthsü de?
44Mihbüm abannü ha müchitnü Jirusalem dünkheak wuh-a thabah: “Berü nangde, tsührübe nangde.” 45Nü a aniubuh tüsho anihbe tsührübo thraneankhi, nü be tsührü ah; tüsho nü a arü niubuhrü tüsho arü tsührübo thraneankhi, nü chi pürü niurü ah. Nü be ju Hitrü tüsho nü buh ju Amorrü lakheah. 46Nü chi azopü ju Samaria lakheah, shepü anihbe tsührübebo lung dukulim lakhea; tüsho nü chi akheambe, anihbe tsührübe lung düjinglim lakhi ju Sodom lakheah. 47Nünü arü limrobo ching lang atsahkhi yung tüsho arü athraneanbe rhimobo lang akheahkhikhi yung, tüshe nü limrobo alala ching nahde arü kheaknü nü amütsübe kam. 48Tsükjide I lale, Wuto Atungpuhnü thachoh, nü chi Sodom tüsho anihbe tsührübebonü nü tüsho nü tsührübebonü arhimokhi mürhimo.
49Kheakü ha nü chi Sodom neak lakheah: Alibe tüsho anihbe tsührübebo bukmüke, bukchihbukhean tüsho muzhomüyi mülakhi lakheah; arünü zhochihrü tüsho müthsümülarü murung. 50Arünü lülüshishi tüsho I miki athraneanbe rhimo. Jumonü nünü angükhi nangde inü arü kheak rhimokheah. 51Samarianü nünü arhimokhi neakbo niukshakkhüh she müyihbeak. Nünü arü kheaknü alü athraneanbe rhimodo, tüsho nünü arhimokhibonü nü chi pürü thiyuro-lungki nangde kamshih. 52Nü achih arümang, tümüde nünü nü chi pürü thsungkheak thiyumütsan khürü jihdo. Tümütüsho nü neakbo ju arü kheaknü alü mütsüdakde alakheah. Arübo nü kheaknü alü thiyurolungki akhiukdo. Jumonü achihang tüsho nü mungchih arümang, tümüde nünü nü chi pürü thiyuro-lungki akhiukshihdo.
53Judüalalashe, inü Sodom tüsho anihbe tsührübebo, tüsho Samaria tüsho anihbe tsührübebo kuhi, tüsho arü lung nü kuhi jihlobah, 54junangde nü achih ngübah tüsho nü mungchih ngükhinü nü chi pürü mulong shukheambah. 55Tüsho nü chi pürü, Sodom lung anihbe tsührübebo tüsho Samaria lung anihbe tsührübebo atan künangde alakheanü ju lim rholobah; tüsho nü le nü tsührübebo nüsa atan künangde alakheanü ju lim rholobah. 56Nü kükheangkhi nimung ching nünü nü mün chingnü nü chi Sodom mükheyuk, 57nü mihbukmuyuk mülahkhityiki ah. Kheaküshe nü a Edom tsührübebo tüsho anihbe yamhingrü alala tüsho Filistia tsührübebo–nü mühirü alalanü nü mükhemükimchoh. 58Nünü nü yüliyürakhi tüsho athraneanbe rhimobo hanbah, Atungpuhnü thachoh.
59Wuto Atungpuhnü ha thachoh: Inü nü ki nü rhimo thülünnü arhimobah, tümütüsho nünü tangzüng thsümünimde I thiyuchihchim mükhemükimdo. 60Tütüshe inü nü athunu nimungbo ching nü ki tangzüngkhi lümkhitbah, tüsho inü akheam müla tangzüng nü kheak zobah. 61Judüki nünü nü chi pürü nü kheaknü azopü tüsho akheambe nünü leangkhichoki nünü nü limrobo lümkhitbah tüsho achih ngübah. Inü arübo nü kilim tsührübebo nangde ajihbah, tüshe inü nü kheak tangzüngkhi yande yung. 62Junangde inü nü kheak I tangzüng zobah, tüsho I Atungpuh de nünü mükheahbah. 63Judüki inü küyimki nünü arhimokhi alala dünthsükhibanü, nünü alümkhitbah tüsho achihbah tüsho nü junokhi dünkheaknü küyimkishe nünü nü mün mükhimshuh, Wuto Atungpuhnü thachoh.
Currently Selected:
EZEKIEL 16: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
