EZEKIEL 14
14
1Israel azothsürü khürü I ki arü tüsho I miki bin. 2Judüki Atungpuh yu I ki arü: 3Mihtsürü tsührü, harü mihtsürübonü arü mulong ching sangthsübo zhipshihlah tüsho arü mirobo miki mihbukmuyuk jingmükhelungbo yuklah. Inü judü lang arünü I dünkheak keokhishihba shi? 4Jumonü arü ki asukang tüsho thaang, Wuto Atungpuhnü ha thachoh: Küyimki Israelrü khürünü api mulong ching sangthsübo zhipshihba tüsho api miro ki mihbukmuyuk jingmükhelung yukba tüsho wukihrü khülang kilim yübanü, api sangthsü kingaün ato lakhi dünkheak I Atungpuhnü api ki alobah. 5Junangde arü sangthsübo thsungkheaknü I bahkhirü, Israel mihtsürü mulong inü tholobah.
6Jumonü Israel yamkhün ki thaang, Wuto Atungpuhnü ha thachoh: Mulong müthriang! Nüsa sangthsübo chingnü rholoang tüsho nüsa athraneanbe rhimobo alala tukloang! 7Küyimki Israelrü khürü yungsho Israel ching lakhi khiungkerü khürünü I kheaknü chamkhiba tüsho api mulong ching sangthsü zhipshihba tüsho mihbukmuyuk jingmükhelung amiro ki zoba, tüshe I keokhipü wukihrü ki yüba, I Atungpuhnü api ki alobah. 8Inü ju mihtsürü azhihde I miro anguhbah tüsho api ju amütsan khülang tüsho münedung kamshihbah. Inü I mihtsürü bolungnü api khekhita bahbah. Judüki I Atungpuh de nünü mükheahbah.
9Tüsho wukihrü ju müchityu thapü mülapyuka lasho, I Atungpuh nü ju wukihrü mülapyukkheah, tüsho inü api azhihde I khah chungkihbah tüsho I mihtsürü Israel bolungnü api dükheakshihbah. 10Arünü arü mülimkhi hanbah– wukihrü tüsho api ki keokhipü arükhi ane rukhüh thsümüchi ngübah. 11Judüki Israel mihtsürünü kheaküa I kheaknü mutso, yungsho arü neakbo alala hode arü müneana mulu. Arübo I mihtsürü thsübah, tüsho I arü Thrünpuh thsübah, Wuto Atungpuhnü thachoh.
Noa, Daniel tüsho Job
12 Atungpuh yu I ki arü: 13Mihtsürü tsührü, lominü thiyuro mülade I azhihde neak yihbeaksho tüsho ju azhihde tsühyungpü mülashihpü I khah chungkihsho tüsho khümzung yüshihsho tüsho mihtsürübo le shiwühbo laksahsho, 14harü mihtsürü mahsam– Noa, Daniel tüsho Job ju ching laa lalashe, arü thiyuro-lungki hode nihbuh lang khümkhitkhukbah, Wuto Atungpuhnü thachoh. 15Yungsho ju lomi hode inü mütüm shiwüh thiyikhüla tüsho arünü ju zhikrangkhündo zojihsho tüsho shiwühbo dünkheaknü shenü ju lomi muhokhukpü thsüde thsümünimsho, 16tsükjide I lale, Wuto Atungpuhnü thachoh, harü mihtsürü mahsam ju ching lalashe, arünü arü tsührübo yungsho tsührübebo mükhümkhitkhuk. Arü nihbuh lang khümkhitbah, tüshe lomi thsümünima labah. 17Yungsho ju lomi azhihde inü nukshang handarü tüsho thakhülaa, “ Nukshangnü lomi amuyung ching hode yüang,” tüsho inü mihtsürü tüsho arü shiwühbo laksahsho, 18tsükjide I lale, Wuto Atungpuhnü thachoh, harü mihtsürü mahsam ju ching lalashe, arünü nihbuh tsührübo yungsho tsührübebo mükhümkhitkhuk. Arü nihbuh lang khümkhitbah. 19Yungsho ju lomi ching inü arüm yüshihkhülaa tüsho thiyih bukshihde, mihtsürü tüsho arü shiwühbo laksahde I mulong zhipzhipkhülaa, 20tsükjide I lale, Wuto Atungpuhnü thachoh, ju ching Noa, Daniel tüsho Job arü she lalashe, arünü arü tsührü yungsho tsührübebo mükhümkhitkhuk. Arü thiyuro-lungki hode arü nihbuh lang khümkhitbah.
21Tümüde Wuto Atungpuhnü ha thachoh: Mihtrebe phüyi Jirusalem azhihde, nukshang, khümzung, mütüm shiwühbo tüsho arüm–mihtsürü tüsho arü shiwühbo laksahpü arüshihchoki küdükhüh amütsübe laba! 22Tütüshe ju ching rhangdung larü khürü labah–tsührübo ju chingnü bekhitbah. Arübo nü ki arübah, tüsho küyimki nünü arü limrobo tüsho rhimobo ngüba, inü Jirusalem kheak thsümütsü lüpdükhi handarükhi dünkheak mulong shukheambah. 23Nünü arü limrobo tüsho arü rhimobo ngüchoki nü mulong shukheambah, tümüde amütsan mülade ju ching inü tümü mürhimokhi nünü mükheahbah. Wuto Atungpuhnü thachoh.
Currently Selected:
EZEKIEL 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
