EZEKIEL 13
13
Arükchih Wukihrübo Bahyukkhi
1 Atungpuh yu I ki arü: 2Mihtsürü tsührü, müchitrü Israel wukihrü azhihde müchitang. Arü nihbuh lümkhi chingnü müchitrü ki thaang: “Atungpuh yu soang!” 3Wuto Atungpuhnü thachoh: Nihbuh me yanrü makharü wukihrü tüsho tümü müngürü ayokhe! 4O Israel nü yo wukihrübo, kiuto thsümünimkhi ching shirungbo nangde lah. 5Atungpuh nimung keochih ching düküngde azhippü thsüde nüsanü chipi zhakkhibo ching Israel yamkhün thsungkheak thsülopü muwutu. 6Arü michihbo arükchih tüsho arü müchitkhi akeangyu. Atungpuhnü arü müthiyide thachoh, “Atungpuhnü thachoh”; tüsho arü yu dünjipü arünü mükkin thsüchoh. 7Inü masuka lalashe, nüsanü, “Atungpuhnü thachoh” de athachoki arükchih michihbo tüsho akeangyu müchitkhibo nüsanü müngü de?
8Jumonü Wuto Atungpuhnü ha thachoh: Nüsa amülim yubo tüsho akeangyu michihbo hode, inü nüsa azhihchoh, Wuto Atungpuhnü thachoh. 9Arükchih michihbo ngürü tüsho akeangyu müchitrü wukihrübo kheak I khahnü azhihbah. Arübo I mihtsürü kiuthsü-binkiu lung mübe yungsho Israel yamkhün thrütlangkhi ching mübe, yungsho Israel lomi ching müyüzah. Judüki I Wuto Atungpuh de nüsanü mükheahbah. 10Tümütüsho arünü I mihtsürü bephülapde mungtsü mülachoki, “Mungtsü” de thachoh, tüsho chipi niukniukde athsüchoki arünü ju amüyenü mujudo. 11Amüyenü mujudorü ki ha akeambah de thaang. Tsüngnü düchi bede arübah, tüsho akingbeakshihpü arulung akishihbah, tüsho apung amüküpnü yünbeakshihbah. 12Küyimki chipi keambanü, Nüsanü amüyenü mujudokhi küching la de nüsa ki mükeoba de? 13Jumonü Wuto Atungpuhnü ha thachoh: I mulong zhipzhip ching inü apung amüküp tüsho I bukakhiukkhi ching arulungbo dükhebah tüsho tsüng ju düchibo bede athsümünimpü thsüde arübah. 14Nüsanü amüyenü mujudokhi chipi thokheambah tüsho alo kheak arih-a yapshihbah, junangde akhimtan lung aleangkheak labah. Küyimki ju keambanü ju ching nüsa dükheakbah; tüsho I Atungpuh de nüsanü mükheahbah. 15Jumonü inü chipi azhihde tüsho amüyenü mujudorü azhihde I mulong zhipzhipbah. Inü nüsa ki thabah, Chipi tüsho ju amüyenü mujudorü tsoabahdo– 16Israel wukihrü sherübonü Jirusalem ki müchitkhea tüsho mungtsü mülachoki mungtsü michih ngükhea, Wuto Atungpuhnü thachoh.
17Mihtsürü tsührü, kheakü nü mihtsürü tsührübebo arü lümkhinü müchitrü azhihde nü miro abinang. Arü azhihde müchitang 18tüsho thaang, Wuto Atungpuhnü ha thachoh: Mihtsürü phuhpü thsüde aliberü sherünü arü khujuh-khim alala kheak wurük thürekihcho tüsho aphuaphu ashangshang kudukiube thsüchonü ayokhe. Nüsanü I mihtsürü rhangdungbo phuhba de tüsho nüsa nihbe a küma zoba de? 19Barli müyikhüh tüsho yikhap dütrekhüh dün nüsanü I mihtsürü bolung I müneanjihdo. I mihtsürü ki akeangyu thaa anishihde, nüsanü müshepü larü laksahdo tüsho mülapü larü lashihdo.
20Jumonü Wuto Atungpuhnü ha thachoh: Wuhnubo nangde nüsanü mihtsürü phuhkhi nüsa wurükbo kheak inü azhihchoh tüsho inü jurübo nüsa bin kheaknü thokhibah; nüsanü wuhnubo nangde aphuhkhi mihtsürübo inü dükhebah. 21Inü nüsa kudukiubebo rukrüpbah tüsho nüsa khah chingnü I mihtsürü khümkhitbah, tüsho arübo kheaküa nüsa wu khüp atsühbe-shih müthsü. Judüki I Atungpuh de nüsanü mükheahbah. 22Nüsa akeangyubo hode inü müyuripü lümkhi mihtsürü atsü mulong ninishih. Nüsanü mihtsürübo amütsü tuklopü tüsho arü rhangdung khümkhitpü chingnü zhipdo. 23Jumonü kheaküa nüsanü arükchih michihbo müngü yungsho müchitmürabe müthsü. Nüsa khah chingnü inü I mihtsürü khümkhitbah. Tüsho judüki I Atungpuh de nüsanü mükheahbah.
Currently Selected:
EZEKIEL 13: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
