EZEKIEL 12
12
Ramtso Mütsanjihkhi
1 Atungpuh yu I ki arü: 2Mihtsürü tsührü, nü azhih mihtsürü bolung lachoh. Arübo angüpü mükbo lah tüshe müngü tüsho asopü nükhünbo lah tüshe muso, tümüde arübo azhih mihtsürü ah. 3Jumonü, mihtsürü tsührü, ramtso thsungkheak nü kukrukbo tsanglungang tüsho animuro kim ching arünü akheahchoki tsahmusuang tüsho püpü lim yüang. Arübo azhih mihtsürü thsüthsü she, khükijua arünü anikhitbah. 4Animuro kim ching arünü akheahchoki, ramtso thsungkheak nü kukrukbo lude akhiukang. Jushu arelim, arünü akheahchoki, ramtso ching yürü nangde wukhiukang. 5Arünü kheahde lachoki, chipi chingnü rhümashungang tüsho ju chingnü nü kukrukbo lukhitang. 6Arünü kheahde lachoki jurübo nü dubuh kheak yihkihang tüsho shuhyini ching hankhitang. Nü miro lüpdoang, junangde nünü alomi müngükhuk, tümüde inü Israel yamkhün ki nü amütsan khülang thsüjihdo.
7Junangde I ki thiyukhüm jihkhi nangde inü rhimo. Ramtso thsungkheaknü animuro inü I kukrukbo düma lubah akhiuk. Jushu arelim chipi ching I khahnü rhümashung. Arünü akheahchoki inü I kukrukbo animuro I dubuh kheaknü shuhyini ching hankhit.
8Yapsu Atungpuh yu I kilim arü: 9Mihtsürü tsührü, Nü tümü thsücho de azhih Israel yamkhünnü nü ki mükeokhi de? 10Arü ki thaang, Wuto Atungpuhnü ha thachoh: Ha müchityu ha Jirusalem ching yakzanshuhrübo tüsho ju ching larü Israel yamkhün athrünkhi dünkheak lah. 11Arü ki thaang, “ I nüsa ki amütsan khülang lah.” Inü rhimokhi nangde, ju arü ki rhimobah. Arübo ramtso ching aramrü nangde ayübah. 12Arü bolung yakzanshuhrünü shuhyini ching nihbuh kukruk dubuh kheak yihkihbah tüsho atsobah, tüsho api hode atsopü chipi ching rhümashungbah. Apinü alomi müngükhukpü thsüde amiro lüpdobah. 13Inü api thsungkheak keang zobah, tüsho I qimürip ching api phuhbah; inü api Kaldearü lomi Babilon ching handarübah, tüshe apinü ju müngükhuk, tüsho api ju ching shebah. 14Api mühide alarü atorübo tüsho api rithsürü alala apung ching müzütshihbah tüsho nukshang dukkhitbah inü arü müshambah. 15Inü arübo trükshih bolung tüsho lomibo ching müzütshihchoki I Atungpuh de arünü mükheahbah. 16Tüshe inü arübo nukshang, khümzung tüsho arüm chingnü aningshihbah, junangde arü yüpung trükshihbo alala ching arünü athranean rhimobo mütsanbah. Jushu arünü I Atungpuh de mükheahbah.
17 Atungpuh yu I ki arü: 18Mihtsürü tsührü, nü jim tsühchoki ajanang, tüsho nü ke yungchoki trede niukang. 19Lomi mihtsürü ki thaang: Jirusalem ching larü tüsho Israel lomi ching larü dünkheak Wuto Atungpuhnü ha thachoh: Arünü trechihtreande jim tsühbah tüsho adükheakkhi ching ke yungbah, tümüde ju ching larünü thsümünimkhi dünkheaknü lüpdükhi arü lomi chingnü akheamshihbah. 20Mihtsürü lakhi kiutobo thsümünima yapbah tüsho lomi zhikrangkhündo alabah. Judüki I Atungpuh de arünü mükheahbah.
21 Atungpuh yu I ki arü: 22Mihtsürü tsührü, Israel lomi ching müchitkhi ha tümü a: “ Nimungbo hokhamchoh tüsho michih aban tümü mülakhi kamchoh?” 23Arü ki thaang, “ Wuto Atungpuhnü ha thachoh: Ha müchitkhi inü akheam thsüshihbah, tüsho arünü kheaküa Israel ching ha müchityu mütha.” Arü ki thaang, Michih aban dünjipü nimungbo thüninde lah. 24Tümüde Israel mihtsürü bolung arükchih michihbo yungsho bephülapbe müchitbo kheaküa mülade alabah. 25Tüshe inü tümü lümbanü, I Atungpuhnü asukbah, tüsho ju muzhomade adünjibah. Tümüde nü nimungbo ching, O azhih yamkhün, inü tümüpürü thachonü inü adünjishihbah, Wuto Atungpuhnü thachoh.
26 Atungpuh yu I ki arü: 27Mihtsürü tsührü, Israel yamkhünnü thachoh, “Apinü angükhi michihbo kam ahihdo thsungkheak lah; apinü kim ashangbo thsungkheak müchitchoh.” 28Jumonü arü ki thaang, Wuto Atungpuhnü ha thachoh: I yubo khülang she muzhoma; inü tümüpürü thachonü adünjibah, Wuto Atungpuhnü thachoh.
Currently Selected:
EZEKIEL 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
