EZEKIEL 11
11
Israel Limberübo kheak Mahkhap
1Judüki menü I shuhkih tüsho aniakhiuklim abinkhi A TU N GPU H yam chipiripit ching bedarü. Chipiripit limro kheak ju mihtsürü 25 lakheah tüsho arü bolung inü mihtsürübo limberü Azzur tsührü Jaazania tüsho Benaia tsührü Pelatia ngü. 2Atungpuhnü I ki tha, “Mihtsürü tsührü, harü mihtsürü ha lümkhi amütsü thsürübo tüsho ha kiuto ching mihbukmuyuk athsunganah jihchoh. 3Arünü thachoh, ‘ Isanü nahde thüyambo thsülobah; ha kiuto ju phüh, tüsho isa ju shih ah.’ 4Jumonü arü azhihde müchitang; müchitang, mihtsürü tsührü.”
5Judüki Atungpuh me I kheak arü, tüsho athashihpü apinü I ki tha: “Atungpuhnü athakhi ju ha: Nünü ha thachoh, O Israel yamkhün, tüshe nü lüm ching tümü lanü inü mükheahlah. 6Nünü ha kiuto ching mihtsürü ahihdo laksah tüsho kiudunglimrobo asheminü mishih. 7Jumonü Wuto Atungpuhnü ha thachoh: Nünü abahkhi pangbo ju shih tüsho ha kiuto ju phüh, tüshe inü ju chingnü nü yankhitbah. 8Nünü nukshang trechoh, tüsho nü azhihde inü nukshang handarübah, Wuto Atungpuhnü thachoh. 9Inü kiuto chingnü nü yankhitbah tüsho khiungkerü khah ching nü yukjihbah tüsho nü kheak mahkhapbah. 10Nukshangnü nü keambah, tüsho Israel aredung kheak inü nü kheak mahkhapbah. Judüki I Atungpuh de nünü mükheahbah. 11Nü thsungkheaknü ha kiuto phüh khülang müthsü, yungsho ju ching nü shih müthsü; Israel aredung kheak inü nü kheak mahkhapbah. 12Tüsho I Atungpuh de nünü mükheahbah, tümüde nünü I yakzan thsükhibo müyan yungsho I yakzanbo muzo tüshe nü mühi trükshih yuzüngbo kheak mulong jih.”
13Kheakü inü müchitchoki Benaia tsührü Pelatia sheabah. Judüki inü miro mükhüm tüsho düsheak achangnü trip, “Ah, Wuto Atungpuh ! Israel aningkhi nünü shahde dükheakshihba de?”
14 Atungpuh yu I kilim arü: 15Mihtsürü tsührü, nü keoniorü khung tüsho Israel yamkhün athrünkhi ki Jirusalem ching larünü tha, Arübo Atungpuh kheaknü limshude lah; ha lo ha isa yamalo thsüpü jihkheah.
Israel Alodarüpü Alokhikhi
16Jumonü thaang: Wuto Atungpuhnü ha thachoh: Inü arübo trükshih bolung limshude yüshihshih she tüsho lomi bolung ching arü hiumüzütshihshih she, arü yükhi lomibo ching arü thsungkheaknü I arüngakopung khülang lakheah.
17Jumonü thaang: Wuto Atungpuhnü ha thachoh: Trükshihbo chingnü inü nüsa bemukhungbah tüsho nüsa hiumüzütkhi lomibo chingnü belodarübah, tüsho nüsa kilim inü Israel lomi jihlobah. 18Arünü ju ching rholobah tüsho achihbe-yakli mejakbo tüsho athraneanbe sangthsübo lahkhita bahbah. 19Inü arü kheak mulong khülang jihbah tüsho arü kheak me aso khülang yukjihbah; inü arü shih chingnü lung mulong yihkhitbah tüsho arü kilim shihtsü mulong jihbah. 20Jushu arünü I yakzan thsükhibo yanbah tüsho I yakzanbo zopü kümkangbah. Arü ju I mihtsürü thsübah, tüsho I ju arü Thrünpuh thsübah. 21Tüshe sherü arü yo sheak mülakhi mejakbo tüsho athraneanbe sangthsübo ki mulong jihchonü, inü arünü arhimokhibo arü nihbuh ku kheak hankihjihbah, Wuto Atungpuhnü thachoh.
22Judüki cherubim, arü rheang ki lolungbe-jingbo bebah arü ghidükeang shuhkih, tüsho Israel Thrünpuh müretahkhi arü kumung lakheah. 23Atungpuh müretahkhi kiuto chingnü yükih tüsho aniakhiuklim müzüng kheak tuklo. 24Menü I shuhkih tüsho Thrünpuh menü ajikhi michih ching I Babilon ching ramtsorü kilim bedarü. Judüki inü angükhi michih I kheaknü yükihabah, 25tüsho Atungpuhnü I ki huhkhi lüpdükhi inü ramtsorü ki tha.
Currently Selected:
EZEKIEL 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
