EZEKIEL 10
10
Arüngyam chingnü Atungpuh Müretahkhi Chamachih
1Inü kheah, tüsho cherubim kubo kurungkheak adüthrün kumung ju shotolung-bluk kiulongthsü-binkiu nangde ngü. 2Atungpuhnü khim zhingzhing phuyubuh mihtsürü ki tha, “Cherubim khüp lolungbe-jingbo lung yüzahang. Cherubim bolung ching mokhih takkhi ching nü khahbo athsoyukang tüsho jurübo kiuto kumung hiumüzütang.” Tüsho inü akheahchoki, api yüzah. 3Mihtsürü yüzahchoki cherubimbo ju arüngyam düjinglim zhipde alakheah, tüsho amonü alungbe khikzhakpung mi. 4Judüki Atungpuh müretahkhi cherubim kumungnü wusu tüsho arüngyam ripit ki yü. Amonü arüngyam mide kam, tüsho Atungpuh müretahkhi zhingzhingnü khikzhakpung mide alakheah. 5Cherubim ghidükeangbo düsheak ju Wuto Atungpuhnü asukchoki düsheak nangde, khikzhakpung aleangbe limshu chingnü so.
6Küyimki Atungpuhnü khim zhingzhing phuyubuh mihtsürü ki thiyukhüm jihkhea, “Cherubim bolung, lolungbe-jingbo chingnü mo luang,” mihtsürü junü yüzah tüsho lolungbe-jing khülang ki zhip. 7Judüki cherubim khülangnü arü bolung lakhi mo kilim akhah chungkhit. Apinü khürü lu tüsho khim zhingzhing phuyubuh khah ching yukjihbah apinü ju lu tüsho wukhiuk. 8Cherubim ghidükeangbo khüp ju mihtsürü khahbo nangde alakheah.
9Inü kheah, tüsho cherubim aban rheang ki lolungbe-jing phüyi ngü; lolungbe-jingbo ju shoto zhingzhing nangde rakrak alakheah. 10Arü shihphü ju, arü phüyi akheahpü rukhüh lakheah; arü abande mükhapachihkhi lolungbe-jing nangde lakheah. 11Arü aphapchoki, cherubim abinkhi thrip khülang lim yü; cherubim yüchoki lolungbe-jingbonü münihlo. Cherubimnü manguhlodü lang ku anguh limpeang yü. 12Pangbo alala, arü düthsünbo bede, arü khahbo tüsho arü ghidükeangbo tüsho lolungbe-jingbo mükjibonü mide alakheah. 13Inü ajingbonü ajikhi so, “Aheankhi lolungbejingbo”. 14Cherubim abande miro phüyi lakheah: Khülang miro ju cherub nangde, mahnepü ju mihtsürü miro, mahsampü ju kekhüzü miro, tüsho phüyipü ju müleang miro lakheah.
15Judüki cherubimnü akulim wusurü. Harü ha Kebar Ayung ki inü angükhi arhang shiwühbo lakheah. 16Küyimki cherubim aphapkheanü, arü rheang ki lolungbe-jingbo aphap; tüsho cherubimnü alo kheaknü asürüpü arü ghi chutreakchoki, lolungbe-jingbonü arü lung yü. 17Küyimki cherubim zhikde azhipkhea, arü she zhikde zhip; tüsho küyimki cherubim wusukhea, arünü arü lung wusu, tümütüsho arhang shiwühbo me arü kheak lakheah.
18Judüki arüngyam ripit kinü Atungpuh müretahkhi chamachih tüsho cherubim kumung tuklo. 19Inü kheahde lachoki, cherubimnü arü ghidükeangbo chutreak tüsho alo kheaknü wusurü, tüsho arü yüchoki, lolungbe-jingbo arü lung yü. Arünü Atungpuh yam aniakhiuklim chipiripit limro kheak tuklo, tüsho Israel Thrünpuh müretahkhi arü kumung lakheah.
20Harü ha Kebar Ayung ki Israel Thrünpuh bukkhüp inü angükhi arhang shiwühbo lakheah, tüsho arü ju cherubim thsüa lah de inü mükheahdo. 21Arü aban miro phüyi tüsho ghidükeang phüyi lakheah, tüsho arü ghidükeangbo khüp ju mihtsürü khah nangde lakheah. 22Arü mirobo ju inü Kebar Ayung ki ngükhi nangde rukhüh lakheah. Arü abannü mikhuhlim langakindo yü.
Currently Selected:
EZEKIEL 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
