EZEKIEL 1
1
Thrünpuh Kiulongthsü-binkiu
1Kam samrüpü, khinu phüyi ching, nimung phüngü nipü, I Kebar Ayung ki ramtsorü bolung lachoki, yinmibo khimshuhkhi inü ngü, tüsho inü Thrünpuh michihbo ngü. 2Ju khinu nimung phüngü nipü (ha kiulongthsüpuh Jehoiakin ramtsokhi kam phüngüpü lakheah), 3Kebar Ayung ki Kaldearü lomi ching, Buzi tsührü amükeambuh Ezekiel kilim Atungpuh yu arü; tüsho ju ching Atungpuh khah api kheak lakheah.
4Inü kheah, tüsho dukulim tsüngpungtsüngpung khülang arükhi ngü–amo ato ching chinchobe phürapde tüsho atahkihkhi ayinnü mükamdoa lakheah. Aphulungbe mo ju müwayinchi taklamlamkhi nangde lakheah, 5tüsho mo ching ju arhang shiwüh phüyi nangde kheah. Arü shihphü ju mihtsürü khülang nangde, 6tüshe arü mihbüm abande miro phüyi tüsho ghidükeang phüyi lakheah. 7Arü jingbo ju chungthülangdo alakheah; arü müphübo ju moshi nunu biuo nangde tüsho müwayinchi rakrakkhi nangde rakrak alakheah. 8Arü thrip phüyi kheak arü ghidükeang khüp ju mihtsürü khahbo lakheah. Arü phüyi alala mirobo tüsho ghidükeangbo lakheah, 9tüsho arü ghidükeangbonü khülangnü khülang kheak qiuachih. Mihbüm aban mikhuhlim langde yü; arü aphapchoki arünü murholo. 10Arü miro kheahpü ju ha ruk: Phüyi abande mihtsürü miro lakheah, tüsho tsülim thrip abande kekhüzü miro, tüsho huzulim thrip moshipung miro lakheah; kheaküshe abande müleang miro lakheah. 11Ha ruk arü mirobo lakheah. Arü ghidükeangbo mutuhlim chutreaka lakheah; arü abande ghidükeang mahne, khülangnü püpü shiwühbo ghidükeang thrip aban qiu, tüsho ghidükeang mahnenü pangbo lüpdo. 12Arü chidonü mikhuhlim langakindo yü. Kürü ching me yübanü arünü manguhphülapde yü. 13Arhang shiwühbo jakphü ju mokhih aniukhi yungsho tsün nangde alakheah. Monü shiwüh bolung dunglim tüsho müngüh yüla arülade alakheah tüsho mo chingnü chinchobe akhiuk. 14Shiwühbonü chinchobe phürapkhibo nangde dunglim tüsho müngüh yungdüyü yunglodarü de thsü.
15Inü arhang shiwühbo kheak kheahchoki, shiwüh phüyi aban rheang ki lolungbe-jing alo kheak dubiuoa lakhi shiwühbo inü ngü. 16Lolungbe-jing akheahpü tüsho apang ha lakheah: Jurü ju shotolung nangde rakrak la, tüsho phüyi alala akheahpü rukhüh, lolungbe-jing mükhapachih-a alakheah. 17Junangde lolungbe-jingbonü thrip phüyi ching yükhukde alakheah. 18Arü phuhphobo ju achang tüsho atrebe, tüsho phuhpho phüyi alala mükamde mükjibo kih. 19Küyimki arhang shiwühbonü aphapkheanü, arü rheang ki lolungbe-jingbonü hean; tüsho küyimki arhang shiwühbonü alo kheaknü wusurükheanü, lolungbejingbo she wusu. 20Kürü ching me yükheanü, arünü yü, tüsho lolungbejingbonü arü lung wusu, tümütüsho shiwühbo me ju lolungbe-jingbo ching lakheah. 21Küyimki shiwühbonü aphapkheanü, arü she aphap; küyimki shiwühbo zhikde azhipkhea, arü she zhikde zhip; tüsho küyimki shiwühbo alo kheaknü asürübanü, lolungbe-jingbo she arü lung wusu, tümütüsho shiwühbo me ju lolungbe-jingbo ching lakheah.
22Arhang shiwüh kubo kumung kheak akheahpü ju adüthrün nangde, müsanglung nangde zhingzhing, tüsho atrebe lakheah. 23Adüthrün khüp ju arü ghidükeangbo chutreak, tüsho mihbüm aban apang lüpdokhi ghidükeang mahne lakheah. 24Küyimki shiwühbo aphapkhea, inü arü ghidükeangbo, ke bukkhi, Wuto düsheak, bonungrü adanasünkhi nangde so. Küyimki arü zhikde azhipbanü, arünü arü ghidükeangbo keamkhi. 25Judüki arü ghidükeang keamkhia lachoki arü ku kumung thüning kumungnü düsheak khülang arü.
26Arü ku kumung thüning kumung lakhi ju shotolung-bluk kiulongthsü-binkiu nangde lakheah, tüsho kiulongthsü-binkiu kumung achang kheak ju mihtsürü jak nangde alakheah. 27Jakphü ju mo phulung zhingzhingkhi müwayinchi nangde alakheah. Junü alala ching zhingzhingde yinshih. 28Tsüng arükhi nimung amo ching mürechin nangde, ju mükamde ayin-zhingzhing lakheah.
Ha Atungpuh müretah akhiukkhi lakheah. Küyimki inü angükhea, inü I miro koyu tüsho khülangnü asukkhi düsheak inü so.
Currently Selected:
EZEKIEL 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
