TÜZHOKHI 5
5
Mihmüthsüm thsungkheak Tamkhüntamnü
1O Atungpuh , isa kheak tümü keamkih-a lanü lümkhitjang;
mürüngang, tüsho isa achih ngükhi kheahang!
2Isa yamrüplurüp mihsorü kilim tsodo,
isa yambo khiungkerü kilim tsodo.
3Isa mürerü, buhrü-mülarü kamdo;
isa berübo khimoberübo nangde lah.
4Isanü ayungkhi ke dün isanü ajihpü kamchoh;
atakbe-sang athulopü kamchoh.
5Isa müshamrübo isa lahzhi ki lah;
isa khia lah, isa sühakhim müla.
6Yikhap suhde angüpü isanü Ijip tüsho Asiria kheak arihdo.
7Isa jipürübonü neak yihbeak; arü kheaküa müla,
tüsho isanü arü amülimbo hanlah.
8Azhorübonü isa kurungkheak yakzan shuhchoh,
arü khah chingnü isa bekhitpü she müla.
9Isa rhangdungbo atrebe chingnü isanü yikhap ngüchoh tümütüsho sunglo ching nukshang lah.
10Khümzungnü isa küp mokin nangde taklah.
11Zion ching aliberübo,
Juda kiutobo ching atsangkhitkhibo kheak amütsü thsüdo.
12Yakzanshuhrübo arü khahbo kheaknü zhinlah;
azothsürübo ki wüntre müjih.
13Athrününgtsüngbo hi chupü nimkihchoh,
tüsho athrürü nunubo sanghahnü ajapchoh.
14Azobuhrübonü kiuto chipiripit bahbah tsodo,
athrününgtsüngbonü khün müthsüdebahdo.
15Isa mulong asühkhi keamdo;
isa tsünkhi ju mitrippü kamdo.
16Isa ku kheaknü kuthran ayokhido;
isa are, tümüde isanü neak yihbeakdo!
17Ha dünkheaknü isa mulong tukthsülah,
harübo hode isa mükbo tsünshelakdo kamdo:
18Zion müzüng zhikrangkhündo alakhinü shirungbonü ju kheak apheanchoh.
19O Atungpuh , tüshe nünü lünnü kiulongthsüchoh;
nü kiulongthsü-binkiu lünnü lün lachoh.
20Tümüde nünü isa shahde mih-a la?
Tümüde nünü isa haruhroro bahyukkhea?
21Isa nü kilim beloang, O Atungpuh , junangde isa lalobah;
adüso nangde isa nimungbo aso kamshang–
22nünü isa shahde bahyuka mülasho,
tüsho makekhukpü thsüde bukakhiuka lah yungsho.
Currently Selected:
TÜZHOKHI 5: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
