YUZÜNGTHALO 33
33
Mosanü Israel Müngühjihkhi
1Ha müngühmühi ha Thrünpuh mihtsürü Mosanü api shepü müngüh Israel tsührübo müngühjihkhi ah. 2Apinü tha,
“Atungpuh Sinai chingnü arü tüsho Seir chingnü isa kheak yinkhi;
apinü Paran müzüng chingnü tahkih,
api amüsührü chithürü thürü lungnü arü,
akhah tsülim peang amüküp yakzan lakheah.
3Am, apinü amihtsürü muzho;
api kilim müsühkhitrübo alala api khah ching lakheah;
jumonü isanü api jing ki binchoh tüsho api yubo leangkhichoh,
4Mosanü isa kilim jihkhi yakzan Jakob boto yamalo lah.
5Küyimki mihtsürü limberübo tüsho Israel trükbo alala mukhungkhea,
hanangde Jeshurun ching Atungpuh ju kiulongthsüpuh kam.
6Reuben rhangdung lashang, tüsho düsheshih,
yungsho api mihtsürü nükde dükamshih.” @SP ACE =
7Tüsho apinü Juda thsungkheak ha tha:
“O Atungpuh , Juda düsheak sojang,
tüsho amihtsürü bolung api bebah arang;
anihbuh khahnü azangrü tsunglochoh,
tüsho api riri azhihde api rungang.” @SP ACE =
8Tüsho Levi dünkheak apinü tha,
“Atungpuh , nü yo Thummim tüsho Urim amüsüh mihtsürü Levi kilim jihang,
shepü kheak nünü Massa ching rükakikhea,
shepü kheak Meriba ching nünü shochihkhea;
9shepünü abuh tüsho abe ki, ‘Inü arü mümükheah’ de athakhea;
apinü akhiung bahyuk tüsho atsührübo mümükheahde kam.
Tümüde arünü nü yu ani tüsho nü ki tangzüngkhi zo.
10Arünü Jakob ki nü yuzüngbo tüsho Israel ki nü yakzan thsangyubah;
arünü nü miki arhümthüneabe yukbah,
tüsho nü kingaün sadam kheak taka kingaünbah.
11O Atungpuh , api lakhibo müngühjang,
tüsho api khahnü rhimokhibo leangkhijang;
api azhihrü tüsho api thraneanrü müchero yihshakjang,
junangde arü masürülo.” @SP ACE =
12Apinü Benjamin dünkheak tha,
“Atungpuhnü amuzhodakkhi,
apinü akümkhi ching lachoh;
apinü nimung amuyung neakchoh
tüsho api dubuh dükeak api sühakhimchoh.” @SP ACE =
13Josep dünkheak apinü tha,
“Thüning kumungnü amokhitkhi thsambahnü,
tüsho alunglim lakhi kenü,
Atungpuhnü amüngühjihkhi api lo thsang;
14aninü asoshihkhi atsübe tüsho khinubonü suhdahde akhiukshihkhinü,
15adüso müzüngbo chingnü akhiukkhi atsüdakbe,
tüsho akheam mülakhi awungbo kheaknü akhiukkhinü,
16api lo atsü alalanü mishang,
sangrung aniukhi ching lakhi Atungpuhnü müngühshang.
Harü müngühmühi trük kheak arüshang,
tümütüsho khiungmungrü bolung api limberü lakheah.
17Api müretahkhi ju akhuh adrekhi moshipung kiphahlah,
api juh ju mütüm moshipung kiphahlah;
jurünü alomi akheam alala khiungde apinü trükshihbo khubah;
Ephraimrü chithürü thürübo tüsho Manaserü chithürübo.” @SP ACE =
18Tüsho Zebulun dünkheak apinü tha,
“Zebulun, nü yükhi ching, asühang;
tüsho Issakar, nü khimyambo ching asühang.
19Arünü mihtsürübo arü müzüng ching jiyukbah;
ju ching arünü thiyuro kingaünbo jihchoh;
tümüde arünü kekim lakhit tüsho rama lakhi loyi lakhit dukchoh.” @SP ACE =
20Tüsho Gad dünkheak apinü tha,
“Gad wüh toshihbuh shiang!
Gadnü kekhüzü nangde aleangchoh,
apinü bin, tüsho thangphülang zamnakchoh.
21Apinü anihbuh thsungkheak alo atsüdak mokhit,
tümüde ju ching limthobuh shihcham müküh-a lakheah;
tüsho apinü mihtsürü limberübo kilim arü,
apinü Israel lung thiyukhüm tüsho Atungpuh thiyuro yakzan rhimo.” @SP ACE =
22Tüsho Dan dünkheak apinü tha,
“Dan a Bashan chingnü ajukkhitkhi kekhüzü nunu ah.” @SP ACE =
23Tüsho Naphtali dünkheak apinü tha,
“O Naphtali, mihmuzho ching reangkeamlah,
tüsho Atungpuh müngühmühinü mithülamlah,
Galilee kechih tüsho düjinglim khiungde lah.” @SP ACE =
24Tüsho Asher dünkheak apinü tha,
“Asher tsührübo kurungkheak müngühmühi lah;
api a khiungmungrünü lunekhi thsüshang,
tüsho ajing müdangke ching thsamshang.
25Nü sangkhrihbe ju yinchi tüsho müwayinchi labah;
tüsho nü nimungbo yande, nü sühmüh labah.” @SP ACE =
26“O Jeshurun, Thrünpuh nangde sheshe müla,
shepünü nüsa rungpü achang yinmi hode,
tüsho api kiulongthsü thüning hode arücho.
27Akheam mülakhi Thrünpuh ju nü lapung lah,
tüsho abukkhüp lakhi ju akheam mülakhi khahbo ah.
Tüsho apinü thiriri nüsa müngühnü yana tsoshihchoh,
tüsho tha, ‘Dükheang.’
28Jumonü Israel a kurampung ching lah,
Jakob kekhip küma zolah,
hi tüsho yukhu lakhi lo ching,
thüningbonü ayinke akishihchoh.
29O Israel, nü asühpü! Shepü nü nangde la,
Atungpuhnü khümkhitkhi mihtsürübo,
nü rungpü thsungkheak tsung tüsho nünü akukpü thsungkheak thsühnuk!
Thiriribonü nüsa miki mükhümde arübah;
tüsho nüsanü arü düthsün kheak thrümbah.”
Currently Selected:
YUZÜNGTHALO 33: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
