YUZÜNGTHALO 34
34
Mosa Shekhi
1Judüki Mosanü Jirikho hode yübah alakhi Moab dükün chingnü Nebo müzüng tüsho Pisga wung mujuk kheak wutu. Tüsho Atungpuhnü api ki Gilead lomi alala Dan khiungde huh, 2Naphtali alala, Ephraim lomi, Manase, Juda lomi alala, Aniyüzahlim Keto khiungde, 3dukulim, tüsho Jirikho jindükhünbo, ashidungbo lakhi kiutobo, Zoar khiungde. 4Tüsho Atungpuhnü api ki tha, “Ha lo ha inü Abraham, Isak tüsho Jakob jihpü alokhikhi, hade tha, ‘Inü ha nü tsühsoniusobo kilim jihbah.’ Inü ju nü müknü ngüshihdo, tüshe nünü ju hode müyü.”
5Jumonü Atungpuh yukhüm nangde, Atungpuh yamlarü Mosa ju Moab lomi ching she. 6Tüsho Atungpuhnü api Beth Peor thripkhüh lim, Moab dükhün ching kiuyukabah; tüshe khihni khiungde shenü she api kiuyuk mümükheah. 7Mosa shechoki api kam 120 lakheah. Api mük neamneam müla yungsho ju ruk lang api sühmüh lakheah. 8Tüsho Israel tsührübonü Moab dükhün ching nimung samrü Mosa mitrip. Junangde Mosa dünkheak mitripkhi tüsho tüzhokhi arün thsü.
9Kheakü Nun tsührü Jihusua lümlung menü mithülamde lakheah, tümüde Mosanü akhah api kheak nimkih; jumonü Israel tsührübonü api yu ani, tüsho Atungpuhnü Mosa ki thiyukhüm jihkhi nangde rhimo.
10Tüshe Jushu a Israel ching Atungpuhnü mironü miro mükheahkhi Mosa nangde wukihrü masürü, 11Atungpuhnü Ijip lomi ching Pharao miki, api yamlarü, tüsho api lo alala ching rhimoshihpü thiyikhi amütsan tüsho khinthiyinbe alala chingnü, 12tüsho wu ato, tüsho Israel mikinü Mosanü atrebe ato rhimokhi nangde wukihrü sheshe mülakheah.
Currently Selected:
YUZÜNGTHALO 34: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
