YUZÜNGTHALO 32
32
1O thüningbo, aniang, tüsho inü athabah;
tüsho alominü I mün chingnü athakhi aniang.
2Inü thsangyukhi tsüng nangde atsamkhishang,
inü athakhi ayinke nangde keamshang,
sangdung nunu kheak tsüng arünnü akeamkhi nangde,
tüsho rimkiu kheak tsüng shimshimde akeamkhi nangde.
3Tümüde inü Atungpuh mung zhiyukjihbah.
Isa Thrünpuh tokhi thaang! @SP ACE =
4Api ju lung, api rhimo khiukdahlah;
tümüde api limro alala alungki.
Athülünkhi Thrünpuh tüsho amülim mülakhi,
api alungki tüsho dükde lah.
5Arünü api ki thsümünimde rhimodo,
arü kheak lapha kihkhinü arübo kheaküa api tsührü yung;
arübo bephülapkhi tüsho akhürang lün.
6Nüsanü Atungpuh kheak hade rhimocho de,
nüsa abünrü tüsho azhazha mihtsürü?
Api ju nü thrünrü nü buh yung de,
shepünü nü thrün tüsho trük kamshih?
7Awün nimungbo lümkhitang,
lün ashang hokhibo lümkhitang;
nü buh ki keokhiang, tüsho apinü nü ki huhbah;
azothsürübo ki keokhiang, tüsho arünü nü ki thabah.
8Küyimki khide Achangbuhnü trükbo kilim yamrüplurüp jihkhea,
küyimki apinü mihtsürübo chammüzütkhea,
apinü mihtsürü aredungbo ju Israel mihtsürü wühkhe yande khim.
9Tümüde Atungpuh lupü shihcham ju api mihtsürübo,
Jakob ju apinü achamkhitkhi yamrüplurüp. @SP ACE =
10Apinü api sunglo ching tüsho tümü mülakhi sunglo ching ngü;
apinü anihbuh mükamdode, api küm,
apinü anihbuh api mükji mukhiuk nangde neakde la.
11Müleangtopünü asap chuphüneande,
ajipjip kumung phürüpkhi nangde,
aghi chutreakbah arü kaplode aghidükeang kheaknü ashuhkhi nangde,
12 Atungpuh zangrünü api be tüsho api lung khiungkerü thrünpuh mülakheah.
13Apinü api alomi achang kheak binshih,
tüsho apinü thulu chingnü akhiukkhi tsüh;
tüsho apinü api mukhuke lung chingnü ngüshih,
tüsho lungtraktrak chingnü müdangke akhiukshih.
14Moshi chingnü niuhke kingkungkhi tüsho mihnu chingnü niuhke,
namfimihnunu tüsho namfimihnupung müdang bede,
Bashan namfimihnupung amokhitkhi,
atsüdak wheat hi tüsho amokhitkhi yukhu nünü yung. @SP ACE =
15Tüshe Jeshurun#Alungkirü. shihkihde zokhit, tüsho azhihde kam;
bukthsüde tsühbah api mülangrüpdo tüsho lütlütde kam.
Apinü api thrünrü Thrünpuh bahyuk,
tüsho api khümkhitpü lung bahyuk.
16Arünü api keomukhuh-a khiungkerü thrünpuhbo kheak abukakhiukshih;
arünü athraneanbe rhimode api bukakhiukshih.
17Arünü Thrünpuh tsütsü yungde arimri mebo,
arünü küyimkishe mümükheahkhi, khihnishido arükhi thrünpuhbo aso,
nüsa jipürünü mütrekhi kilim laksah-a kingaün.
18Nüsanü nüsa mütrübuh lung bahyuk;
nüsanü nüsa zübebuh Thrünpuh mihabah.
19 Atungpuhnü ju ngübahle arü bahyuk,
tümüde atsührü tüsho tsührübebonü abukakhiukshih.
20Tüsho apinü tha, Inü I miro arü kheaknü ramabahbah,
arü kheak tümü dünjibanü inü akheahbah,
tümüde arübo yihkhro tüsho müthülünkhi tsührübo lün lah.
21Arünü arü thrünpuh kheak I bukakhiukshih,
tüsho arü sangthsü kheak I bukakhiukshih.
Jumonü inü arü mihtsürü yungde püpü kheak bukakhiukshihbah;
inü arü abünrü trük kheak mükthsüshihbah.
22Tümüde I bukakhiukkhinü mo takkihdo,
tüsho ju Ashe-lomi khiungde takchoh,
alomi tüsho lüpdükhi aniuabahchoh,
tüsho müzüngbo jing kheak mo thsahkihchoh. @SP ACE =
23Tüsho inü arü kheak thsümütsübo keamkihshihbah;
inü arü kheak hühzobo keamshihbah;
24arübo akhümnü ashebah tüsho takde alamlamkhinü
tüsho atrebe tukthsünü ashebah;
tüsho inü arü azhihde mütüm shiwüh yüshihbah,
tüsho müzüm-phuruto anguhpü yüshihbah.
25Wungdo phulung ching nukshangnü alaksahbah,
tüsho thüyam khiungshakbo ching atrebe labah,
athrününgtsüng tüsho anünürü chido,
niuhdukrü khungarü,
kubuyukkhi mihtsürübo dükheakshihbah.
26Inü hade thakhülaa,
Inü arü ashang ching hiumüzütshihbah,
inü arü mihtsürü bolungnü alümkhitpü arün thsüshihbah,
27tüshe inü arü riri mükükheangshihkhukde bahdo,
jude thsükhülaa arü riribonü aniphülapbah athabah,
“Isa khahnü kukdo;
Atungpuhnü harü alala mürhimo.” @SP ACE =
28Tümüde arü sulüm mülakhi trük ah,
arü kheak anikhitkhi müla.
29Arü lümlung lakhülaa, arünü ha anikhitbah,
arünü adünjipü lakhi mükheahbah!
30 Atungpuh arü Thrünpuhnü arü yinkhi yungsho,
tüsho Atungpuhnü arü jihabahkhi yungsho,
küde thsah khülangnü chithürü yande müshampü,
tüsho mahnenü chithürü thürü alihde atsoshihpü?
31Tümüde arü thrünpuh ju isa Thrünpuh ruk yung,
isa riribonü she arü küdah thsüde mütsanlah.
32Tümüde arü kurungaso ju Sodom kurungaso kheaknü,
tüsho Gomorra lubo chingnü arülah;
arü kurungasobo ju müzümbo ah, adüchibo ju khühlah;
33arü yukhubo ju phuruto müzüm tüsho ashebe phuruto müzüm lah. @SP ACE =
34Arü riribonü arhimokhi Atungpuhnü lümkhitlah,
apinü arü kam dükdü ching thsümüchipü aleanglah.
35Royimpü tüsho ashaklopü I yo,
akhukhi kim ching arü jing lihbah;
tümüde arü thsümüchipü nimung thüninde lah,
tüsho arü kiuyuk aphüni lah.
36Küyimki apinü arü wu tsodo tüsho rhüka larü yungsho zuzu larü maning de mükheahbanü,
atsütsü Atungpuhnü api mihtsürü bekhitbah,
tüsho api yamlarübo kheak müthsümbah.
37Tüsho Atungpuhnü athabah, Arü thrünpuhbo küching la,
lung küpü ching arü tsoyukcho,
38sherübonü arü kingaünkhi müdang tsühkhea,
tüsho arü ayungbe kingaün chingnü yukhu yungkhea?
Arübo asürübah nüsa rungshang,
arünü nüsa tsungdoshang! @SP ACE =
39Kheakü kheahang I, I lang, Thrünpuh ah, tüsho I hobah tümü thrünpuh müla;
inü laksahchoh tüsho inü rhangdung lashihchoh;
inü yurijihchoh tüsho inü ngushihchoh;
tüsho I khah chingnü abekhitkhukpü thsüde sheshe müla.
40Tümüde inü I khah thüning lim shuhkihbah thiyuchihchim:
I lünnü lah,
41Küyimki inü I nukshang zhingzhingde azükhitba,
tüsho I khahnü mahkhapkhi kheak ramloba;
inü I riri kheak royimbah tüsho I thraneanrü kheak athrihlobah.
42Inü I hühzobo thiyih yungshihbah tüsho I nukshangnü shih tsühshihbah–
alaksahkhi tüsho aramrü thiyihbo, thiriri limberü kubo. @SP ACE =
43O trükbo, Atungpuh mihtsürübo shiang;
tümüde api yamlarübo laksahrü alala kheak apinü royimchoh,
tüsho api riri kheak royimchoh,
tüsho api lo le amihtsürü neak bahjihchoh.
44Mosa tüsho Nun tsührü Jihusua anenü arübah ha khün yubo mihtsürübonü sode khe.
Mosanü Akheam Thsangyukhi
45Mosanü harü yu alala Israelrü ki thakham, 46tüsho apinü arü ki tha, “Inü khihni thiyumütsan jihkhi kheak nüsa mulong zoang, ha yakzan Israel tsührübonü kümkangde anishihpü nüsanü thiyukhüm jihang. 47Tümüde ha nüsa thsungkheaknü akeangkeang yung, tümütüsho ha nüsa rhangdung, tüsho ha yunü nüsa Jordan hode yübah mükühpü lo ching jingtsüpkutsüp labah.”
48Tüsho ju nimung Atungpuhnü Mosa ki tha, 49“Jirikho hode yübah, Moab lomi ching, ha Abarim müzüngbo ching, Nebo müzüng kheak yükihang. Inü Israel tsührübo kilim jihkhi Kanan lo lim abina kheahang; 50tüsho nü khiung Aron Hor müzüng kheaknü ashekhi nangde nü ju müzüng kheaknü ashebah; 51tümütüsho nünü Israel tsührü bolungnü I azhihde Zin sunglo ching lakhi, Meriba Kadesh ke ching neak yihbeakdo, tümütüsho Israel tsührü bolung nünü I ki wüntre müjih. 52Nünü alomi ju limshu chingnü angübah, tüshe inü Israel tsührübo kilim jihkhi lomi ching nü müyüzah.”
Currently Selected:
YUZÜNGTHALO 32: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
