YUZÜNGTHALO 26
26
Yimlu Kingaünbo
1“Küyimki nüsa Atungpuh nüsa Thrünpuhnü yamrüplurüp jihkhi lo ching arübanü, tüsho müküh-a ju ching labanü, 2nünü alo chingnü akhuh akhiukkhi luang, ju Atungpuh nüsa Thrünpuhnü nüsa kilim jihkhi lo chingnü hande arang, tüsho ju muluk ching yukbahle Atungpuh nüsa Thrünpuhnü api mung zopü mokhitkhi dangpung ching nahde yüang. 3Tüsho nünü ju kim ching shepü amükeambuh lanü api ki yübahle thaang, ‘Atungpuhnü isa jipürü ki isa jihshihpü alokhikhi lomi ching I arüdo de Atungpuh nüsa Thrünpuh ki khihni inü thakhitchoh.
4“Judüki amükeambuhnü nü khah chingnü muluk lubahle A TUN GPU H nü Thrünpuh kingaün sadam ki zobah. 5Tüsho nünü Atungpuh nü Thrünpuh miki thabah: ‘Rümde atsahrü Aramrü ju I buh lakheah; tüsho api wühkhe nükde Ijip ching tsode yünü la; tüsho ju ching api trük ato, sühmüh lakhi tüsho wüh hihde kam. 6Tüsho Ijiprünü isa kheahmüchihde thsümüchi, tüsho azhorü nangde rhimo amüküp nimkih-a rhimoshih. 7Judüki isanü Atungpuh isa jipürü Thrünpuh ki zhide tha, tüsho Atungpuhnü isa düsheak so, tüsho isa thsümüchikhi, isa khisahkhi, tüsho isa junokhi ngü; 8tüsho Atungpuhnü isa api wu-sühmüh khah chunghuhde, atrebe amütsan tüsho mihmüyinsahbe thsüde Ijip chingnü bekhit; 9tüsho apinü isa ha dangpung ching bede arübah ha niuhke tüsho mukhuke bukkhi lomi isa kilim jih. 10Tüsho kheahang, O Atungpuh , kheakü nünü I kilim jihkhi lo chingnü akhuh asokhi sangaso hande arüchoh.’
Muluk ju Atungpuh nü Thrünpuh miki zojang tüsho api miki khukningang.
11Tüsho nü le Levirü tüsho nüsa lung lakhi khiungkerünü Atungpuh nü Thrünpuhnü nü tüsho nü yamkhün kilim jihkhi atsübo alala ching asühachihbah.
12“Küyimki nünü thürü shihcham jihpü kam, kam asampü thürü shihchambo jihkhambanü, tüsho ju Levirü, mürerü, tüsho khimoberübo kilim jihbah arünü nüsa chipimurung khüp ching tsühbah bukthsübanü, 13nünü Atungpuh nü Thrünpuh miki thabah: ‘Inü arüng shihcham I yam chingnü yihkhitdo, tüsho jurü Levirü, khiungkerü, mürerü tüsho khimoberü kilim, nünü I kilim thiyukhüm jihkhi yande jihdo; inü nü yukhüm mülakphah, yungsho inü jurübo mümihabah. 14Inü ju I tüzhode alachoki kim ching mütsüh, yungsho mümüsühkhi rhimo thsungkheak inü müyihkhit, yungsho asherü kilim müjih. Inü Atungpuh I Thrünpuh yu anido, tüsho nünü I ki thiyukhüm jihkhi yande rhimodo. 15Nü lapung amüsüh yinmi chingnü abinkhia kheahang, tüsho nü mihtsürü Israel tüsho nünü isa jipürü kheak thiyuchihchimkhi nangde, nünü isa kilim jihkhi, niuhke tüsho mukhuke bukkhi lomi müngühjang.’
Atungpuh Mihtsürü
16“Ha nimung Atungpuh nüsa Thrünpuhnü harü yakzan tüsho thiyuzüngbo leangkhishihpü nüsa kilim thiyukhüm jihchoh; jumonü nüsanü kümkangde harübo nüsa mulong athrünkhinü tüsho nüsa me athrünkhinü aniang. 17Khihni nüsanü Atungpuh ju nüsa Thrünpuh thsüpü alokhido, tüsho junangde nüsanü api limro ching tsahbah tüsho api yakzan, api yukhüm, tüsho yuzüngbo anibah. 18Kheaküshe apinü nüsa ki thiyuchihchimkhi nangde, khihni Atungpuhnü nüsa api mihtsürü thsüpü alokhido, junangde nüsanü api yukhümbo anibah, 19tüsho apinü nüsa mungshimungthu tüsho wüntre jihkhi ching trükbo kurungkheak shuhkihbah, tüsho apinü athakhi nangde, Atungpuh nüsa Thrünpuh miki nüsa amüsüh mihtsürü thsübah.”
Currently Selected:
YUZÜNGTHALO 26: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
