YUZÜNGTHALO 27
27
Lungbo kheak Yakzan Thrütkihkhi
1Judüki Mosa tüsho Israel azothsürübonü mihtsürübo ki thiyukhüm jihde tha, “Khihni inü nüsa kilim thiyukhüm jihkhibo ha alala mihyuaniang. 2Tüsho küyimki nüsa Jordan hode Atungpuh nüsa Thrünpuhnü ajihkhi lo ching yübanü, nüsanü lung atotobo khimang tüsho müye-sungsungnü mujuang. 3Küyimki nüsa hode yübah Atungpuh nüsa Thrünpuhnü ajihkhi niuhke tüsho mukhuke bukkhi lomi ching nüsa jipürü Thrünpuhnü nüsa kheak thiyuchihchimkhi nangde yüzahbanü nüsanü ha yakzan jurübo kheak thrütang. 4Jumonü küyimki nüsa Jordan hode ayübanü khihni inü nüsa ki thiyukhüm jihkhi ha Ebal wung ching lungbo khimang, tüsho müye-sungsungnü mujuang. 5Tüsho ju ching nüsanü Atungpuh nüsa Thrünpuh ki lungnü kingaün sadam thsüang; nüsanü yinchibo tümü she düyuk. 6Nüsanü mükingarihkhi lungnü Atungpuh nüsa Thrünpuh kingaün sadam thsüang, tüsho ju kheak Atungpuh nüsa Thrünpuh kilim taka kingaünang. 7Nüsanü mungtsü kingaün jihang tüsho ju chingnü tsühang, tüsho Atungpuh nüsa Thrünpuh miki asühachihang. 8Tüsho nüsanü lungbo kheak ha yakzan khide mungode thrütkihang.”
9Judüki Mosa le amükeamrübo tüsho Levirübonü Israelrü alala ki tha, “O Israel, jikshe müthsüde I ki aniang: Ha nimung nüsa A TUN GPU H Thrünpuh mihtsürü kamdo. 10Jumonü nüsanü Atungpuh nüsa Thrünpuh düsheak aniang, tüsho inü nüsa ki khihni thiyukhüm jihkhi api yukhümbo tüsho api yakzanbo rhimoang.”
Mihyumanikhi Muthrumünean
11Tüsho ju nimung Mosanü mihtsürübo ki thiyukhüm jihde tha, 12“Küyimki nüsa Jordan hobanü mihtsürübo müngühmühi jihde Gerizim wung kheak harü zhipbah: Simeon, Levi, Juda, Issakar, Josep, tüsho Benjamin; 13tüsho harübo Ebal wung kheak zhipbahle muthrumüneanbah: Reuben, Gad, Asher, Zebulun, Dan, tüsho Naphtali. 14Tüsho Levirübonü düsheak achangnü Israel mihtsürü alala ki thabah:
15“‘Shepünü lung, sang tüsho yinchinü thsüa ramde kingaünchonü api muthrumünean thsang; Atungpuhnü sangthsü kingaünkhi thraneanchoh.’
Tüsho mihtsürü alalanü athabah, “Amen!”
16“‘Shepünü abuh yungsho abe ki mihyumaninü api muthrumünean thsang.’
Tüsho mihtsürü alalanü athabah, “Amen!”
17“‘Shepünü nihbuh yamhingrü arelung shuhakhinbanü api muthrumünean thsang.’
Tüsho mihtsürü alalanü athabah, “Amen!”
18“‘Shepünü müktukrü limro lakshilim bechonü api muthrumünean thsang.’
Tüsho mihtsürü alalanü athabah, “Amen!”
19“‘Shepünü khiungkerü, mürerü, tüsho khimoberü thiyuro thsungphülapbanü api muthrumünean thsang.’
Tüsho mihtsürü alalanü athabah, “Amen!”
20“‘Shepünü nihbuh abuh niuberü kheak müzammürambanü api muthrumünean thsang.’
Tüsho mihtsürü alalanü athabah, “Amen!”
21“‘Shepünü shiwüh mungji kheak müzammürambanü api muthrumünean thsang.’
Tüsho mihtsürü alalanü athabah, “Amen!”
22“‘Shepünü nihbuh chiniurü, abuh tsührü yungsho abe tsührü kheak müzammürambanü api muthrumünean thsang.’
Tüsho mihtsürü alalanü athabah, “Amen!”
23“Shepünü nihbuh niube abe kheak müzammürambanü api muthrumünean thsang.”
Tüsho mihtsürü alalanü athabah, “Amen!”
24“‘Shepünü nihbuh yamhingrü ramde alaksahbanü api muthrumünean thsang.’
Tüsho mihtsürü alalanü athabah, “Amen!”
25“‘Shepünü amülim-mülarü laksahpü buknim lubanü api muthrumünean thsang.’
Tüsho mihtsürü alalanü athabah, “Amen!”
26“‘Shepünü ha yakzan tüsho thsangyukhibo manibanü muthrumünean thsang.’
Tüsho mihtsürü alalanü athabah, “Amen!”
Currently Selected:
YUZÜNGTHALO 27: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
