YUZÜNGTHALO 25
25
1“Mihtsürü mahne dükeak neamneamde mahkhappung ching arüsho mahkhaprünü ane dükeak mahkhapjihpü kuklah, tüsho arünü khülang alim tüsho püpü ju amülim jihbah, 2amülim mihtsürü ju alakpü thülünsho, mahkhapbuhnü api mühüplimnü ayapshihbah tüsho api kheak amülim jihkhi ayannü khede api mikinü arhapbah. 3Nünü api yirü ki rhappü kuklah, tüsho ju kheak muho, jude yungsho khürünü ju kheak hode rhapsho, nü keoniorü ju nü miki abobe kuhi ching labah.
4“Nünü moshipung hi nitchoki amün dürümjih.
Asherü Keoniorü ki Rhimopü
5“Keoniorü mahne rukhüh labah tsührü mülade khülang ju shesho, ashebuh niubenü ju yamkhün hobah jaksorü ki mürhang; anihbe yamkhünbuh keoniorünü api lubah, tüsho ayamkhünbuh keoniorünü alibe ki rhimobebo rhimobah. 6Tüsho anihbenü azübekhi athrürünü akeonio ashebuh mung jimulobah, junangde api mung Israel chingnü nankhita mübah. 7Tüshe apinü akeonio niube ju mulunesho, anihbe chipimurung ching azothsürübo ki wutubahle thashang, ‘I niubuh keoniorünü akeonio mung Israel ching zolopü reanglochoh; apinü I niubuhnü arhimobebo I ki mürhimo.’ 8Judüki kiuto azothsürübonü api jibahle athabah; tüsho inü anihbe mulune de düngyingde thasho, 9akeonio niubenü azothsürü mikinü api ki arübah ajing chingnü api jingkhümpü yihkhitbah, amiro kheak mukhiukkihbah, tüsho athabah, ‘Shepünü nihbuh keoniorü yamkhün mushuhkihbanü ju mihtsürü kheak hade arhimobah.’ 10Tüsho yamkhün ju Israel ching jingkhümpü yihkhitrü de ajibah.
Püpü Yakzanbo
11“Mihtsürü mahne shochihde alachoki, khülang buh yamkhünbenü aniubuh khümkhitpü thsüde api lakbuh yo kheak tholosho, 12nünü anihbe khah lipshakjang; nünü dümuzho.
13“Nünü nü qiuqiu ching adünarabe ato tüsho anini düyuk. 14Nünü nü yam ching adünarabe ato tüsho anini düzo. 15Nünü khiukdahde tüsho thiyuronü adünaraang, junangde Atungpuh nü Thrünpuhnü ajihkhi lo ching nü kutsüpde alabah. 16Tümüde sherünü hadürü rhimochonü, tüsho sherünü thiyuro lungki mülanü, Atungpuh nü Thrünpuh kilim athraneanbe lah.
17“Nüsa Ijip chingnü akhiukchoki limro ching Amalekrünü tümü nüsa kheak rhimokheanü lümkhitang, 18nüsa limro ching keaka lunga yapchoki arünü künangde nüsa dunglim larü laksahkhea; tüsho arünü Thrünpuh mütre. 19Apinü nüsa kilim yamrüplurüp jihkhi lo ching küyimki Atungpuh nüsa Thrünpuhnü mühirü thiriri kheaknü sühakhimshihbanü, nüsanü Amalekrü lümkhitpü thüning bukkhüp chingnü nankhita bahang; nüsanü dümih.
Currently Selected:
YUZÜNGTHALO 25: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
