YUZÜNGTHALO 24
24
Niuberü Bahkhi tüsho Lulokhi
1“Küyimki athrürü khülangnü niuberü lubah apinü anihbe kheak tümükhüh mümüsühde ngübah alüm müshede akambanü; tüsho apinü abahkhi mülükhi hüm thrüta akhah ching yukjihbah api yam chingnü atsoshihbanü, 2küyimki anihbe api yam chingnü chamde tsobah püpürü niuberü kambanü; 3ayamkhünbuh ashubuhnü anihbe thraneande abahkhi mülü-hüm thrüta akhah ching yukjihbah api yam chingnü tsoshihsho, yungsho ayamkhünbuh ashubuh sheabahsho, 4anihbe müneanabahshu a akhuh yamkhünbuh anihbe bahbuhnü aniube thsüpü mululo; tümüde ju Atungpuh miki athraneanbe lah, tüsho adüso nü Thrünpuhnü yamrüplurüp jihkhi lo ching nünü neak hande darü.
Yakzanbo
5“Küyimki mihtsürü khülang yamkhün aso thsübanü, api keochih ching müyü yungsho rhimo tümü müzhim; api kam khülang thüyam ching zuzu labah, tüsho apinü alukhi aniube asühshihbah.
6“Mihtsürü shenü she thiyuchihchimkhi ching thsamnü düzüng, tümüde apinü yamkhün rhangdung lapü lujihchoh.
7“Mihtsürü khülang akeoniorü Israelrü tsührü rama lubah atsokhi ngükhitsho, tüsho azhorü nangde api thsümüchisho yungsho yinsho, mihrambuh ju asheshihbah; tüsho nüsanü amütsü mihtsürü nüsa bolungnü yihkhita bahang.
8“Apham akhiukchoki kümkangang, junangde düshihde kheahyukang tüsho amükeamrü Levirünü nüsa ki thsangyukhi yande rhimoang; inü arübo kilim thiyukhüm jihkhi nangde, nüsanü kümkangde rhimoang. 9Nüsa Ijip chingnü akhiukchoki Atungpuh nüsa Thrünpuhnü limro ching Miriam ki tümü rhimokheanü ju lümkhitang.
10“Küyimki nünü yamhingrü ki tümükhüh nipjihbanü apinü thiyuchihchimkhi lupü api yam ching düyüzah. 11Nü wungdo zhipbah, tüsho nünü anip-jihbuh mihtsürünü thiyuchihchimkhi nü kilim hande akhiukbah. 12Tüsho mihtsürü ju zhochihrü a sho, thiyuchihchimde nü ki jihkhi khimmih ching nünü düyap. 13Dükde ani yüzahshu api kilim thiyuchihchimkhi jihloang, junangde apinü nihbuh khimmih ching yapbah tüsho nü müngühjihbah; tüsho Atungpuh nü Thrünpuh miki nü thiyuro labah.
14“Nünü zhochihrü tüsho küpkhukde mulomüthsürü, nü keoniorü yungsho nüsa kiuto khürü ching lakhi khiungkerü thsüthsü, nünü arü mihkhah dün shukhishura düthsü. 15Nimung aban ani müyüzahyide nünü api mihkhah mo jihang tümüde api zhochihrü ah tüsho ju kheak api mulong dükinkihlah; jude yungsho apinü Atungpuh ki nü azhihde azhibah, tüsho ju nü kheak neak labah.
16“Tsührübo dünkheak buhrübo müsheshih, yungsho buhrübo dünkheak tsührübo müsheshih; nihbuh neak dünkheak mihtsürü khülang ju asheshihbah.
17“Nünü khiungkerü yungsho mürerü dünkheaknü alim düthsümünim, yungsho thiyuchihchimkhi ching khimoberü khimmih dulu. 18Tüshe nü khülang ki Ijip ching azhorü lakheah tüsho Atungpuh nü Thrünpuhnü nüsa ju chingnü rhokhitdo de lümkhitang; jumonü inü ha rhimopü nüsa ki thiyukhüm jih.
19“Küyimki nünü thulu ching hi yimlubanü tüsho thulu ching hi phung mihbanü, nünü ju lupü rholode düyü; ju khiungkerü, mürerü, khimoberü thsungkheak labah, junangde Atungpuh nü Thrünpuhnü nünü arhimokhi alala ching müngühjihbah. 20Küyimki nünü oliv rhobanü, akhahbo ching dükheahlo; ju khiungkerü, mürerü tüsho khimoberü thsungkheak labah. 21Küyimki nünü kurungasolu chingnü kurungaso hanmukhungbanü, jushu a nünü ju lim düyülo; ju khiungkerü, mürerü tüsho khimoberü thsungkheak labah. 22Tüsho khülang ki nü Ijip lomi ching azhorü lakheah de lümkhitang; jumonü ha rhimopü inü nüsa ki thiyukhüm jihchoh.
Currently Selected:
YUZÜNGTHALO 24: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
