YUZÜNGTHALO 23
23
Atungpuh Mihtsürü kheaknü Achamkhitkhi
1“Athrürü shepü nihbuh mü bah-a la yungsho yo rhipshaka bah-a lanü api Atungpuh mihtsürü lung mübe.
2“Aleangkheak tsührü a A TUN GPU H mihtsürü lung mübe; lün thürüpü ching she api tsühsoniuso sheshe Atungpuh mihtsürü lung mübe.
3“Amonrü yungsho Moabrü Atungpuh mihtsürü lung mübe; lün thürüpü ching she api tsühsoniuso sheshe Atungpuh mihtsürü lung mübe, 4tümütüsho nüsa Ijip chingnü akhiukchoki yikhap tüsho ke shuhbah limro ching nüsa mushoru, tüsho arünü nüsa azhihde Mesopotamia ching lakhi Pethor chingnü Beor tsührü Balaam muloa nüsa athrushih. 5Judüalalashe Atungpuh nüsa Thrünpuhnü Balaam ki mani, tüshe Atungpuh nüsa Thrünpuhnü athruaji ju nüsa thsungkheaknü müngühmühi kamshih, tümütüsho Atungpuh nüsa Thrünpuhnü nüsa muzholah. 6Nüsanü nüsa rhangdung amuyung lünnü arü dürung yungsho dülakhitshih.
7“Nünü Edomrü düthranean tümüde api nü keoniorü ah. Nünü Ijiprü düthranean, tümütüsho khülang ki nü arü lo ching khiungkerü lakheah. 8Arü tsührübo lün mahsampü chingnü ründe Atungpuh mihtsürü lung bepü kuklah.
Binpung Müsühde Azopü
9“Küyimki bonungrübo nüsa riri bede keochihpü yübanü, nüsanü amütsü rhimobo chingnü chamkhide laang. 10Nüsa bolung athrürü khürü milim chingnü japjapde kambah müneansho api binkheampung aleanglim wukhiukshang; api binkheampung alunglim mazah. 11Tüshe arelim apinü kemüyihbah; tüsho ani yüzahshu api binkheampung ching alode arüpü kuklah.
12“Kheaküshe nüsa müsümülüpü thsüde binkheampung aleanglim dangpung khülang labah; 13tüsho nüsanü thsühnuk lung tso shuhang; tüsho küyimki nü arelim zuh-a binbanü, nünü alokhün kiuang, tüsho rholobah nünü müsümülükhi ju wudoang. 14Tümütüsho nüsa khümkhitpü tüsho thiriri nüsa kilim jihpü Atungpuh nüsa Thrünpuh nüsa binkheampung ching tsahchoh, jumonü nüsa binkheampung ju amüsüh labeah, junangde apinü nüsa bolung tümükhüh amünean müngü, tüsho nüsa kheaknü tsoa mübah.
Yakzanbo
15“Azhorü khülang nihbuh putungrü kheaknü alihde nü kilim arükhi nünü atungrü kilim düyüloshih. 16Apinü tsülah de lümbah nüsa kiuto khülang mokhitkhi ching nü lung lapü kuklah; nünü api düjuno.
17“Israelrü athrürü yungsho aliberü shenü she arüngyam ching müzammüramrü kampü mukuk. 18Nünü aliberü yungsho athrürü müzammüramkhi#Khihnu yinkhi dün. chingnü amulokhi thiyuchihchimkhi shakpü thsüde Atungpuh nü Thrünpuh yam ching hande darü, tümüde ane chido Atungpuh nü Thrünpuh kilim athraneanbe lah.
19“Nünü nü keoniorü ki sho, tsühyungpü yungsho tümükhüh alü jihloshihpü nipjihkhi alü dükheang. 20Khiungkerü ki nünü alü kheangpü kuklah, tüshe nünü keoniorü ki alü dükheang, junangde küpü lo müküh-a lupü yüzahchonü ju ching nünü arhimokhi alala ching Atungpuh nü Thrünpuhnü nü müngühjihbah.
21“Küyimki nünü Atungpuh nü Thrünpuh ki thiyuchihchimbanü, nünü ju jihpü dülakma; tümüde Atungpuh nü Thrünpuhnü ju nü kheaknü akheangbah, tüsho ju nü thsungkheak neak labah. 22Tüshe nünü thiyuchihchim müthsüsho nü neak müla. 23Nü mün chingnü tümü thadünü dükde arhimobeah, tümütüsho nü mün hode Atungpuh nü Thrünpuh kilim nünü zuzu thsüde thiyuchihchim thsüdo.
24“Küyimki nünü yamhingrü kurungasolu ching yübanü nünü kurungasobo nü kün thülün tsühpü kuklah, tüshe hah ching tümü she düyuk. 25Küyimki nünü yamhingrü lu ching yübanü nünü hi aye nü khahnü tsüka lupü kuklah, tüshe nü yamhingrü hi hirhüpbenü dürhüp.
Currently Selected:
YUZÜNGTHALO 23: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
